ບໍ່ແກ້ວ ໂຈະການນໍາເຂົ້າແຮງງານພາຍໃນ ແລະຕ່າງປະເທດ

   ບໍ່ແກ້ວ ເປັນອີກແຂວງຫນຶ່ງໃນ ສປປ ລາວ ທີ່ມີການແຜ່ລະບາດຂອງເຊື້ອພະຍາດໂຄວິດ-19 ເປັນຈໍານວນຫລາຍ ແລະມີທ່າອ່ຽງວ່າຈະເພີ່ມອອກໄປວົງກວ້າງໂດຍສະເພາະແມ່ນຢູ່ເມືອງຕົ້ນເຜິ້ງ, ດັ່ງນັ້ນແຂວງບໍ່ແກ້ວຈຶ່ງຕ້ອງຈຳເປັນວາງມາດຕະການງານເຂັ້ມງວດຂຶ້ນໂດຍບໍ່ຮັບແຮງງານຕ່າງຖິ່ນ ແລະຕ່າງປະເທດເຂົ້າແຂວງເປັນການຊົ່ວຄາວ.

   ແຂວງບໍ່ແກ້ວຈຶ່ງອອກແຈ້ງການ ເລກທີ 1121/ຫວຂ.ບກ ລົງວັນທີ 29 ກັນຍາ 2021 ໂດຍໃຫ້ໂຈະຊົ່ວຄາວການອະນຸຍາດນໍາເຂົ້າແຮງງານພາຍໃນ ແລະຕ່າງປະເທດເຂົ້າມາແຂວງບໍ່ແກ້ວທັງນີ້, ກໍ່ເພື່ອສືບຕໍ່ປະຕິບັດມາດຕະການປ້ອງກັນ,ຄວບຄຸມ ແລະສະກັດກັ້ນການລະບາດຂອງພະຍາດ COVID-19 ຢູ່ແຂວງບໍ່ແກ້ວ ຫ້ມີຄວາມເຂັ້ມງວດ.

   ແຈ້ງການລະບຸວ່າ: ຕາມຜົນການປະເມີນສະພາບການລະບາດຂອງພະຍາດ COVID-19 ຢູ່ແຂວງບໍ່ແກ້ວໄດ້ສືບຕໍ່ແຜ່ລະບາດໃນວົງກວ້າງໂດຍສະເພາະແມ່ນຢູ່ເມືອງຕົ້ນເຜິ້ງ ເຊິ່ງມາຮອດປະຈຸບັນແມ່ນມີຜູ້ຕິດເຊື້ອໂຄວິດ-19 ເພີ່ມຂຶ້ນ, ສະນັ້ນເພື່ອປະຕິບັດມາດຕະການປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ໃຫ້ສືບຕໍ່ປະຕິບັດດັ່ງນີ້:
1. ໃຫ້ບັນດາບໍລິສັດ, ວິສາຫະກິດ, ຜູ້ປະກອບການ, ຫົວຫນ່ວຍແຮງງານ ແລະໂຄງການລົງທຶນຕ່າງໆ ໂຈະຊົ່ວຄາວກ່ຽວກັບການສະເຫນີນໍາເຂົ້າແຮງງານລາວ ແລະ ຕ່າງປະເທດເພື່ອເຂົ້າມາເຮັດວຽກຢູ່ແຂວງບໍ່ແກ້ວ.

2. ບໍລິສັດ, ໂຄງການລົງທຶນຕ່າງໆ ທີ່ໄດ້ຮັບການອະນຸມັດນໍາເຂົ້າແຮງງານ (ໂກຕ້າ) ກໍໃຫ້ໂຈະການນໍາເຂົ້າແຮງງານຊົ່ວຄາວ.
3. ມອບໃຫ້ເຈົ້າຫນ້າທີ່, ຂະແຫນງການທີ່ກ່ຽວຂ້ອງທີ່ປະຈໍາຢູ່ແຕ່ລະດ່ານໃນການນໍາເຂົ້າແຮງງານລາວ ແລະຕ່າງປະເທດໃຫ້ມີການກວດກາເຄັ່ງຂັດຢ່າງລະອຽດ ແລະເຂັ້ມງວດ, ກໍລະນີມີແຮງງານຈະເຂົ້າມາແຂວງບໍ່ແກ້ວໃຫ້ພັກດັນກັບຄືນ.
4. ພາຍຫຼັງສະພາບການແຜ່ລະບາດມີການຜ່ອນຄາຍສາມາດຄວບຄຸມ ແລະແກ້ໄຂການລະບາດຂອງເຊື້ອພະຍາໂຄວິດ-19 ຢູ່ໃນສະພາບປົກກະຕິແລ້ວຫ້ອງວ່າການແຂວງບໍ່ແກ້ວ ຈຶ່ງແຈ້ງໃຫ້ຊາບຕື່ມພາຍຫຼັງ.

แชร์