ຄະນະສົງວັດນາໄຊ ຮ່ວມໃຈບໍລິຈາກເລືອດຊ່ວຍເຫຼືອສັງຄົມ

  ເມື່ອວັນທີ 28 ກັນຍາຜ່ານມາ ຄະນະສົງວັດນາໄຊ ນຳໂດຍ ພຣະອາຈານ ພຸດທະສອນ ອ່ອນວົງສາ ພ້ອມດ້ວຍພຣະສົງ, ສາມະເນນພາຍໃນວັດນາໄຊເມືອງໄຊເສດຖານະຄອນຫຼວງວຽງຈັນ ພ້ອມໃຈກັນປະກອບສ່ວນບໍລິຈາກເລືອດເພື່ອຊ່ວຍເຫຼືອສັງຄົມຈຳນວນ 9 ອົງ.

  ພຣະອາຈານ ພຸດທະສອນ ອ່ອນວົງສາກ່າວວ່າ: ເນື່ອງຈາກການແຜ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ການບໍລິຈາກເລືອດຂອງອອກຕົນຍາດໂຍມມີຄວາມຫຍຸ້ງຍາກໃນການເດີນທາງເພາະຢູ່ໃນໄລຍະປິດເມືອງປະຕິບັດມາດຕະການທີ່ທາງຄະນະສະເພາະກິດວາງອອກການບໍລິຈາກເລືອດເພື່ອໃຫ້ຄົນເຈັບທີ່ນອນປິ່ນປົວຢູ່ຕາມໂຮງໝໍແຫ່ງຕ່າງໆ ເພື່ອຕໍ່ຊີວິດຈາກຜູ້ໃຈບຸນທັງຫຼາຍທີ່ຈະສະຫຼະເລືອດຂອງຕົນເພື່ອຊ່ວຍເຫຼືອພວກເຂົາເຫຼົ່ານັ້ນເພາະເລືອດບໍ່ມີຂາຍຄືກັບຊີ້ນ, ປາພືດຜັກ, ທົ່ວໄປຕາມຕະຫຼາດແຕ່ຈະໄດ້ມາຈາກການບໍລິຈາກໆຄົນສູ່ຄົນເທົ່ານັ້ນ.

  ໂອກາດນີ້ຂໍເຊີນຊວນອອກຕົນຍາດໂຍມຊາວພຸດທະບໍລິສັດທັງຫຼາຍມາຮ່ວມບໍລິຈາກເລືອດຊ່ວຍເຫຼືອເພື່ອນມະນຸດດ້ວຍກັນໃນວິກິດການຂາດເລືອດໃນຄັ້ງນີ້ເພື່ອ ອະນິສົງ ແລະຜົນບຸນສ້າງຮ່ວມກັນ.

----

ໜັງສືພິມ ເສດຖະກິດ-ສັງຄົມ

แชร์