ສະພາປະຊາຊົນສະຫວັນປະກາດພະນັກງານ ຮັບອຸດໜູນບຳນານ

   ໃນວັນທີ 29 ກັນຍາ 2021 ທີ່ຫ້ອງປະຊຸມສະພາປະຊາຊົນ ແຂວງສະຫວັນນະເຂດ ໄດ້ຈັດພິທີປະກາດພະນັກງານນຳພາຄຸ້ມຄອງຂອງປະຊາຊົນແຂວງຊຸດທີ 1 ອອກຮັບອຸດໜູນບຳນານໂດຍໃຫ້ກຽດເຂົ້າຮ່ວມເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງປະທານສະພາປະຊາຊົນແຂວງ, ມີບັນດາທ່ານຄະນະປະຈຳພັກແຂວງ, ຄະນະປະຈໍາສະພາປະຊາຊົນແຂວງ, ພະນັກງານພາຍໃນສະພາປະຊາຊົນແຂວງເຂົ້າຮ່ວມ.

   ໃນພິທີ ທ່ານ ດວງຈັນ ແສນບຸດຕະລາດ ຮອງຫົວໜ້າພະແນກພາຍໃນແຂວງກໍ່ໄດ້ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດວ່າດ້ວຍການອະນຸມັດໃຫ້ພະ ນັກງານອອກພັກການ-ຮັບອຸດໜູນບຳນານສະບັບເລກທີ 1313, 1314, 1315, 1316, 1317/ຈຂ.ສຂ ຊຶ່ງຕົກລົງໃຫ້ທ່ານ ຫວັນຄຳ ອິນທິຈັກ ຄະນະປະຈໍາສະພາປະຊາຊົນແຂວງຊຸດທີ 1, ເລຂາທິການສະພາປະຊາຊົນແຂວງຊຸດທີ 1, ທ່ານ ບຸນເຕັມ ຊວງສາຍະວົງ ຄະນະປະຈໍາສະພາປະຊາຊົນ ແຂວງຊຸດທີ 1 ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ທ່ານ ພັທ ສົມພອນ ສຸທິສົມບັດ ຮອງປະທານຄະນະກຳມະການຍຸຕິທຳປ້ອງກັນຊາດ-ປ້ອງກັນຄວາມສະຫງົບ, ທ່ານ ນາງຄຳເພັງ ວິໄລທອງ ຮອງປະທານຄະນະກຳມະການຍຸຕິທໍາປ້ອງກັນຊາດ-ປ້ອງກັນ ຄວາມສະຫງົບ, ທ່ານ ສົມໃສ ຂຳໃຍມະນີ ຮອງປະທານຄະນະ ກຳມະການເສດຖະກິດແຜນການ ແລະການເງິນອອກຮັບອຸດໜູນບຳນານນັບແຕ່ວັນທີ 1 ກໍລະກົດ 2021 ເປັນຕົ້ນໄປ.

   ໂອກາດນີ້ທ່ານ ກົງແກ້ວ ມີວໍລະຈັກ ໄດ້ມອບເງິນນະໂຍບາຍພ້ອມດ້ວຍກະຕ່າຂອງຂວັນໃຫ້ບັນທ່ານທີ່ອອກພັກການຮັບອຸດໜູນບໍານານຢ່າງສົມກຽດ, ພິເສດກໍ່ໄດ້ມອບກະຕ່າຂອງຂວັນໃຫ້ທ່ານ ຄໍາເຜີຍ ຜັນທະຈອນ ປະທານຄະນະປະຈໍາສະພາປະຊາຊົນແຂວງຊຸດທີ 1, ປະທານສະພາປະຊາຊົນ ແຂວງຊຸດທີ 1, ພ້ອມທັງມີຄໍາເຫັນໂອ້ລົມ, ສະແດງຄວາມຊົມເຊີຍ ແລະຮູ້ບຸນຄຸນຕໍ່ຜົນງານທີ່ບັນດາທ່ານທີ່ໄດ້ຮັບອຸດໜູນບຳນານໃນຄັ້ງນີ້ທີ່ປະກອບສ່ວນດ້ານສະຕິປັນຍາ, ເຫື່ອແຮງຂອງຕົນເຂົ້າໃນພາ ລະກິດປົກປັກຮັກສາ ແລະສ້າງສາປະເທດຊາດເວົ້າລວມ, ເວົ້າສະເພາະແມ່ນການປະກອບສ່ວນເຂົ້າໃນການກໍ່ສ້າງ ແລະປັບປຸງສະພາປະຊາຊົນແຂວງຢ່າງມີຜົນສຳ ເລັດ ແລະຫຼ້ອນໜ້າທີ່ເປັນຢ່າງດີ, ເປັນຕົ້ນແມ່ນວຽກງານການສ້າງນິຕິກຳ, ການຕົກລົງບັນຫາສຳຄັນພື້ນຖານແຂວງ, ການຕິດຕາມກວດກາ ແລະວຽກງານອື່ນຂອງສະພາປະຊາຊົນແຂວງເຫັນວ່າໃນໄລຍະການຊີ້ນຳ-ນຳພາຂອງບັນດາທ່ານມີບາດກ້າວຂະຫຍາຍຕົວ ແລະມີການປ່ຽນແປງໃໝ່ທີ່ກ້າວໜ້າຢ່າງຮອບດ້ານ, ບັນດາຜົນ ງານ ແລະໄຊຊະນະດັ່ງກ່າວດັ່ງທີ່ບັນດາທ່ານຍາດມາໄດ້ນັ້ນປະກອບສ່ວນອັນໃຫຍ່ຫຼວງເຂົ້າໃນພາລະກິດ ແລະຜົນງານລວມຂອງແຂວງ, ທັງເປັນການສ້າງມູນເຊື້ອອັນດີງາມ ແລະຜົນງານທີ່ດີເດັ່ນໃຫ້ແກ່ພະນັກງານຮຸ່ນສືບທອດໄດ້ຄົ້ນຄວ້າຮໍ່າຮຽນ ແລະ ເສີມຂະຫຍາຍໃຫ້ໄດ້ຮັບໝາກຜົນສູງ ແລະ ກໍ່ເຊື່ອໝັ້ນວ່າບັນດາທ່ານທີ່ໄດ້ຮັບບຳນານໄປແລ້ວນັ້ນຈະສືບຕໍ່ເປັນເຈົ້າການຮ່ວມມືກັບອຳນາດການປົກຄອງບ້ານໃນການປະຕິບັດແນວທາງນະໂຍບາຍຂອງພັກ,ກົດໝາຍຂອງລັດ ແລະສ້າງສາເສດຖະກິດຄອບຄົວໃຫ້ມີຊີວິດການເປັນຢູ່ດີຂຶ້ນເທື່ອລະກ້າວ, ສືບຕໍ່ເປັນຫຼັກແຫຼ່ງແກ່ນສານ, ເປັນກໍາລັງແຮງສຶກສາອົບຮົມພະນັກງານຫຼັກແຫຼ່ງ, ລູກຫຼານປະຊາຊົນທີ່ຕົນສັງກັດຢູ່ຮາກຖານທ້ອງຖິ່ນເຮັດໃຫ້ເຂົາເຈົ້າກາຍເປັນພະນັກງານສືບທອດປ່ຽນແທນ, ພະນັກງານນຳພາຄຸ້ມຄອງ ແລະເປັນກຳລັງແຮງອັນສຳຄັນໃນການປະກອບສ່ວນເຂົ້າໃນພາລະກິດສ້າງສາພັດທະນາປະເທດຊາດໃນໄລຍະໃໝ່ດີຂຶ້ນເປັນກ້າວໆ, ພ້ອມນີ້ກໍ່ໄດ້ຮຽກຮ້ອງມາຍັງພະນັກງານການນຳຮຸ່ນສືບທອດໄດ້ສຶກສາບົດຮຽນ, ປະສົບການຂອງພວກເພິ່ນເພື່ອປັບປຸງແບບແຜນການຊີ້ນໍາ-ນໍາພາໃຫ້ມີຜົນສໍາເລັດໃນໜ້າທີ່ວຽກງານໃນຕໍ່ໜ້າ.

แชร์