ໂຄງການສ້ອມແປງເສັ້ນທາງ ເລກທີ 3604 ເມືອງຊຽງຮ່ອນ ຈະໃຫ້ສໍາເລັດໃນປີ 2022

 ໃນວັນທີ 30 ກັນຍາ 2021ນີ້ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີພ້ອມດ້ວຍຄະນະໄດ້ລົງຕິດຕາມ ແລະຊຸກຍູ້ໂຄງການຟື້ນຟູເສັ້ນທາງເລກທີ 3604 Km 0+000 ບ້ານຫົວເມືອງ ຫາ Km23+871 ບ້ານປາກເປັດ ເມືອງຊຽງຮ່ອນ ໂດຍການຕ້ອນຮັບ ແລະນໍາພາລົງເບິ່ງຕົວຈິງຂອງທ່ານ ກົງທອງ ສິດທິໄຊ ວ່າການເຈົ້າເມືອງພ້ອມດ້ວຍການນໍາຫຼັກແຫຼ່ງຂອງເມືອງ.
​   ໂຄງການຟື້ນຟູເສັ້ນທາງດັ່ງກ່າວ, ມີຄວາມຍາວທັງໝົດ 34 ກິໂລແມັດ, ໜ້າທາງກວ້າງ 5 ແມັດ, ເສັ້ນທາງດັ່ງກ່າວແມ່ນໄດ້ຕັດຜ່ານພູມມີປະເທດ, ບາງສ່ວນຜ່ານເຂດຫ້ວຍເລິກ, ເຫວຊັນ, ເຂດເນີນສູງກວມເອົາເຂດພູດອຍ, ໂດຍຜ່ານ 6 ບ້ານຄື: ບ້ານຫ້ວຍເມືອງ, ບ້ານໂຮມໄຊເໜືອ, ບ້ານໂຮມໄຊກາງ, ບ້ານປາງສາ ແລະ ບ້ານດອນປຸ່ງ. ການສ້ອມແປງມາຮອດປະຈຸບັນແມ່ນມີຄວາມສໍາເລັດແລ້ວ 35% ແລະ ຈະໃຫ້ສໍາເລັດໃນເດືອນພຶດສະພາ 2022 ຊຶ່ງມີມູນຄ່າການກໍ່ສ້າງ 15,64 ຕື້ກວ່າກີບ, ໂດຍແມ່ນທຶນກູ້ຢືມຈາກທະນາຄານໂລກ. ໂຄງການດັ່ງກ່າວໄດ້ເລີ່ມຈັດຕັ້ງປະຕິບັດມາແຕ່ຕົ້ນເດືອນກໍລະກົດ 2021 ເປັນຕົ້ນມາໂດຍແມ່ນບໍລິສັດ ໄຊຍາກໍ່ສ້າງ-ຂົວທາງ ຈໍາກັດ ເປັນຜູ້ຮັບເໝົາກໍ່ສ້າງ.

   ຈາກນັ້ນ, ທ່ານເຈົ້າແຂວງພ້ອມທີມງານກໍໄດ້ຢ້ຽມຢາມ ແລະພົບປະຄູ-ອາຈານ ແລະນັກຮຽນຢູ່ໂຮງຮຽນປະຖົມ-ມັດທະຍົມຕົ້ນ ແລະພໍ່ແມ່ປະຊາຊົນບ້ານຫ້ວຍຄູນ.
ໂອກາດດັ່ງກ່າວ, ທ່ານ ພົງສະຫວັນ ສິດທະວົງ ກໍໄດ້ຮຽກຮ້ອງໃຫ້ອໍານາດການປົກຄອງບ້ານຈົ່ງສຶກສາອົບຮົມລູກຫຼານໃຫ້ຫ່າງໄກຈາກຢາເສບຕິດ, ສົ່ງເສີມໃຫ້ໄດ້ຮຽນໜັງສື, ຫຼີກລ່ຽງການປະລະການຮຽນ, ສືບຕໍ່ສົ່ງເສີມປະຊາຊົນປູກພືດເປັນສິນຄ້າໃຫ້ຫຼາຍຂຶ້ນເພື່ອເປັນສິນຄ້າ ແລະຕິດພັນກັບເຕັກນິກໃໝ່ເພື່ອເຮັດ​ໃຫ້ປະຊາຊົນມີລາຍຮັບເພີ່ມຂຶ້ນ.


ຂ່າວ-ພາບ: ອຸ່ນເຮືອນ ໂພທິລັກ

แชร์