ແມ່ ແລະເດັກກ່ອນໄວຮຽນ ຢູ່ເມືອງສະຫນາມໄຊໄດ້ຮັບເງິນຈາກໂຄງການ MECG

 ກະຊວງແຮງງານ ແລະສະຫວັດດີການສັງຄົມ (ກຊຮສສ), ພະແນກແຮງງານ ແລະສະຫວັດດີການສັງຄົມແຂວງອັດຕະປື ແລະບໍລິສັດ Star Fintech (ບໍລິສັດຍ່ອຍຂອງບໍລິສັດ Star Telecom) ໄດ້ເລີ່ມຕົ້ນໂອນເງິນສົດເປັນຄັ້ງທໍາອິດໃຫ້ແກ່ບັນດາຜູ້ຮັບຜົນປະໂຫຍດພາຍໃຕ້ຂໍ້ລິເລີ່ມການຊ່ວຍເຫຼືອລ້າໃຫ້ແກ່ແມ່ ແລະ ເດັກກ່ອນໄວຮຽນ (MECG) ຢູ່ເມືອງສະໜາມໄຊ, ແຂວງອັດຕະປື ໃນວັນທີ 12 ສິງຫາ 2021 ຊຶ່ງມີຜູ້ໄດ້ຮັບຜົນປະໂຫຍດທັງໝົດ 982 ຄົນໃນ 46 ບ້ານຂອງເມືອງສະໜາມໄຊທີ່ໄດ້ເຂົ້າຮ່ວມໂຄງການ MECG ຊຶ່ງເປັນການທົດລອງໂອນເງິນສົດໃຫ້ແກ່ແມ່ມານ ແລະ ເດັກກ່ອນໄວຮຽນໂດຍມີຈຸດປະສົງເພື່ອປັບປຸງການໃຫ້ວັກຊີນກັນພະຍາດ ແລະ ການເຂົ້າເຖິງການຝາກທ້ອງ ແລະ ການບໍລິການຮັກສາສຸຂະພາບຫຼັງເກີດລູກພ້ອມທັງການບໍລິການປົກປ້ອງເດັກ, ລວມທັງແມ່ມານ 529 ຄົນ ແລະ ເດັກ 453 ຄົນ ທີ່ມີອາຍຸຕໍ່າກວ່າ 6 ເດືອນ.

  ມາຮອດປະຈຸບັນນີ້, ການຈ່າຍເງິນແມ່ນຜ່ານວິທີການຈ່າຍເງິນສົດເຖິງປະຕູເຮືອນໃນ 26 ບ້ານ ແລະມີຜູ້ໄດ້ຮັບຜົນປະໂຫຍດ 192 ຄົນຊຶ່ງໄດ້ກວມເອົາປະມານ 30% ຂອງການຈ່າຍເງິນແລ້ວ. ການຈ່າຍເງິນຄັ້ງທໍາອິດນີ້ຈະສໍາເລັດໃນບໍ່ເທົ່າໃດອາທິດຕໍ່ໜ້ານີ້ ແລະຫຼັງຈາກນັ້ນຈະໄດ້ເລີ່ມຕົ້ນຈ່າຍເງິນຜ່ານແອັບການຈ່າຍເງິນທາງອີເລັກໂທຣນິກ “U-Money”.

   ທ່ານ ວົງຄໍາ ພັນທະນຸວົງ ຫົວໜ້າກົມສະຫວັດດີການສັງຄົມຂອງ ກຊຮສສ ກ່າວວ່າ: “ລັດຖະບານແຫ່ງ ສປປ ລາວ ຮັບຮູ້ວ່າການປົກປ້ອງທາງສັງຄົມມີບົດບາດສໍາຄັນໃນການຫຼຸດຜ່ອນຄວາມທຸກຍາກ ແລະຄວາມບໍ່ສະເໝີພາບໃນຂະນະດຽວກັນກໍສົ່ງເສີມການພັດທະນາເສດຖະກິດ-ສັງຄົມ ແລະ ການຢູ່ຮ່ວມກັນຂອງສັງຄົມ. ເງິນສົດຢູ່ໃນມືຂອງແມ່ມານ ແລະ ແມ່ທີ່ພວມໃຫ້ນົມລູກຈະຊ່ວຍປັບປຸງໝາກຜົນດ້ານສຸຂະພາບ ແລະ ໂພຊະນາການຢູ່ໃນບັນດາເມືອງເປົ້າໝາຍ. ຍິ່ງໄປກວ່ານັ້ນ, ແຜນງານດັ່ງກ່າວບໍ່ພຽງແຕ່ເປັນຜົນປະໂຫຍດສະເພາະຕໍ່ເດັກເທົ່ານັ້ນ, ແຕ່ຍັງເປັນຜົນປະໂຫຍດແບບຂະຫຍາຍເປັນວົງກ້ວາງໄປເຖິງຄອບຄົວ, ຊຸມຊົນ ແລະ ປະຊາຊົນໃນທົ່ວປະເທດອີກດ້ວຍ.”

  ບັນດາຜູ້ໄດ້ຮັບຜົນປະໂຫຍດຈາກຂໍ້ລິເລີ່ມດັ່ງກ່າວຈະໄດ້ຮັບຜົນປະໂຫຍດໂດຍກົງເປັນລາຍເດືອນເດືອນລະ 150,000 ກີບ ຊຶ່ງເປັນການຈ່າຍເງິນທຸກ 2 ເດືອນເປັນຈໍານວນ 300,000 ກີບ ຜ່ານ U-Money ແລະວິທີການນໍາສົ່ງເງິນສົດເຖິງປະຕູເຮືອນໂດຍ Star Fintech. ຂັ້ນຕອນດັ່ງກ່າວຍັງອີງໃສ່ລະບົບຄຸ້ມຄອງຂໍ້ມູນຂ່າວສານທາງຄອມພິວເຕີ (MIS) ເພື່ອຮັບປະກັນໃຫ້ເຖິງເປົ້າໝາຍທີ່ຖືກຕ້ອງ ແລະການຈ່າຍເງິນສົດໃຫ້ທັນເວລາ.

   ໄດ້ຈັດຕັ້ງປະຕິບັດການທົດລອງ MECG ໃນທຸກບ້ານຂອງເມືອງສະໜາມໄຊ ແລະເມືອງພູວົງຂອງແຂວງອັດຕະປື, ຄຽງຄູ່ກັບເມືອງນອງຂອງແຂວງສະຫວັນນະເຂດ. ຜ່ານການບໍລິການແບບເຄື່ອນທີ່ຂອງພະນັກງານສາທາລະນະສຸກ ແລະການໄປຢ້ຽມຢາມເປັນປົກກະຕິໂດຍອົງການພາກລັດໃນທ້ອງຖິ່ນເຊັ່ນ: ສະຫະພັນແມ່ຍິງຂັ້ນບ້ານ (ສຍລບ) ແລະຕາໜ່າງປົກປ້ອງເດັກ (CPN), ຈະໄດ້ລະດົມຊຸກຍູ້ໃຫ້ບັນດາຜູ້ໄດ້ຮັບຜົນປະໂຫຍດເຂົ້າເຖິງການບໍລິການເພື່ອຮັບປະກັນການນໍາໃຊ້ເງິນສົດໃຫ້ດີພາຍໃຕ້ໂຄງການນີ້.

   ໂຄງການທົດລອງ MECG ເປັນສ່ວນໜຶ່ງຂອງໂຄງການຮ່ວມກັນຂອງອົງການສະຫະປະຊາຊາດ (UNJP) ທີ່ເອີ້ນວ່າ: “ພວກເຮົາພ້ອມກັນກ້າວໄປ: ສ້າງລະບົບປົກປ້ອງສັງຄົມຂັ້ນພື້ນຖານໃນ ສປປ ລາວ” ຊຶ່ງເປັນຂໍ້ລິເລີ່ມຮ່ວມກັນລະຫວ່າງອົງການຢູນີ ເຊັບ, ອົງການແຮງງານສາກົນ (ILO) ແລະອົງການສະຫະປະຊາຊາດກອງທຶນເພື່ອພັດທະນາທຶນ (UNCDF). ໂຄງການຮ່ວມມືກັນນີ້ມີຈຸດປະສົງເພື່ອສ້າງຂີດຄວາມສາມາດຂອງລັດຖະບານແຫ່ງ ສປປ ລາວ ໃນການວາງແຜນການ, ການຄຸ້ມຄອງ ແລະການຈັດຕັ້ງປະຕິບັດຍຸດທະສາດການປົກປ້ອງສັງຄົມແຫ່ງຊາດ (NSPS) ທີ່ໄດ້ລົງນາມເຊັນໃນເດືອນເມສາ ປີ 2020 ຊຶ່ງເປັນແຜນທີ່ເສັ້ນທາງເພື່ອພັດທະນາລະບົບການປົກປ້ອງທາງສັງຄົມ, ຊຶ່ງມີ MECG ເປັນໂຄງການຕົ້ນຕໍພາຍໃນຍຸດທະສາດນີ້.

   ການຈັດຕັ້ງປະຕິບັດໂຄງການຮ່ວມກັນຂອງອົງການສະຫະປະຊາຊາດ (UNJP) ນຳພາໂດຍ ກຊຮສສ ດ້ວຍການຮ່ວມມືກັບບັນດາກະຊວງທີ່ກ່ຽວຂ້ອງ, ອຳນາດການປົກຄອງຂັ້ນແຂວງ ແລະຂັ້ນເມືອງຂອງບັນດາເມືອງທົດລອງ ແລະອົງການສະຫະປະຊາຊາດປະຈຳ ສປປ ລາວ. ໂຄງການດັ່ງກ່າວຈະໄດ້ຈັດຕັ້ງປະຕິບັດຕັ້ງແຕ່ເດືອນມັງກອນ ປີ 2020 ເຖິງເດືອນມີນາ ປີ 2022.

   ແຜນງານດັ່ງກ່າວໄດ້ຮັບການສະໜັບສະໜູນທຶນຈາກກະຊວງການຕ່າງປະເທດ ແລະການຄ້າຕ່າງປະເທດຂອງອົດສະຕຣາລີ (DFAT) ແລະກອງທຶນຮ່ວມກັນຂອງ SDG ກ່ຽວກັບການປົກປ້ອງທາງສັງຄົມ, ໂດຍມີ ກຊຮສສ ເປັນຜູ້ນຳພາ ແລະ ມີການປະສານງານໃນການຈັດຕັ້ງປະຕິບັດທັງໃນຂັ້ນສູນກາງ ແລະຂັ້ນທ້ອງຖິ່ນ, ໂດຍມີການສະໜັບສະໜູນດ້ານວິຊາການຈາກອົງການຢູນີເຊັບ, ປະຈໍາ ສປປ ລາວ.

แชร์