ເຜີຍແຜ່ສື່ສັງຄົມອອນລາຍ ແລະການຫັນເປັນທັນສະໄໝຂອງລັດຖະບານ

ຂ່າວ: ທອງແກ້ວ ພອນມະລາ

ເມືອງຄອບແຂວງໄຊຍະບູລີໄດ້ຈັດກອງປະຊຸມເຜີຍແຜ່ສື່ສັງຄົມອອນລາຍ, ອາຊະຍາກໍາທາງໄຊເບີ ແລະການຫັນເປັນທັນສະໄໝຂອງລັດຖະບານໂດຍຈັດຂຶ້ນຢູ່ທີ່ສະໂມ ສອນເມືອງດັ່ງກ່າວໃນວັນທີ 27 ກັນຍາຜ່ານມາ, ເປັນປະທານຂອງທ່ານ ບຸນຊູ ວິໄລສັກ ຮອງຫົວໜ້າພະແນກເຕັກໂນໂລຊີ ແລະການສື່ສານ, ເປັນກຽດເຂົ້າຮ່ວມຂອງທ່ານ ບຸນຈັນ ເສດຈຳປາ ຮອງເຈົ້າເມືອງໆຄອບຜູ້ຊີ້ນໍາຂົງເຂດເສດຖະກິດ, ມີຫົວໜ້າຫ້ອງການ, ຮອງຫົວໜ້າຫ້ອງການ, ອົງການ, ກົມກອງ, ມີທີມງານຂອງ ແຂວງ ແລະວິຊາການບັນດາສຳນັກງານອົງການອ້ອມຂ້າງເມືອງ.

   ທ່ານ ບຸນຊູ ວິໄລສັກ ຮອງຫົວໜ້າພະແນກເຕັກໂນໂລຊີ ແລະການສື່ສານໃຫ້ກຽດກ່າວເປີດກອງປະຊຸມຢ່າງເປັນທາງການບັນດາຜູ້ເຂົ້າຮ່ວມກອງປະຊຸມຈະໄດ້ຮັບຮູ້ກ່ຽວກັບສື່ສັງຄົມອອນລາຍ, ການຫັນເປັນທັນສະໄໝຂອງລັດຖະບານ, ອາຊະຍາກຳທາງໄຊເບີ ແລະກົດ ໝາຍວ່າດ້ວຍການຕ້ານ ແລະສະກັດກັ້ນອາຊະຍາກຳທາງຄອມພິວເຕີ, ການເຜີຍແຜ່ເອກະສານດັ່ງກ່າວແມ່ນເພື່ອແນໃສ່ຄວາມຮູ້ພື້ນຖານກ່ຽວກັບວຽກງານເຕັກໂນໂລຊີ ແລະ ການສື່ສານຂໍ້ມູນຂ່າວສານພ້ອມກັບນິຕິກຳທີ່ກ່ຽວຂ້ອງຈຳນວນໜຶ່ງ.

  ພ້ອມດຽວກັນນີ້ຜູ້ເຂົ້າຮ່ວມກອງປະຊຸມຍັງໄດ້ຜັດປ່ຽນກັນເພື່ອປະກອບຄໍາຄິດຄໍາເຫັນຕໍ່ວຽກງານດັ່ງກ່າວເພື່ອເປັນແນວທາງໃນການຈັດຕັ້ງປະຕິບັດໃນຕໍ່ໜ້າ.

   ໃນຕອນທ້າຍຂອງກອງປະຊຸມ ທ່ານ ບຸນຈັນ ເສດຈຳປາ ໄດ້ສະແດງຍ້ອງຍໍຊົມເຊີຍຕໍ່ພະແນກການທີ່ກ່ຽວຂ້ອງໄດ້ນຳເອົາບົດຮຽນອັນໃໝ່ນຳມາເຜີຍແຜ່ໃນຄັ້ງນີ້ໄດ້ຮັບຜົນສຳເລັດເປັນຢ່າງດີ, ພ້ອມດຽວກັນນີ້ທ່ານໄດ້ຮຽກຮ້ອງມາຍັງຜູ້ເຂົ້າຮ່ວມກອງປະຊຸມໃນຄັ້ງນີ້ຈົ່ງນຳເອົາເນື້ອໃນບັນດາຈິດໃຈຂອງກອງປະຊຸມໄປຜັນຂະຫຍາຍ ເພື່ອເປັນບົດຮຽນນຳໄປໃຊ້ໃນວຽກງານຕົວຈິງຂອງຕົນຮັບຜິດຊອບໃຫ້ເກີດຜົນປະໂຫຍດສູງສຸດ,ຮັບປະກັນບໍ່ໃຫ້ເກີດມີຄວາມຜິດທາງດ້ານກົດໝາຍຕ່າງໆ ແລະສາມາດຮັບຮອງການເຊື່ອມໂຍງພາກພື້ນ ແລະສາກົນ.

• 30/09/2021