ຄະນະສະເພາະກິດ ກຽມອອກມາດຕະການສະບັບໃໝ່ ເພື່ອສືບຕໍ່ປ້ອງກັນພະຍາດໂຄວິດ-19 ໂດຍຈະປະຕິບັດໃນວັນທີ 1 ຕຸລາ 2021 ນີ້

   ໃນວັນທີ 29 ກັນຍາ 2021 ນີ້ຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນສູນກາງໄດ້ແຈ້ງໃຫ້ຮູ້ໃນກຽມອອກມາດຕະການສະບັບໃໝ່ກ່ຽວກັບໃຫ້ສືບຕໍ່ມາດຕະການປ້ອງກັນພະຍາດໂຄວິດ-19 ນັບແຕ່ວັນທີ 1 ຕຸລາ 2021 ນີ້ເປັນຕົ້ນໄປຊຶ່ງມາດຕະການສືບຕໍ່ສະບັບໃໝ່ນີ້ຈະປັບປຸງໃຫ້ສອດຄ່ອງ ແລະແທດເໝາະກັບສະພາບການແຜ່ຂອງພະຍາດດັ່ງກ່າວໃນປັດຈຸບັນທັງເປັນບ່ອນອິງໃນການຈັດຕັ້ງປະຕິບັດໃນຕໍ່ໜ້າ.
   ທັງນີ້ກໍຍ້ອນສະພາບການແຜ່ລະບາດຂອງພະຍາດໂຄວິດ-19 ໃນຊຸມຊົນຢູ່ທົ່ວປະເທດໂດຍສະເພາະຢູ່ນະຄອນຫຼວງວຽງຈັນ, ແຂວງສະຫວັນນະເຂດ, ຈໍາປາສັກ, ຄໍາມ່ວນ ແລະແຂວງອື່ນໆຍັງແຜ່ລາມເປັນວົງກວ້າງ, ດັ່ງນັ້ນຄະນະສະເພາະກິດຈຶ່ງມີຄວາມຈໍາເປັນທີ່ຈະສືບຕໍ່ມາດຕະການປ້ອງກັນພະຍາດໂຄວິດ-19 ຕື່ມອີກ. ຊຶ່ງປະຈຸບັນນີ້ຄະນະສະເພາະກິດກໍາລັງປະເມີນຜົນການຈັດຕັ້ງປະຕິບັດໃນໄລຍະທີ່ມີການສືບຕໍ່ປະຕິບັດມາດຕະການປ້ອງກັນພະຍາດດັ່ງກ່າວທີ່ຜ່ານມານັບແຕ່ວັນທີ 19-30 ກັນຍາ 2021 ເພື່ອກຽມປັບປຸງບາງເນື້ອໃນ ແລະບາງມາດຕະການຕື່ມໃສ່ມາດຕະການສະບັບໃໝ່.


   ສໍາລັບສະພາບການແຜ່ລະບາດຂອງພະຍາດໂຄວິດ-19 ຢູ່ນະຄອນຫຼວງວຽງຈັນໃນປະຈຸບັນພົບວ່າມີການລະບາດເປັນວົງກວ້າງ, ມີບ້ານແດງເຖິງ 108 ບ້ານ ໃນ 8 ເມືອງ. ການປິດການເຂົ້າ-ອອກນະຄອນຫຼວງວຽງຈັນໂດຍລວມປະຊາຊົນສ່ວນໃຫຍ່ໃຫ້ການຮ່ວມມືໃນການປະຕິບັດມາດຕະການທີ່ວາງອອກໂດຍການບໍ່ອອກຈາກບ້ານ ແລະທີ່ຢູ່ອາໄສແຕ່ກໍຍັງມີບາງກຸ່ມຄົນທີ່ມີຄວາມຈໍາເປັນຕ້ອງໄດ້ອອກຈາກບ້ານເພື່ອປະຈໍາການ, ໄປໂຮງໝໍ, ໄປຮັບວັກຊິນ, ໄປທໍາມາຫາກິນ, ທໍາການຜະລິດໄດ້ເຮັດໃຫ້ມີການສັນຈັນຕາມທ້ອງຖະໜົນແຕ່ກໍ່ເບົາບາງຫຼາຍຖ້າທຽບກັບບໍ່ມີມາດຕະການ.

แชร์