ໂຮງໝໍມະໂຫສົດ ສາມາດຊີດສີແຍ່-ຍະ ເສັ້ນເລືອດຫົວໃຈ

ຂ່າວ: ຣັດສະໝີ ດວງສັດຈະ

   ຕອນແລງຂອງວັນທີ 29 ກັນຍາ 2021, ທ່ານ ດຣ ຄໍາແພງ ແກ້ວມະນີວົງ ຫົວໜ້າສູນຫົວໃຈເສັ້ນເລືອດລາວລຸກຊໍາບວກ, ຊ່ຽວຊານຊີດສີແຍ່-ຍະເສັ້ນເລືອດຫົວໃຈ ໂຮງໝໍມະໂຫສົດ (ຫ້ອງຊີດສີແຍ່-ຍະເສັ້ນເລືອດຫົວໃຈລາວ) ໄດ້ລາຍງານດ່ວນຜ່ານອອນລາຍມາຍັງຜູ້ສື່ຂ່າວພວກເຮົາໂດຍກ່າວວ່າ: ປະຈຸບັນ, ອາການກ່ຽວກັບເສັ້ນເລືອດຫົວໃຈແມ່ນເກີດຂຶ້ນຫຼາຍໃນສັງຄົມຂອງປະເທດເຮົາ ແລະຕ້ອງໄດ້ຮັບການປິ່ນປົວໂດຍດ່ວນເພື່ອກອບກູ້ເອົາຊີວິດຂອງຄົນເຈັບກັບຄືນມາໃຊ້ຊີວິດປົກກະຕິ.

    ທ່ານ ດຣ ຄໍາແພງ ແກ້ວມະນີວົງ ກ່າວຕື່ມວ່າ: ຫ້ອງແຍ່-ຍະເສັ້ນເລືອດຫົວໃຈໄດ້ຮັບການກໍ່ສ້າງຂຶ້ນໃນວັນທີ 15.05. 2015 ແລະສ້າງສໍາເລັດໃນວັນທີ 15. 06.2016 ດ້ວຍທຶນຂອງລັດຖະບານ, ສ່ວນບຸກຄົນ ແລະບໍລິສັດທີ່ໄດ້ໃຫ້ການຊຸກຍູ້ ແລະສະໜັບສະໜູນໂດຍສະເພາະແມ່ນທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີທີ່ໄດ້ຂົນຂວາຍແຫຼ່ງທຶນຈາກນັກທຸລະກິດຈໍານວນໜຶ່ງປະກອບສ່ວນເຂົ້າໃນການກໍ່ສ້າງຫ້ອງແຍ່-ຍະ ເສັ້ນເລືອດຫົວໃຈຊຶ່ງໄດ້ເລີ່ມຕົ້ນປະຕິບັດໃນວັນທີ 15. 07.2017 ແລະປະຕິບັດຕົວຈິງຕໍ່ເນື່ອງ ລຽນຕິດນັບແຕ່ໃນວັນທີ 18.08.2018 ເປັນຕົ້ນມາໄດ້ປະຕິບັດຕົວຈິງຈໍານວນຫຼາຍໂດຍໄດ້ຊີດສີ ແຍ່-ຍະ ເສັ້ນເລືອດຫົວໃຈໄດ້ທັງໝົດ 588 ຄົນ; ໃສ່ stent (ໃສ່ຄົດລວດ) ໄດ້ທັງໝົດ 225 ຄົນ; ຄົນເຈັບຕ່າງປະເທດທີ່ມາຮັບໃຊ້ບໍລິການລວມທັງໝົດ 12 ຄົນ; ໃສ່ຖ່ານກະຕຸ້ນຫົວໃຈ (pacemaker)ໄດ້ທັງ ໝົດ 38 ຄົນ.

  ກ່ຽວກັບອາການພະຍາດຫົວໃຈວາຍ (ເສັ້ນເລືອດ coronaire ອຸດຕັນ) ແມ່ນເຈັບໜ້າເອິກເບື້ອງຊ້າຍ, ເຈັບໜ້າເອິກແຮງຂຶ້ນບາດດຽວຄືມີແນວມາເຕັງໜ້າເອີກ, ເຈັບໜ້າເອິກລາມມາຫາແຂນຊ້າຍ, ຫາກ້ານຄໍ, ຫາຫູ ຫາຄາງກະໄຕຊ້າຍ, ເຈັບໜ້າເອິກເວລາພັກຜ່ອນ, ເຈັບໜ້າເອິກຫຼາຍກວ່າ>20ນາທີ, ເຈັບໜ້າເອິກອົມຢາໃສ່ກ້ອງລີ້ນຍະຫຼອດເລືອດຫົວໃຈບໍ່ເຊົາ. ປັດໃຈສ່ຽງພະຍາດຫົວໃຈວາຍ (ເສັ້ນເລືອດ coronaire ອຸດຕັນ)ຊຶ່ງມີປັດໃຈສ່ຽງທີ່ຄວບຄຸມບໍ່ໄດ້ໂດຍມີເພດ, ໄວ, ດ້ານກໍາມະພັນ; ປັດໃຈສ່ຽງທີ່ຄວບຄຸມໄດ້ແມ່ນຄວາມດັນເລືອດຂຶ້ນສູງ, ພະຍາດເບົາຫວນ, ໄຂມັນສູງໃນເລືອດ, ສູບຢາຫຼາຍ, ຕຸ້ຍ, ພວກບໍ່ອອກກໍາລັງກາຍ,ພວກມີຄວາມກົດດັນສູງ... ສາມາດແກ້ໄຂດ້ວຍຕົນເອງໂດຍຕ້ອງປັບປ່ຽນວິຖີຊີວິດຂອງຕົນເປັນຕົ້ນຖ້າເປັນເບົາຫວານກໍ່ຄວບຄຸມອາຫານ, ອອກກໍາລັງກາຍເຫຼົ່ານີ້ເປັນຕົ້ນ.

   ໃນໂອກາດດັ່ງກ່າວ, ທ່ານ ດຣ ຄໍາແພງ ແກ້ວມະນີວົງ ໄດ້ກ່າວວ່າ: ຜົນສໍາເລັດດັ່ງກ່າວໃນໄລຍະຜ່ານມາແມ່ນຍ້ອນໄດ້ຮັບການຊີ້ນໍາ-ນໍາພາ ຈາກຄະນະອໍານວຍການ, ຈາກບັນດາພະນັກງານວິຊາການຂອງຫ້ອງແຍ່-ຍະ ເສັ້ນເລືອດຫົວໃຈໂຮງໝໍມະໂຫສົດ ແລະສາມາດຍາດໄດ້ຜົນສໍາເລັດໃນການປິ່ນປົວການນໍາຂັ້ນສູງ, ພະນັກງານ, ທະຫານ, ຕໍາຫຼວດ ແລະປະຊາຊົນ ດ້ວຍດີສະເໝີມາ ແລະໄດ້ຮັບຄວາມໄວ້ວາງໃຈຈາກອົງການຈັດຕັ້ງພັກ, ລັດ ແລະພໍ່ແມ່ປະຊາຊົນລາວບັນດາ ເຜົ່າຊຶ່ງເປັນການຫຼຸດຜ່ອນຊັບສິນເງິນ, ຄໍາທັງໄດ້ຮັບການປິ່ນປົວຢູ່ກັບບ້ານເກີດເມືອງນອນ ແລະຮັບການເບິ່ງແຍງດູແລເປັນຢ່າງດີຈາກຄະນະແພດຄົນລາວ ແລະຫ້ອງຊີດສີແຍ່-ຍະ ເສັ້ນເລືອດຫົວໃຈລາວ, ສູນຫົວໃຈເສັ້ນເລືອດ, ໂຮງໝໍມະໂຫສົດຍິນດີຮັບໃຊ້ຕະຫຼອດ 24 ຊົ່ວໂມງ.

แชร์