ວັກແຊງປ້ອງກັນໂຄວິດແບບຕິດແປະ 3 ມິຕິ

  ທິມນັກວິໄຈວັກແຊງປ້ອງກັນໂຄວິດ-19 ຈາກອາເມລິກາຄິດຄົ້ນວັກແຊງ ຮູບແບບແຜ່ນຕິດແປະ 3 ມິຕິເພີ່ມຄວາມພຸ້ມກັນເຖິງ 50 ເທົ່າ.

  ຕາມຂ່າວຕ່າງປະເທດລາຍງານວ່າ ທິມນັກວິໄຈຈາກມະຫາວິທະຍາໄລສະແຕນຟອດ ແລະນໍແຄໂຣໄລນາຂອງອາເມລິກາໄດ້ພັດທະນາການໃຫ້ວັກແຊງປ້ອງກັນໂຄວິດ-19 ໃນຮູບແບບແຜ່ນຕິດແປະ 3 ມິຕິ ທີ່ວັກແຊງສາມາດຊືມເຂົ້າຮ່າງກາຍໄດ້ພຽງແຕ່ຕິດກັບຜີວໜັງໂດຍທິມວິໄຈໄດ້ເຮັດວຽກຮ່ວມກັບບໍລິສັດໄຟເຊີ ແລະໂມເດີນາເພື່ອທົດລອງວັກແຊງໂຄວິດ-19 ຊະນິດ mRNA ,ສາດສະດາຈານ ໂຈເຊບ ເດຊິມອນ ຫົວໜ້າທິມວິໄຈເປີດເຜີຍວ່າ ຈາກການທົດລອງພົບວ່າ ສ້າງການຕອບສະໜອງທາງພູມຄຸ້ມກັນໄດ້ດີກວ່າວັກແຊງຊະນິດສັກເຖິງ 50 ເທົ່າ ຫຼັງຈາກເປີດເຜີຍຜົນການທົດລອງສັດກ່ອນໜ້ານີ້ວ່າ ສາມາດສ້າງພູມຄຸ້ມກັນຫຼາຍກວ່າວັກແຊງແບບສັກເຖິງ 10 ເທົ່າ ຈາກບົດຄວາມຕີພີ່ມໃນວາລະສານ Proceedings of the National Academy of Sciences ໃນເດືອນສິງຫາທີ່ຜ່ານມາລະບຸວ່າ ແຜ່ນຕິດແປະໂພລີເມີມີຂະໜາດ 1 ຊັງຕີແມັດ ແລະມີໄມໂຄນິດເດິລທີ່ພິມ 3 ມິຕິ 100 ອັນ ເພື່ອສົ່ງວັກແຊງໃຫ້ຊືມເຂົ້າຜີວໜັງ.

  ຖ້າຫາກສາມາດພັດທະນາວັກແຊງດັ່ງກ່າວໄດ້ສຳເລັດນອກຈາກຈະສະດວກຕໍ່ການຮັບວັກແຊງຂອງປະຊາຊົນແລ້ວຍັງສະດວກຕໍ່ການຂົນສົ່ງ ແລະເຮັດໃຫ້ທົ່ວໂລກໄດ້ຮັບວັກແຊງໄດ້ໄວຂຶ້ນອີກດ້ວຍເນື່ອງຈາກວັກແຊງຫຼາຍຊະນິດທີ່ມີຢູ່ໃນຂະນະນີ້ຕ້ອງຈັດເກັບໃນອຸນະພູມຕິດລົບ.

-----

ໜັງສືພິມ ເສດຖະກິດ-ສັງຄົມ

แชร์