ເຜິຍໂສມໜ້າສະຖານີລົດໄຟກາສີ

ຂ່າວ: ລິດທະຈັກ 

   ສະຖານນີລົດໄຟກາສີເປັນໜຶ່ງໃນສະຖານີຂອງໂຄງການເສັ້ນທາງລົດໄຟລາວ-ຈີນ, ໄດ້ສ້າງສໍາເລັດແລ້ວ ລວມທັງທາງດ້ານໃນ ແລະດ້ານນອກ, ເດີ່ນຕໍ່ໜ້າສະຖານີ, ຫຼັງຄາກັນຝົນ ແລະສິ່ງອໍານວຍຄວາມສະດວກອື່ນໆ ແລະໄດ້ເຜີຍໂສມໜ້າຢ່າງເປັນທາງການໃນວັນທີ 27 ກັນຍາຜ່ານມານີ້.

    ສະຖານີດັ່ງກ່າວ ຕັ້ງຢູ່ເມືອງກາສີ ແຂວງວຽງຈັນ ຊຶ່ງຮັບເໝົາກໍ່ສ້າງສະຖານີໂດຍກຸ່ມບໍລິສັດກໍ່ສ້າງທາງລົດໄຟ ສປ ຈີນ, ໄດ້ຮັບການອອກແບບເປັນສະຖານນີຂົນສົ່ງໂດຍສານ, ມີບ່ອນລໍຖ້າຂຶ້ນລົດ 1 ບ່ອນ ໂດຍມີເສັ້ນທາງລົດໄຟຂັ້ນກາງ 3 ສາຍ, ສາມາດບັນຈຸຜູ້ໂດຍສານໄດ້ສູງສຸດ 150 ຄົນ, ອາຄານສະຖານີລວມພື້ນທີ່ກໍ່ສ້າງທັງໝົດ 1498,7 ຕາແມັດ, ໂດຍລວມແລ້ວການອອກແບບສະຖານີກາສີແມ່ນໄດ້ປະສົມປະສານກັນລະຫວ່າງສະຖາປັດຕະຍະກໍາແບບດັ້ງເດີມຂອງລາວ ແລະຈີນ ຊຶ່ງ ມີຄວາມສວຍງາມ ແລະມີສະເໜ່ດ້ວຍວັດທະນະທໍາລາວ ແລະຈີນຢ່າງປະຈັບຕາ.

   ຄະນະບໍລິສັດຮັບເໝົາກໍ່ສ້າງສະຖານີກາສີຍັງແຈ້ງໃຫ້ຮູ້ຕື່ມວ່າ: ພວກເຮົາໄດ້ນໍາໃຊ້ເຕັກນິກສ້າງແບບຈຳລອງ BIM ແລະໄດ້ຜ່ານຜ່າຄວາມຫຍຸ້ງຍາກໃນການກໍ່ສ້າງໃນລະດູຝົນ, ການປ້ອງກັນພະຍາດໂຄວິດ-19, ການຂົນສົ່ງວັດສະດຸກໍ່ສ້າງ ແລະອື່ນໆ ແລະສາມາດສໍາເລັດໂຄງລ່າງສ່ວນຫຼັກຂອງອາຄານສະຖານີກ່ອນເວລາກໍານົດ 15 ມື້, ປະຈຸບັນ, ສະຖານີດັ່ງກ່າວພວມດໍາເນີນການກວດຮັບ ແລະຄາດວ່າຈະໄດ້ເປີດນໍາໃຊ້ຕາມແຜນທີ່ວາງໄວ້.

   ທາງລົດໄຟລາວ-ຈີນ ແມ່ນໂຄງການເຊື່ອມຕໍ່ລະຫວ່າງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນກັບຍຸດທະສາດຫັນຈາກປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອມໂຍງເຊື່ອມຈອດຂອງລາວຊຶ່ງເລີ່ມຈາກນະຄອນຄຸນໝິງ ແຂວງຢຸນນານຂອງ ສປ ຈີນ ໄປ ສິ້ນສຸດທາງຕອນໃຕ້ຢູ່ນະຄອນຫຼວງວຽງຈັນ, ໃນນັ້ນຊ່ວງໄລຍະຢູ່ລາວມີຄວາມຍາວທັງໝົດ 422,4 ກິໂລແມັດ, ທາງລົດໄຟສາຍນີ້ສ້າງຕາມມາດຕະຖານການບໍລິຫານ ແລະມາດຕະຖານເຕັກນິກຂອງຈີນ, ຖືກອອກແບບໃຫ້ມີຄວາມໄວ 160 ກິໂລແມັດຕໍ່ຊົ່ວໂມງ, ເປັນທາງລົດໄຟໃຊ້ໄຟຟ້າທີ່ຂົນສົ່ງສິນຄ້າ ແລະຜູ້ໂດຍສານ ແລະຈະເປີດໃຫ້ບໍລິການໃນເດືອນທັນວາ ປີ 2021 ນີ້ຕາມແຜນ ການແນ່ນອນ.

แชร์