ລັດຊື້ລົດສົ່ງຄົນເຈັບ 50 ຄັນໃຫ້ໂຮງໝໍຊຸມຊົນທົ່ວປະເທດ

   ກະຊວງສາທາລະນະສຸກໄດ້ຮັບ ລົດ Ambulances ຈາກລັດຖະບານຈຳນວນ 50 ຄັນ ໂດຍທຶນກູ້ຢືມຈາກທະນາຄານພັດທະນາອາຊີ ຫຼືເອດີບີ ເພື່ອສະໜອງໃຫ້ບັນດາໂຮງໝໍຊຸມຊົນໃນທົ່ວປະເທດ.

   ຂໍ້ມູນເປີດເຜີຍຈາກກະຊວງສາທາລະນະສຸກຮູ້ວ່າ: 2021 ແມ່ນປີທໍາອິດໃນການຈັດຕັ້ງປະຕິບັດແຜນພັດທະນາສາທາລະນະສຸກ 5 ປີ ຄັ້ງທີ IX ໃນເງື່ອນໄຂການລະບາດຂອງພະຍາດໂຄວິດ-19 ຊຶ່ງໄດ້ແຜ່ລາມໄປຫຼາຍແຂວງ ແລະເປັນໄພອັນຕະລາຍຮ້າຍແຮງຕໍ່ການຈັດຕັ້ງປະຕິບັດການບໍລິການທາງດ້ານການແພດຢູ່ໂຮງໝໍລະດັບຕ່າງໆ ໃນທົ່ວປະເທດແມ່ນມີຕົວເລກບໍລິການທີ່ຫຼຸດລົງ.

   ການເຂົ້າເຖີງການບໍລິການສາທາລະນະສຸກຂອງປະຊາຊົນຢູ່ເຂດຫ່າງໄກສອກຫຼີກ, ການນຳສົ່ງຄົນເຈັບບໍ່ວ່າຈະເປັນການນຳສົ່ງແມ່ຍີງຖືພາທີ່ມີບັນຫາ, ແມ່ຍີງເກີດລູກຕົກເລືອດ, ເດັກເຈັບ, ອຸປະຕິເຫດທ້ອງຖະໜົນ ແລະອື່ນໆທີ່ຈະນຳສົ່ງຈາກໂຮງໝໍໜື່ງໄປຫາໂຮງໝໍອື່ນທີ່ມີການບໍລິການທີ່ສູງກວ່າຍັງເປັນບັນຫາຫຼາຍສົມຄວນຍ້ອນບໍ່ມີພາຫະນະນຳສົ່ງທີ່ເໝາະສົມ, ອັນທີ່ມີກໍ່ເກົ່າເຮັດໃຫ້ມີການເສັຍຊີວິດໃນໂຮງໝໍແລະໃນລະຫວ່າງການນຳສົ່ງມີຕົວເລກສູງ.

ດັ່ງນັ້ນ, ພັກ ແລະລັດເຫັນໄດ້ເຖິງຄວາມຈຳເປັນ ແລະຕ້ອງແກ້ໄຂຢ່າງຮິບດ່ວນຈຶ່ງໄດ້ຕົກລົງແກ້ໄຂການເຂົ້າເຖິງການບໍລິການຂອງປະຊາຊົນ ແລະຫຼຸດຜ່ອນອັດຕາການເສຍຊີວິດຂອງແມ່ຍີງຖືພາ ແລະເດັກນ້ອຍໂດຍສະເພາະຢູ່ເຂດຫ່າງໄກສອກຫຼີກຈຶ່ງໄດ້ຕັດສີນໃຈກູ້ຢືມຈາກທະນາຄາານພັດທະນາອາຊີເພື່ອຈັດຊື້ລົດ Ambulances ຈຳນວນ 50 ຄັນ ເພື່ອສະໜອງໃຫ້ບັນດາໂຮງໝໍຊຸມຊົນໃນທົ່ວປະເທດ,

   ແຕ່ເນື່ອງຈາກສະພາບການລະບາດຂອງພະຍາດ COVID- 19 ເພື່ອເປັນການປະຕິບັດຕາມມາດຕະການຂອງຄະນະສະເພາະກິດຈຶ່ງບໍ່ອາດຈັດພິທີມອບຮັບເວລາດຽວໄດ້ຈະເຮັດໃຫ້ມີຄົນຫຼາຍຈຶ່ງໄດ້ແບ່ງພິທີຮັບເປັນ 2 ຄັ້ງ; ຄັ້ງທີ 1 ໃນວັນທີ 27 ກັນຍາ 2021 ແລະຄັ້ງທີ 2 ແມ່ນຈະມອບຮັບວັນທີ 28-29 ກັນຍາ 2021.

 ໃນພິທີມອບຮັບຄັ້ງນີ້ມີ 11 ແຂວງ, ນະຄອນຫຼວງໂຮງໝໍ 103 ກອງທັບ ແລະສູນປິ່ນປົວ ແລະຮັກສາສຸຂະພາບຕານອກຈາກນີ້ເຮົາຍັງຈະໄດ້ຮັບການຊ່ວຍເຫຼືອຈາກລັດຖະບານຍີ່ປຸ່ນຕື່ມ 81 ຄັນ ແຈກຢາຍໄປກ່ອນນີ້ 7 ຄັນ ຍັງ 74 ຄັນ ແມ່ນຈະໄດ້ແຈກຢາຍໃຫ້ບັນດາໂຮງໝໍແຂວງ, ໂຮງໝໍຊຸມຊົນທີ່ຍັງບໍ່ທັນໄດ້ຮັບ.

แชร์