ສະຫວັນ ຮັບເຄື່ອງຊ່ວຍເຫຼືອ ແລະກວດຫາເຊື້ອໂຄວິດ

  ທີ່ຫ້ອງວ່າການປົກຄອງແຂວງສະຫວັນນະເຂດ ໃນວັນທີ 28 ກັນຍາ 2021, ໄດ້ຈັດພິທີມອບ-ຮັບເຄື່ອງຊ່ວຍເຫຼືອຈາກອົງການພັດທະນາສາກົນປະເທດສະຫະລັດອາເມລິກາ ແລະເຄື່ອງກວດຫາເຊື້ອພະຍາດໂຄວິດ-19(PCR) ຈາກບໍລິສັດລ້ານຊ້າງມິເນໂຣນສ໌ລິມິເຕັດ ຊຶ່ງໃຫ້ກຽດຮັບເຄື່ອງຊ່ວຍເຫຼືອດັ່ງກ່າວໂດຍທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດທັງເປັນຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງຈາກນີ້ກໍ່ມີພະແນກການກົມກອງຈຳນວນໜຶ່ງ ແລະພາກສ່ວນກ່ຽວຂ້ອງເຂົ້າຮ່ວມນຳ.

   ສຳລັບເຄື່ອງຊ່ວຍເຫຼືອທີ່ໄດ້ມີການມອບ-ຮັບໃນຄັ້ງນີ້ປະກອບມີ: ອາຫານແຫ້ງ ແລະຊຸດອະນາໄມທີ່ຈຳເປັນໃນຊີວິດປະຈຳວັນ, ລວມມູນຄ່າທັງໝົດ 717,14 ລ້ານກີບ ເຊິ່ງໄດ້ຈາກການສະໜັບສະໜູນຂອງອົງການພັດທະນາສາກົນປະເທດສະຫະລັດອາເມລິກາໂດຍຜ່ານອົງການຊ່ວຍເຫຼືອເດັກສາກົນປະຈຳລາວຈຸດປະສົງກໍ່ເພື່ອຊ່ວຍໃຫ້ແຮງງານລາວທີ່ພວມກັກໂຕໃນສູນຕ່າງໆພາຍໃນແຂວງໃຫ້ເຂົ້າເຖິງອາຫານ ແລະເຄື່ອງຮັກສາອະນາໄມໃນຊີວິດປະຈຳວັນຢ່າງພຽງພໍເພື່ອສົ່ງເສີມການເຂົ້າເຖິງໂພຊະນາການ ແລະ ສຸຂະອະນາໄມທີ່ດີໃນໄລຍະການກັກໂຕ, ຕາງໜ້າມອບໂດຍທ່ານ ຄຳພວຍ ນໍທຸມມາວົງ ຫົວໜ້າສາຍງານປະຈຳແຂວງສະຫວັນນະເຂດອົງການຊ່ວຍເຫຼືອເດັກສາກົນຈາກນີ້ກໍ່ມີເຄື່ອງກວດຫາເຊື້ອພະຍາດໂຄວິດ-19 ທີ່ໄດ້ຈາກການປະກອບສ່ວນຂອງບໍລິສັດລ້ານຊ້າງມິເນໂຣນສ໌ ລິມິເຕັດ ຈຳນວນ 1 ເຄື່ອງ, ມູນຄ່າ 405 ລ້ານກີບ ຊຶ່ງຕາງໜ້າມອບໂດຍ ທ່ານ ທ່ອນແກ້ວ ພຸດທະໄກຍະລາດ ທີ່ປຶກສາບໍລິສັດລ້ານຊ້າງມິເນໂຣນສ໌ ລິມິເຕັດ ເພື່ອມອບໃຫ້ໂຮງໝໍແຂວງສະຫວັນນະເຂດເຮັດໃຫ້ມາຮອດປະຈຸບັນ, ແຂວງມີເຄື່ອງກວດຫາເຊື້ອພະຍາດໂຄວິດ (PCR) ທັງໝົດ 4 ເຄື່ອງ ແລະຄາດວ່າເຄື່ອງດັ່ງກ່າວຈະຖືກຕິດຕັ້ງ ແລະນຳໃຊ້ໃນທ້າຍອາທິດນີ.

   ໂອກາດນີ້, ທ່ານ ນາງ ຫຼິງທອງ ແສງຕາວັນ ກໍ່ໄດ້ຕາງໜ້າແຂວງສະຫວັນນະເຂດກ່າວສະແດງຄວາມຂອບໃຈຕໍ່ກັບການຊ່ວຍເຫຼືອຂອງທັງສອງພາກສ່ວນທີ່ເຫັນໄດ້ເຖິງຄວາມສຳຄັນ ແລະຈຳເປັນໃນວຽກງານປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດ ໂຄວິດ-19 ພາຍໃນແຂວງພ້ອມນີ້ກໍ່ໄດ້ມອບໃບຍ້ອງຍໍທ່ານເຈົ້າແຂວງສະຫວັນນະເຂດໃຫ້ກັບສອງພາກສ່ວນດັ່ງກ່າວນຳອີກ.

แชร์