ການຄ້າຄຳມ່ວນ ຕິດຕາມການຊື້-ຂາຍສິນຄ້າຊ່ວງໂຄວິດ

  ທ່ານ ວຽງທອງ ພິມມະສອນ ຫົວໜ້າຂະແໜງການຄ້າພາຍໃນ ແລະໃນນາມຄະນະກອງເລ ຂາຮັບຜິດຊອບຊ່ວຍວຽກໃນການຕິດຕາມການຊື້-ຂາຍພາຍໃນ 3 ເຂດເທສະບານໃນຊ່ວງໄລຍະປິດ ເມືອງທ່າແຂກ ໄດ້ໃຫ້ສຳພາດຜ່ານສື່ມວນຊົນຂອງແຂວງໃນວັນທີ 24 ກັນຍາ 2021 ວ່າ: ກ່ຽວກັບການຈັດຕັ້ງປະຕິບັດນຳພາພໍ່ຄ້າ, ຊາວຂາຍລົງຂາຍແຕ່ລະຈຸດຕາມທິດຊີ້ນຳຂອງຄະນະສະເພາະກິດຂັ້ນແຂວງເພື່ອບໍລິການຮັບໃຊ້ໃຫ້ປະຊາຊົນໄດ້ມີຄວາມສະດວກໃນການຈັບຈ່າຍ-ຊື້ສະບຽງອາຫານເປັນຕົ້ນແມ່ນການຊື້ຂາຍຊີ້ນ, ປາ ແລະພືດຜັກຕ່າງໆ ໃນຊ່ວງໄລຍະແຂວງຄຳມ່ວນໄດ້ປະຕິບັດມາດຕະການປ້ອງກັນໂຄວິດ-19 ຕາມຄຳສັ່ງເລກທີ 08 ຂອງທ່ານ ເຈົ້າແຂວງ.
  ພາຍຫຼັງໄດ້ຮັບການແຕ່ງຕັ້ງເຈົ້າໜ້າທີ່ການຄ້າພວກເຮົາໄດ້ສົມທົບກັບເຈົ້າໜ້າທີ່ກ່ຽວຂ້ອງ ໂດຍສະເພາະເຈົ້າໜ້າທີ່ຕຳຫຼວດ, ກະສິກຳ, ສາທາເພື່ອປະຕິບັດຕາມ ການແຕ່ງຕັ້ງຂອງຄະນະສະເພາະກິດເຄື່ອນໄຫວນຳພາຂະບວນລົດພໍ່ຄ້າ, ແມ່ຄ້າເປີດຂາຍສິນຄ້າຕາມຈຸດຕ່າງໆຕາມຄວາມເໝາະສົມເພື່ອຫຼີກລ່ຽງຄວາມແອອັດໃນນີ້ມີ 3 ເຂດຄື: ເຂດຈອມທອງ, ເຂດຈອມແຈ້ງ ແລະເຂດນາໂບ.
  ໃນການລົງຊຸກຍູ້ຕິດຕາມນີ້ຜູ້ຂາຍຕ້ອງໄດ້ປະຕິບັດມາດຕະການຢ່າງເຂັ້ມງວດໃນການປ້ອງກັນເຊັ່ນ: ໃສ່ຜ້າອັດປາກ, ໃສ່ຖົງມື ຕ່າງໆ ສໍາລັບຜູ້ຊື້ກໍ່ເຊັ່ນດຽວກັນ ຕ້ອງມີໃບສັກຢາຄົບເຈົ້າໜ້າທີ່ພວກເຮົາຈຶ່ງອະນຸຍາດ, ພ້ອມທັງມີການເວັ້ນໄລຍະຫ່າງໃນການຈຳໜ່າຍ ແລະຈັດຊື້ສິນຄ້າແຕ່ລະສະຖານທີ່, ສ່ວນລາຄາຂອງສິນຄ້າແມ່ນໄດ້ຂາຍຕາມລາຄາທີ່ລັດກຳນົດເປັນຕົ້ນລາຄາຊີ້ນງົວ, ຄວາຍ, ແມ່ນໃນເກນ 80-85 ພັນກີບ, ຊີ້ນໝູບໍ່ເກີນ 50 ພັນກີບ ແລະໄຂ່ບໍ່ໃຫ້ເກີນ 40 ພັນກີບ ແລະຜູ້ຊື້ກໍລະນີບໍ່ໝັ້ນໃຈໃນຕາຊິງຕາມຈຸດຂາຍພວກເຮົາກໍ່ມີຊິງກາງທີ່ທາງພາກລັດປະກອບສ່ວນຊຸກຍູ້ໃຫ້ທ່ານສາມາດສັ່ງໄດ້ນອກຈາກຊິງແລ້ວແຕ່ລະຈຸດຂາຍທາງຂັ້ນເທິງຍັງໄດ້ປະກອບສ່ວນເຄື່ອງຂະຫຍາຍສຽງລວມເຖິງອຸປະກອນປ້ອງກັນພະຍາດໂຄວິດຈຳນວນໜຶ່ງອີກດ້ວຍ.
  ສໍາລັບຂໍ້ຫຍຸ້ງຍາກແມ່ນພົບບັນຫາເລັກໜ້ອຍແຕ່ກໍ່ຍ້ອນຄວາມໃກ້ ຊິດ ແລະການຊີ້ນຳຈາກຂັ້ນເທິງແມ່ນສາມາດລຸລ່ວງໄດ້ດີ ໃນການ ຂາຍນີ້ແມ່ນໄດ້ເລາະໄປຕາມບ້ານຈະຢຸດຂາຍຕາມສະຖານທີ່ເໝາະ ສົມໂດຍເລີ່ມແຕ່ 8 ໂມງ ຫາ 17 ໂມງແລງ.
  ທ່ານ ວຽງທອງ ພິມມະສອນ ຍັງໄດ້ກ່າວຕື່ມອີກວ່າ: ຂໍຖືໂອກາດຮຽກຮ້ອງມາຍັງປະຊາຊົນທີ່ຕ້ອງການມາຊື້ອາຫານແມ່ນໃຫ້ທຸກຄົນປະຕິບັດມາດຕະການປ້ອງກັນພະ ຍາດໂຄວິດ-19 ຢ່າງເຂັ້ມງວດເຊັ່ນ: ການຮັກສາໄລຍະຫ່າງ, ໃສ່ຜ້າປິດປາກເປັນຕົ້ນ ແລະກໍລະນີຖ້າພົບເຫັນທາງຮ້ານໃດ, ບຸກຄົນໃດມີການລັກຊື້-ຂາຍສິນຄ້າທີ່ບໍ່ໄດ້ຮັບ ອະນຸຍາດ, ພົບເຫັນກໍລະນີຂາຍເກີນລາຄາທີ່ລັດກຳນົດໄວ້ທ່ານກໍ່ສາມາດແຈ້ງມາຍັງທາງເຈົ້າໜ້າທີ່ຂອງພວກເຮົາໄດ້, ສ່ວນການຂາຍຊີ້ນ-ຜັກຕ່າງໆ ຖ້າບໍ່ທ່ວງທັນ ຫຼື ໝົດກ່ອນກໍ່ຂໍອະໄພພວກເຮົາຈະນໍາສະເໜີຂັ້ນເທິງໂດຍໄວເພື່ອນຳໄປຂາຍໃນບ້ານຕໍ່ໆໄປນອກຈາກການຂາຍສິນຄ້າທີ່ກ່າວມາພວກເຮົາຍັງມີລົດສິນຄ້າຂອງບໍລິ ສັດຊີພີອີກດ້ວຍ, ທັງນີ້ກໍ່ເພື່ອຄວາມເປັນລະບຽບຮຽບຮ້ອຍ ແລະເພື່ອຄວາມປອດໄພຂອງປະຊາຊົນ.

แชร์