ລະມາມຈະໃຫ້ຄອບຄົວທຸກຍາກຕ່ຳກວ່າ 5% ດຽວນີ້ມີ 600 ກວ່າຄອບຄົບ

ເມືອງລະມາມແຂວງເຊກອງໄດ້ ວາງຄາດໝາຍການພັດທະນາຊົນນະບົດ ແລະລົບລ້າງຄວາມທຸກຍາກໃນປີ 2019 ໃຫ້ຫຼຸດລົງຕື່ມຈາກບ້ານທຸກຍາກ 4 ບ້ານຊຶ່ງກວມເອົາ 9,3% ຂອງບ້ານທັງໝົດທົ່ວເມືອງໃຫ້ເຫຼືອພຽງ 4% ແລະລົບລ້າງຄອບຄົວທຸກຍາກໃຫ້ຫຼຸດລົງເຫຼືອຕໍ່າກວ່າ 5% ຈາກຄອບຄົວທຸກຍາກ 7,9% ໃນປີ 2018.

  ຕາມການລາຍງານຂອງ ທ່ານ ນາງ ຄໍາເສັງ ທຸມມະວົງສາ ຮອງເຈົ້າເມືອງໆລະມາມ ໃຫ້ຮູ້ວ່າ: ເມືອງລະມາມມີເນື້ອ ທີ່ທັງໝົດ 193 ແສນເຮັກຕາ, ເປັນເມືອງໜຶ່ງຂອງແຂວງເຊກອງທີ່ມີຄວາມອຸດົມສົມບູນໄປດ້ວຍຊັບພະຍາກອນແຮ່ທາດເປັນຕົ້ນ: ທອງ, ຖ່ານຫີນ, ແຮ່ຄໍາຕົກຂ້ອນ ແລະແມ່ນໍ້າຫຼາຍສາຍທີ່ສາມາດສ້າງເປັນເຂື່ອນໄຟຟ້ານໍ້າຕົກຊຶ່ງພາຍໃນເມືອງປະກອບມີທັງໝົດ 43 ບ້ານ 6,3 ພັນຫຼັງຄາເຮືອນ 7,8 ພັນຄອບຄົວ, ມີພົນລະເມືອງທັງໝົດ 38 ,1 ພັນຄົນ ຊຶ່ງປະກອບດ້ວຍຫຼາຍຊົນເຜົ່າໂດຍການດໍາລົງຊີວິດຂອງປະຊາຊົນສ່ວນໃຫຍ່ແມ່ນຢຶດຖືອາຊີບປູກຝັງ-ລ້ຽງສັດ, ຮອງມາແມ່ນການຄ້າ-ຂາຍ, ປະ ຈຸບັນທົ່ວເມືອງມີບ້ານທຸກຍາກ 4 ບ້ານ ກວມເອົາ 9,3%, ມີຄອບຄົວທຸກຍາກ 625 ຄອບຄົວກວມເອົາ 7,9% ຂອງຄອບຄົວທັງໝົດໃນທົ່ວເມືອງ.

  ແນວໃດກໍດີໃນປີ 2019 ນີ້ ເມືອງຈະສືບຕໍ່ສຸມໃສ່ແກ້ໄຂຄວາມທຸກຍາກໃຫ້ປະຊາຊົນໃນນີ້ສູ້ຊົນລົບລ້າງບ້ານທຸກຍາກໃຫ້ຫຼຸດລົງເຫຼືອພຽງ 2 ບ້ານ ກວມເອົາ 4% ຂອງບ້ານທັງໝົດ ແລະ ລົບລ້າງຄອບຄົວທຸກຍາກໃຫ້ຫຼຸດລົງຍັງເຫຼືອຕໍ່າກວ່າ 5% ຂອງຄອບຄົວທັງໝົດ; ພ້ອມນັ້ນກໍຍັງຈະສ້າງທຸກເງື່ອນໄຂເພື່ອສ້າງບ້ານສາມສ້າງບ້ານໂພນ ແລະ ບ້ານຈຸດສຸມ (ຕະນຶມ) ໃຫ້ກາຍເປັນຕົວເມືອງນ້ອຍຂອງຊົນນະບົດ, ສູ້ຊົນສ້າງບ້ານພັດທະນາໃຫ້ໄດ້ທັງໝົດ 32 ບ້ານ ກວມເອົາ 74,41% ຂອງບ້ານທັງໝົດ ແລະສ້າງຄອບຄົວພັດທະນາໃຫ້ກວມເອົາ 93,65% ຂອງຄອບຄົວທັງໝົດທົ່ວເມືອງ.

ທ່ານຮອງເຈົ້າເມືອງໆລະມາມກ່າວວ່າ: ໃນປີ 2018 ຜ່ານມາເມືອງລະມາມແມ່ນໄດ້ສຸມໃສ່ແກ້ໄຂຄວາມທຸກຍາກຂອງປະຊາຊົນດ້ວຍຫຼາຍຮູບການ, ມີແຜນ ການ, ໂຄງການ ແລະຈຸດສຸມຢ່າງ ຈະແຈ້ງ ໂດຍຖືເອົາຫົວໜ່ວຍຄອບຄົວ ແລະບ້ານເປົ້າໝາຍຈຸດສຸມໃນການແກ້ໄຂຄວາມທຸກຍາກຊຶ່ງໃນສຸມທຶນຮອນເຂົ້າໃສ່ໃນການກໍ່ສ້າງ, ຂະຫຍາຍພື້ນຖານໂຄງລ່າງຮັບໃຊ້ການຜະລິດ, ຊຸກຍູ້ສົ່ງເສີມ ແລະຕິດຕາມກວດກາການປ່ອຍສິນເຊື່ອຊົນນະບົດເປັນຕົ້ນແມ່ນທະນາຄາ ນນະໂຍບາຍ ແລະກອງທຶນພັດທະນາບ້ານຕ່າງໆ.

ຂ່າວ: ສັນຍາ

แชร์