ປະທານປະເທດແນະນຳສະຫວັນນະເຂດ ແກ້ໄຂຄວາມທຸກຍາກປະຊາຊົນຫຼຸດ

  ໃນວັນທີ 8 ມີນາ 2019 ຢູ່ທີ່ຫ້ອງປະຊຸມໃຫຍ່ຫໍວັດທະນະທຳ ໄກສອນ ພົມວິຫານ ແຂວງສະຫວັນນະເຂດ, ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ໄດ້ເປັນກຽດພົບປະໂອ້ລົມກັບພະນັກງານການນຳຫຼັກແຫຼ່ງໃນທົ່ວແຂວງສະຫວັນນະເຂດ ຊຶ່ງມີທ່ານສັນຕິພາບ ພົມວິຫານ ເຈົ້າແຂວງສະຫວັນນະເຂດບັນດາທ່ານເຈົ້າເມືອງ, ຫົວໜ້າພະແນກການ, ຂະແໜງການອ້ອມຂ້າງແຂວງເຂົ້າຮ່ວມເປັນຈຳນວນຫຼວງຫຼາຍ.

 ຫຼັງຈາກຮັບຟັງລາຍງານສະພາບການພັດທະນາແຂວງໃນຜ່ານມາຈາກທ່ານເຈົ້າແຂວງສະຫວັນນະເຂດ ທ່ານ ບຸນຍັງ ວໍລະຈິດ ກໍໄດ້ມີຄຳເຫັນໂອ້ລົມຊຶ່ງກ່ອນອື່ນທ່ານໄດ້ສະແດງຄວາມຊົມເຊີຍຕໍ່ບັນດາຜົນສຳເລັດໃນການພັດທະນາເສດຖະກິດ-ສັງຄົມຢູ່ແຂວງສະຫວັນນະເຂດ ຊຶ່ງເຫັນວ່າມີຫຼາຍອັນພົ້ນເດັ່ນ ແລະເຕີ ບໃຫຍ່ຂະຫຍາຍຕົວຊຶ່ງແມ່ນໝາກຜົນຂອງການນຳພາຂອງພັກ ແລະລັດແຕ່ລະຂັ້ນໃນຜ່ານມາພ້ອມນີ້ກໍ່ໃຫ້ສືບຕໍ່ສຶກສາອົບຮົມການເມືອງແນວຄິດໃຫ້ພະ ນັກງານການນຳຫຼັກແຫຼ່ງ ແລະປະຊາຊົນບັນດາເຜົ່າ, ໃຫ້ມີຄວາມເຊື່ອໝັ້ນຕໍ່ແນວທາງຂອງພັກບໍ່ຫວັ່ນໄຫວຄອນແຄນຕໍ່ກົນອຸບາຍຫວັງມ້າງເພທຳລາຍຂອງສັດຕູ, ເຖິງແມ່ນສະພາບການຂອງໂລກຂອງ ພາກພື້ນຈະມີການຜັນແປ ແລະເປັນສິ່ງທ້າທາຍເປັນຕົ້ນການກໍ່ການຮ້າຍບັນຫາຂໍ້ຂັດແຍ່ງຂອງປະເທດມະຫາອຳນາດມັນກໍ່ໄດ້ສົ່ງຜົນກະທົບໂດຍກົງຕໍ່ປະເທດຊາດ  ແລະປະຊາຊົນເຮົາພວກສັດຕູຢູ່ນອກປະເທດສວຍໃຊ້ດ້ານອ່ອນ ແລະ ປາກົດການຫຍໍ້ທໍ້ເພື່ອຫັນປ່ຽນແນວຄິດສ້າງຄວາມແຕກແຍກລະຫວ່າງອຳນາດການປົກຄອງລັດ ແລະປະຊາຊົນລາວຂອງພວກເຮົາ.

   ດ້ານວຽກງານກໍ່ສ້າງພັກໄລຍະນີ້ເປັນໄລຍະທີ່ທົ່ວພັກທົ່ວປວງຊົນອອກແຮງແຂ່ງຂັນກັນສ້າງຂະບວນການເພື່ອຕ້ອນຮັບກອງປະຊຸມໃຫຍ່ອົງຄະນະພັກ 3 ຂັ້ນສະນັ້ນການກໍ່ສ້າງພັກ-ພະນັກງານຕ້ອງໄດ້ຕາມມາດຖານລະບຽບຂອງພັກເປັນແບບຢ່າງ ແລະສ້າງຄວາມໄວ້ເນື້ອເຊື່ອໃຈແກ່ມະຫາຊົນບໍ່ໃຊ້ອຳນາດຫາຜົນປະໂຫຍດມາໃສ່ຕົນເອງຕ້ອງສ້າງໃຫ້ໄດ້ຄຸນທາດການເມືອງທີ່ດີບໍ່ໃຫ້ມີແນວຄິດອະຄະຕິຄັບແຄບໃຫ້ເປັນທີ່ເພີ່ງຂອງປະຊາຊົນ, ພະນັກງານສະມາຊິກພັກ ທຸກສະຫາຍຕ້ອງມີຄວາມປອດໃສໜັກແໜ້ນ ແລະເຂັ້ມແຂງ, ບຸກຄົນໃດກະທຳຜິດຕໍ່ລະບຽບຂອງພັກກະທຳຜິດຕໍ່ກົດໝາຍຂອງລັດກໍ່ຕ້ອງມີຄວາມຈຳເປັນຕ້ອງລົງວິໄນໃນກອງປະຊຸມຂອງພັກທີ່ຈະມີຂຶ້ນໃນຕໍ່ໜ້ານີ້ຕ້ອງໄດ້ກວດຄືນໃຫ້ດີອົງປະກອບດ້ານບຸກຄະລາກອນຕ້ອງມີທັງຜູ້ສູງອາຍຸ, ປານກາງໜຸ່ມນ້ອຍມີທັງ ເພດຍິງເພດຊາຍ ແລະຊົນເຜົ່າ.

  ທາງດ້ານເສດຖະກິດສືບຕໍ່ສ້າງລາຍຮັບໃຫ້ໄດ້ຄາດໝາຍຂອງແຜນການວາງອອກກວດກາບັນດາຫົວໜ່ວຍເສດຖະກິດບັນດາໂຄງການລົງທຶນຂອງຕ່າງປະ ເທດຫົວໜ່ວຍເສດຖະກິດພາຍໃຫ້ມີຄວາມບໍລິສຸດໂປ່ງໃສຕໍ່ລະບຽບກົດໝາຍເຮັດພັນທະອາກອນຕໍ່ປະເທດຊາດການເກັບລາຍຮັບ ແລະຄຸ້ມຄອງລາຍຈ່າຍກໍ່ໃຫ້ເປັນໄປຕາມລະບຽບແບບແຜນ, ແກ້ໄຂບັນຫາໜີ້ສິນທີ່ຄົງຄ້າງ, ໃຊ້ຫົວຄິດປະດິດສ້າງເຂົ້າໃນການພັດທະນາເສດຖະກິດໃຫ້ຈະເລີນເຕີບໂຕ, ໂດຍສະເພາະຄອບຄົວທຸກຍາກທີ່ຍັງເຫຼືອຢູ່ໃຫ້ຫຼຸດລົງເປັນລຳດັບເວົ້າສະເພາະຢູ່ແຂວງສະຫວັນນະເຂດກໍ່ແມ່ນຍັງເມືອງນອງທີ່ບໍ່ທັນປະກາດເປັນເມືອງພົ້ນທຸກກໍ່ໃຫ້ພະຍາ ຍາມຕື່ມອີກສ້າງໃຫ້ເຂົາເຈົ້າມີອາຊີບ, ມີລາຍໄດ້ຖ້າເຂົາເຈົ້າຜະລິດຫຍັງໄດ້ພາກລັດກໍ່ຕ້ອງສົ່ງເສີມເລື່ອງຕະຫຼາດຈຳໜ່າຍສົ່ງເສີມທາງດ້ານການຜະລິດໃຫ້ມີເຕັກນິກຕາມຍຸກສະໄໝໃໝ່ສ້າງໃຫ້ປະຊາຊົນທີ່ຢູ່ຫ່າງໄກສອກຫຼີກຮູ້ຈັກຊື້-ຂາຍ ແລະຮູ້ຈັກຜະລິດເພື່ອຍົກສູງຊີວິດການເປັນຢູ່ໃຫ້ນັບມື້ມີຄຸນນະພາບທີ່ດີຂຶ້ນ.

  ບັນດາຊົນລະປະທານທີ່ສ້າງຂຶ້ນແລ້ວຕ້ອງໄດ້ກວດກາສະພາບເຕັກນິກໃຫ້ໃຊ້ງານໄດ້ຕະຫຼອດໃຫ້ອຳນວຍຄວາມສະດວກເລື່ອງນ້ຳໃຫ້ປະຊາຊົນຜະລິດເຂົ້າໄດ້ທັງ 2 ລະດູໃຫ້ເຂົາເຈົ້າປູກພືດທີ່ເປັນສິນຄ້າຂາຍໄດ້ຕາມຈຸດພິເສດ ແລະ ເງື່ອນໄຂຂອງແຕ່ລະທ້ອງຖິ່ນເບື້ອງລັດກໍ່ຕ້ອງສົ່ງເສີມວິຊາການເຕັກນິກແນວພັນຢາປາບສັດຕູພືດ ແລະອື່ນໆ.

ຂ່າວ: ນສພ ເສດຖະກິດ-ສັງຄົມ

แชร์