ມສ ວຽງຈັນ ສະຫຼອງວັນສ້າງຕັ້ງ ຄົບຮອບ 60 ປີ

   ໃນວັນທີ 20 ທັນວາ 2018 ທີ່ນະຄອນຫຼວງວຽງຈັນ ໂຮງຮຽນ ມສ ວຽງຈັນ ໄດ້ຈັດງານສະເຫຼີມສະຫຼອງວັນສ້າງຕັ້ງໂຮງຮຽນຄົບຮອບ 60 ປີ (1958-2018) ໂດຍເປັນກຽດເຂົ້າຮ່ວມຂອງທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະກີລາ, ມີຄະນະອໍານວຍການ, ພະນັກງານຄູອາຈານປະຈໍາການ, ຜູ້ອາວຸໂສ ແລະ ສິດເກົ່າເຂົ້າຮ່ວມ.

  ທ່ານ ນາງ ວຽງສຸວັນ  ພະໄຊສົມບັດ ຜູ້ອຳນວຍການໂຮງຮຽນ ມສ ວຽງຈັນ ໃຫ້ຮູ້ວ່າ: ໂຮງຮຽນຮຽນ ມສ ວຽງຈັນ ແມ່ນສ້າງຕັ້ງ ຂຶ້ນເມື່ອປີ 1958  ຊື່ວ່າວິທະຍາໄລ ວຽງຈັນ, ຫຼັງຈາກປີ 1975 ໄດ້ປ່ຽນຊື່ມາເປັນອຸດົມວຽງຈັນ  ແລະ ປີ 1999 ໄດ້ປ່ຽນມາເປັນມັດທະຍົມສົມບູນວຽງຈັນເຖິງປະຈຸບັນ, ນອກນັ້ນໃນພິທີສະຫຼອງອັນສ້າງຕັ້ງໂຮງຮຽນຍັງໄດ້ມີການແລກປ່ຽນປະສົບການ ແລະຜົນສໍາເລັດການສຶກສາຈາກສິດເກົ່າ, ຊົມກ້ອນກໍາລັງຂອງໂຮງຮຽນ, ຊົມງານ ວາງສະແດງຜົນງານການຮຽນ ການສອນ ແລະຊົມຜົນງານການປະດິດຕ່າງໆຈາກສິ່ງເສດເຫຼືອຂອງນ້ອງນັກຮຽນ.

  ສໍາລັບກິດຈະກໍາໃນການສະເຫຼີມສະຫຼອງຄັ້ງນີ້, ປະກອບມີການສາຍວີດີໂອ, ຫຼິ້ນເກມຄິດເລກໄວ, ການຕອບຖາມສາຍສັງຄົມ, ຮ້ອງເພງພາສາບູໄນໃນບົດເພງເຕີການຕູເຊັບເຕີ, ເດີນແບບວັດທະນະທໍາອາຊຽນ, ສະເໜີບົດວິຊາເຄມີສາດໃນຫົວຂໍ້ນໍ້າຕານໃນຊີວິດປະຈໍາວັນ, ຮ້ອງເພງພາສາອັງກິດໃນບົດເພງ Lost Star, ສະເໜີບົດວິຊາຟີຊິກສາດໃນຫົວຂໍ້ພະລັງງານແສງສະຫວ່າງທີ່ຍາດໄດ້ລາງວັນທີ 1 ໃນການແຂ່ງຂັນວິທະຍາສາດຂອງກະຊວງພະລັງງານ ແລະບໍ່ແຮ່, ເດີນແບບສິ່ງປະດິດ, ສະເໜີບົດວິຊາຄະນິດສາດໃນຫົວຂໍ້ຫຼັກເກນປີຕາກໍ, ເດີນແບບຊຸດອາຊຽນ,ການຖາມຕອບສາຍສັງຄົມ,ຮ້ອງເພງພາສາຍີ່ປຸ່ນໃນບົດເພງ 365 ວັນກັບເຄື່ອງບິນກະດາດ, ສະເໜີບົດວິຊາຄະນິດສາດໃນຫົວຂໍ້ກຸ່ມຈໍານວນ, ຮ້ອງເພງພາສາຈີນໃນບົດເພງກໍາລັງຊອກຫາໝູ່ເພື່ອນ, ສະເໜີບົດວິຊາຊີວະສາດໃນຫົວຂໍ້ສາຍດີເອັນເອ, ຮ້ອງເພງພາສາຍີ່ປຸ່ນໃນບົດເພງຫິເດໂກະ ແລະຮ້ອງເພງລວມໝູ່ ມສ ວຽງຈັນ.

แชร์