ຄົ້ນເຮືອນເປົ້າໝາຍພົບຢາບ້າຫຼາຍພັນເມັດ

   ເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ເປີດເຜີຍວ່າ: ພາຍຫຼັງທີ່ໄດ້ຮັບຂໍ້ມູນຈາກພົນລະເມືອງດີໃນຕົ້ນເດືອນກັນຍາທີ່ຜ່ານມາວ່າຢູ່ດິນສວນໃກ້ກັບເຮືອນຂອງທ້າວ ຈູໄລວ້າ ບ້ານພູສະຫວັນ ເມືອງໄຊ ມີຮ່ອງຮອຍສົງໄສພົວພັນຢາເສບຕິດຈຶ່ງໄດ້ແຕ່ງຕັ້ງພະນັກງານວິຊາສະເພາະລົງກວດກາ ແລະ ຕິດຕາມເຫັນວ່າມີມູນຄວາມຈິງ ແລະສາມາດເຊື່ອຖືໄດ້ກ່ອນນໍາກໍາລັງເຂົ້າກວດຄົ້ນເຄຫະສະຖານ (ເຮືອນສົງໄສ) ແລະຈັບກຸມເປົ້າໝາຍ 2 ຄົນ ໃນວັນທີ 25 ກັນຍາ 2021.

   ຜ່ານການສອບສວນໃນເບື້ອງຕົ້ນຍັງສາມາດຂະຫຍາຍຜົນເຖິງພັກພວກຮ່ວມຂະບວນອີກ 2 ຄົນ ລວມເປັນ 4 ຄົນ ຊື່ທ້າວ ຈຸໄລວ້າ ອາຍຸ 48 ປີ, ທ້າວ ປໍຈົວລີ ອາຍຸ 29 ປີ, ທ້າວ ຊົວເຈີລີ ອາຍຸ 58 ປີ ແລະທ້າວ ວົງລີ ອາຍຸ 19 ປີ ພວກກ່ຽວຢູ່ບ້ານພູສະຫວັນ.

  ສໍາລັບການກວດຄົ້ນເຄຫະສະຖານ ທີ່ພົວພັນກັບຢາເສບຕິດຂອງພວກກ່ຽວ ຄັ້ງນີ້, ມີທັງໝົດ 3 ຈຸດ ຄື: ຈຸດທີ 1: ແມ່ນເຮືອນຂອງທ້າວ ຈູໄລວ້າ ສາມາດຢຶດເຄື່ອງຂອງກາງໄດ້ຄືຢາບ້າຈໍານວນ 265 ເມັດ, ບັ້ງເສບຢາບ້າ 1 ບັ້ງ, ເງິນ 2 ລ້ານກີບ, ລົດຈັກ 1 ຄັນ ແລະໂທລະສັບມືຖື 2 ໜ່ວຍ; ຈຸດທີ 2: ເຮືອນຂອງທ້າວ ປໍຈົວລີ, ທ້າວ ຊົວ ເຈີລີ ແລະທ້າວ ວົງລີ (ທັງ 3 ແມ່ນ ຄົນໃນຄອບຄົວດຽວກັນ) ກວດພົບເຫັນຢາບ້າຈໍານວນ 194 ເມັດ, ເງິນ 25 ພັນບາດ, ປືນລົມ 1 ກະບອກ, ລົດຈັກ 2 ຄັນ, ໂທລະສັບມືຖື 2 ເຄື່ອງ ແລະລົດເກັງຍີ່ຫໍ້ HYUNDAI ສີປອນ ເງິນທະບຽນ ກທ 6448 ກໍາແພງນະຄອນ ແລະຈຸດທີ 3: ກວດຄົ້ນຫ້ອງໃຕ້ດິນສວນຂອງ ທ້າວ ຈຸໄລວ້າ ແລະທ້າວ ປໍຈົວລີ ພົບເຫັນຢາບ້າເມັດສີແດງຈໍາ ນວນ 8.790 ເມັດ, ຢາບ້າທີ່ຍັງເປັນແປ້ງຝຸ່ນສີແດງ (ບໍ່ທັນໄດ້ອັດເປັນເມັດ) 1 ຖົງ ນໍ້າໜັກ 5 ກິໂລກຣາມ, ຢາບ້າເປັນເມັດສີຂຽວ4.170 ເມັດ, ແປ້ງຝຸ່ນປະສົມນໍ້າໜັກ 12,8 ກິໂລກຣາມ, ກາຈໍ້າ ມີເຄື່ອງໝາຍໂຕ Y 1 ອັນ, ເຄື່ອງ ໝາຍໂຕ A 1 ອັນ ແລະເຄື່ອງໝາຍເລກ1 ຈໍານວນ 1 ອັນ ແລະອຸປະກອນອື່ນໆທີ່ກ່ຽວຂ້ອງຈໍານວນໜຶ່ງ.

 ຈາກການສອບສວນຂອງເຈົ້າໜ້າທີ່, ທ້າວ ຈູໄລວ້າ ແລະທ້າວ ປໍຈົວລີ ໃຫ້ການຮັບສະພາບຕໍ່ເຈົ້າໜ້າທີ່ຕໍາຫຼວດວ່າ: ໄດ້ຮ່ວມກັນເຄື່ອນໄຫວພົວພັນຢາເສບຕິດເເທ້ສ່ວນເຄື່ອງຂອງກາງຢາບ້າ, ເຄື່ອງມື-ອຸປະກອນທີ່ກ່ຽວຂ້ອງທີ່ເຈົ້າໜ້າທີ່ກວດພົບເຫັນ ແລະສາມາດຢຶດໄດ້ຢູ່ຫ້ອງໃຕ້ດິນຢູ່ສວນນັ້ນແມ່ນຂອງພວກກ່ຽວແທ້ຊຶ່ງໃນຕົ້ນເດືອນສິງຫາ 2021 ພວກກ່ຽວໄດ້ຕິດຕໍ່ສັ່ງຊື້ເຄື່ອງມື-ອຸປະກອນນໍາຜູ້ຮ່ວມຂະບວນການ (ບໍ່ຮູ້ຊື່ ແລະ ທີ່ຢູ່) ຊຶ່ງເປັນໂຊເຟີຂັບລົດບັນທຸກ 12 ລໍ້ ໃນລາຄາ 60 ລ້ານກີບ ແລະພາຍຫຼັງທີ່ໄດ້ເຄື່ອງມາແລ້ວກໍ່ໄດ້ພາກັນຂຸດຂຸມສ້າງຫ້ອງໃຕ້ຕິດແລ້ວຕິດຕໍ່ສັ່ງ ຊື້ແປ້ງຝຸ່ນ ແລະສານເຄມີທີ່ໃຊ້ປະສົມປຸງ ແຕ່ງຢາບ້າ ແລະພວກກ່ຽວເຮັດສໍາແລ້ວຄັ້ງທໍາອິດໄດ້ຢາບ້າ ຈໍານວນ 18 ມັດ.

  ຈາກນັ້ນ, ກໍ່ນໍາໄປຂາຍໃຫ້ຊາຍບໍ່ຮູ້ຊື່ (ຄົນມາແຕ່ຕ່າງແຂວງ) ໂດຍການນັດສົ່ງຊື້-ຊາຍຢາບ້າໃຫ້ກັນຢູ່ເຂດບ້ານຫຼັກ 44 ສ່ວນຢາບ້າ ແລະແປ້ງຝຸ່ນທີ່ເຈົ້າໜ້າທີ່ຢຶດໄດ້ຢູ່ຫ້ອງໃຕ້ດິນແມ່ນຈໍານວນທີ່ບໍ່ທັນໄດ້ບັນຈຸໃສ່ຖົງ ແລະບໍ່ທັນໄດ້ອັດເປັນເມັດເທື່ອ.

   ທ້າວ ຈູໄລວ້າ ຍັງໃຫ້ການອີກວ່າ: ສໍາລັບຢາບ້າ ຈໍານວນ 265 ເມັດ ທີ່ກວດພົບເຫັນຢູ່ເຮືອນຂອງຜູ້ກ່ຽວນັ້ນແມ່ນນໍາອອກມາຈາກຫ້ອງໃຕ້ດິນສວນເພື່ອນໍາມາໄວ້ເສບເອງ ແລະທ້າວ ປໍຈົວລີ  ໄດ້ໃຫ້ການອີກວ່າ ຢາບ້າ ຈໍານວນ 194 ເມັດ ທີ່ຢຶດໄດ້ຢູ່ເຮືອນຂອງຕົນນັ້ນແມ່ນເອົາມາໃຫ້ທ້າວ ຊົວເຈີລີ (ພໍ່) ເສບ.

    ທ້າວ ຊົວເຈີລີ ໄດ້ໃຫ້ການວ່າລູກຊາຍເອົາມາໃຫ້ຜູ້ກ່ຽວເສບແທ້ສ່ວນການເຄື່ອນໄຫວຕ່າງໆນັ້ນແມ່ນບໍ່ຮັບຮູ້ ແລະທ້າວວົງລີ (ນ້ອງຊາຍ) ຂອງທ້າວ ປໍ ຈົວລີ ແມ່ນໄດ້ໃຫ້ການປະຕິເສດວ່າບໍ່ຮັບຮູ້ ແລະບໍ່ກ່ຽວຂ້ອງກັບຂະບວນການໃນຄັ້ງນີ້.

  ປະຈຸບັນຄະດີດັ່ງກ່າວ, ເຈົ້າໜ້າທີ່ ປກສ ແຂວງອຸດົມໄຊ ຍັງສືບຕໍ່ສືບສວນ-ສອບສວນຂະຫຍາຍຜົນຫາກຸ່ມແກ້ງພັກພວກທີ່ຮ່ວມຂະບວນການເພື່ອນໍາຕົວມາດໍາເນີນຄະດີຕາມກົດໝາຍ.

 

แชร์