ຄຸ້ມຄອງເງີນຕາຢູ່ 3 ແຂວງ ມີຄວາມຄືບໜ້າ

ຂ່າວ: ຣັດສະໝີ ດວງສັດຈະ

  ໃນ 6 ເດືອນຕົ້ນປີ 2021 ທຫລ.ຊຂ ໄດ້ເອົາໃຈໃສ່ຄຸ້ມຄອງວຽກງານທະນາຄານ ແລະສະຖາບັນການເງິນຢູ່ແຂວງຊຽງຂວາງ, ຫົວພັນແລະແຂວງໄຊສົມບູນ ຢ່າງຕັ້ງໜ້າສາມາດກວດກາສາຂາທະນາຄານທຸລະກິດ (ທທກ) ຕາມແຜນການກວດກາສາຂາ ແລະໜ່ວຍບໍລິການ ທທກ ປະຈຳປີ 2021; ພ້ອມນັ້ນກໍ່ສໍາເລັດວຽກງານຫຼາຍດ້ານເປັນຕົ້ນໄດ້ຕິດຕາມເກັບກຳຂໍ້ມູນແຜນສະໜອງສິນເຊື່ອເຂົ້າບ້ານ 3 ສ້າງ ແລະບ້ານຈຸດສຸມເມືອງໝອກ ແຂວງຊຽງຂວາງປະຈໍາປີ 2021;ສຳເລັດການລາຍງານຖານະການເງິນບັນດາສາຂາ-ໜ່ວຍບໍລິການ ທທກ ປະຈຳເດືອນມັງກອນຫາເດືອນພຶດສະພາ 2021; ສະໜອງຂໍ້ມູນຕົວເລກເງິນຝາກ,ສິນເຊື່ອ ແລະ ໜີ້ NPLs ຂອງບັນດາ ທທກ ລັດ; ສະໜອງຂໍ້ມູນຕົວເລກຖານະການເງິນ 3 ເດືອນຕົ້ນປີ 2021 ແລະບັນຫາສໍາຄັນອື່ນໆຕິດພັນ.

   ສ່ວນວຽກງານຄຸ້ມຄອງສະຖາບັນການເງິນ ທ່ານ ວິສອນ ໄຊສົງຄາມ ຫົວໜ້າສາຂາທະນາຄານແຫ່ງ ສປປ ລາວ ພາກເໜືອແຂວງຊຽງຂວາງ (ທຫລ.ຊຂ) ໄດ້ແຈ້ງໃຫ້ຮູ້ວ່າ: ໄດ້ຮັບການລາຍງານຖານະການເງິນປະຈຳເດືອນ ແລະກວດກາຄວາມຖືກຕ້ອງ ຂອງເອກະສານລາຍງານການເຄື່ອນ ໄຫວດຳເນີນທຸລະກິດຂອງບັນດາສະຖາບັນການເງິນ, ປະຈຸບັນມີ 17 ແຫ່ງ ພາຍໃຕ້ການຄຸ້ມຄອງຂອງ ທຫລ.ຊຂ ແລະກໍ່ສຳເລັດຫຼາຍວຽກໂດຍສະເພາະໄດ້ວິເຄາະຄວາມສ່ຽງຖານະການເງິນປະຈຳ ເດືອນມີ 15 ແຫ່ງ; ສ່ວນອີກ 2 ແຫ່ງ ໄດ້ຕິດຕາມເກັບຂໍ້ມູນສັງລວມຕົວເລກການເຄື່ອນໄຫວທຸລະກິດ ແຕ່ລະເດືອນ; ຄົ້ນຄວ້າເອກະສານຂໍສ້າງຕັ້ງ 1 ສສງ ແລະອອກໃບອະນຸຍາດດໍາເນີນທຸລະກິດໃຫ້ 2 ສກຈບ; ກວດກາປະຈຳປີ 2020 ບັນດາສະຖາບັນການເງິນທີ່ບໍ່ແມ່ນທະນາຄານ 6 ແຫ່ງ; ຮັບບົດລາຍງານຜົນການແກ້ໄຂຂໍ້ຄົງຄ້າງປະຈໍາປີ 2020 ຂອງສະຖາບັນການເງິນທີ່ໄດ້ຮັບການກວດກາສຳເລັດໃນປີ 2020; ສໍາເລັດການແຈ້ງຕອບສະໜອງຂໍ້ມູນຕົວເລກເງິນຝາກ, ຕົວເລກສິນເຊື່ອ ແລະໜີ້ NPLs; ວຽກງານເສດຖະກິດ-ເງິນຕາ ແລະຄຸ້ມຄອງເງິນຕາຕ່າງປະເທດກໍ່ສໍາເລັດການເກັບກຳການສັງລວມອັດຕາເເລກປ່ຽນປະຈຳວັນຢູ່ແຂວງຫົວພັນ ແລະແຂວງຊຽງຂວາງ; ເກັບກໍາລາຄາສິນຄ້າຕາມທ້ອງຕະຫຼາດເປັນປະຈໍາອາທິດພາຍໃນເທສະບານແຂວງຊຽງຂວາງ; ສຳເລັດການສະໜອງຕົວເລກຖານະການເງິນຂອງບັນດາທະນາຄານທຸລະກິດ ແລະສະຖາບັນການເງິນຈຸລະພາກພາຍໃນ 3 ແຂວງ ທີ່ຢູ່ພາຍໃຕ້ການຄຸ້ມຄອງ ທຫລ.ຊຂ; ສຳເລັດການຂຽນບົດລາຍງານສະພາບເສດຖະກິດ-ເງິນຕາພາຍໃນ 3 ແຂວງ; ຂຶ້ນແຜນບັນດາໜ້າວຽກປະຈຳ ແລະວຽກຈຸດສຸມໃນປີ 2021; ເຜີຍແຜ່ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ; ກວດກາຮ້ານແລກປ່ຽນເງິນຕາຕ່າງປະເທດປະຈຳໄຕມາດ 1 ພາຍໃນແຂວງຊຽງຂວາງ.

  ແຜນການໃນຕໍ່ໜ້າ,ສືບຕໍ່ຈັດຕັ້ງປະຕິບັດແຜນການກວດກາ, ເກັບກໍາຂໍ້ມູນສາຂາທະນາຄານໜ່ວຍບໍລິການ ທທກ ຕາມແຜນການກວດກາ,ເກັບກຳຂໍ້ມູນສາຂາ ແລະໜ່ວຍບໍລິການທະນາຄານປະຈຳປີ 2021; ສືບຕໍ່ຕິດຕາມແຜນການແກ້ໄຂຂໍ້ສັງເກດທີ່ພົບເຫັນໃນບົດລາຍງານຜົນການກວດກາປະຈໍາປີເພື່ອໃຫ້ ທທກ ຈັດຕັ້ງປະຕິບັດໃຫ້ສອດຄ່ອງຕາມລະບຽບການ; ຕິດຕາມກ່ຽວກັບປາກົດການຫຍໍ້ທໍ້ທີ່ຕິດພັນກັບທທກ; ສືບຕໍ່ຕິດຕາມການສ້າງແຜນດຳເນີນທຸລະກິດຂອງທະນາຄານ 3 ແຂວງປະຈໍາປີ 2021; ສືບຕໍ່ຕິດຕາມເອົາບົດລາຍງານຖານະການເງິນປະຈຳເດືອນມິຖຸນາ 2021 ຂອງບັນດາສະຖາບັນການເງິນ 18 ແຫ່ງທີ່ຢູ່ພາຍໃຕ້ການຄຸ້ມຄອງຂອງ ທຫລ.ຊຂ, ພ້ອມທັງວິເຄາະຄວາມສ່ຽງຖານະການເງິນຢ່າງເປັນປົກກະຕິ; ຕິດຕາມການເຄື່ອນໄຫວດຳເນີນທຸລະກິດຂອງຜູ້ໃຫ້ການບໍລິການທາງດ້ານການເງິນທີ່ຄ້າຍຄືສະຖາບັນການເງິນຈຸລະພາກໂດຍບໍ່ໄດ້ຮັບອະນຸຍາດຈາກ ທຫລ ຢ່າງຖືກຕ້ອງທີ່ເຄື່ອນໄຫວຢູ່ພາຍໃນຂອບເຂດການຄຸ້ມຄອງ ທຫລ.ຊຂ; ຕິດຕາມຊຸກຍູ້ຊ່ວຍບັນດາສະຖາບັນການເງິນຕໍ່ກັບດ້ານວິຊາການທີ່ຍັງເປັນບັນຫາ ແລະຂໍ້ຄົງຄ້າງໃນການດຳເນີນງານຂອງສະຖາບັນດັ່ງກ່າວ; ເຜີຍແຜ່ນິຕິກໍາຄຸ້ມຄອງສະຖາບັນ ການເງິນໃຫ້ກັບອໍານາດການປົກຄອງຂັ້ນເມືອງທີ່ມີສະຖາບັນການເງິນຕັ້ງຢູ່ທີ່ໄດ້ຮັບອະນຸຍາດຈາກ ທຫລກໍ່ຄືວຽກອື່ນທີ່ປິ່ນອ້ອມ.

แชร์