8 ເດືອນ ລນລ ສາຂາຈໍາປາສັກນຳເຂົ້ານໍ້າມັນ 29 ລ້ານກວ່າລິດ

ຂ່າວ: ໂພທິລາດ

   ຖືກເປັນການຈັດຕັ້ງປະຕິບັດວຽກງານຢ່າງມີປະສິດທິພາບສູງພໍສົມຄວນສໍາລັບລັດວິສາຫະກິດນໍ້າມັນເຊື້ອໄຟລາວ ສາຂາແຂວງຈໍາປາສັກ ເຖິງຈະຕົກຢູ່ສະໃນພາວະເສດຖະກິດຕົກຕໍ່າ ແລະຜົນກະທົບໜັກໜ່ວງຈາກການແຜ່ລະບາດຂອງເຊື້ອພະຍາດໂຄວິດ-19 ແຕ່ໃນ 8 ເດືອນຜ່ານມາສາມາດນໍາເຂົ້າ ແລະຈໍາໜ່າຍນໍ້າມັນໄດ້ ເກີນແຜນທີ່ກໍານົດໄວ້.

   ທ່ານ ຈັນຫອມ ດວງບຸບຜາ ຫົວໜ້າລັດວິສາຫະກິດນໍ້າມັນເຊື້ອໄຟລາວ (ລນລ) ສາຂາແຂວງຈໍາປາສັກໄດ້ໃຫ້ສໍາພາດຕໍ່ສື່ຂ່າວໜັງສືພິມເສດຖະກິດ-ສັງຄົມ ເມື່ອບໍ່ດົນມານີ້ໃຫ້ຮູ້ວ່າ: ໃນໄລຍະ 8 ເດືອນຜ່ານມານີ້ໄດ້ມີຫລາຍເຫດການທີ່ພົ້ນເດັ່ນເກີດຂື້ນຢູ່ໃນສາກົນ ແລະພາກພື້ນ, ຊຶ່ງລ້ວນແລ້ວແຕ່ເປັນສີ່ງທ້າທາຍຕໍ່ການພັດທະນາເສດຖະກິດ-ສັງຄົມຂອງ ສປປ ລາວ, ໂດຍສະເພາະແມ່ນການແຜ່ລະບາດຂອງເຊື້ອພະຍາດໂຄວິດ-19 ທີ່ພວມລະບາດຢ່າງຕໍ່ເນື່ອງໃນທົ່ວໂລກ ແລະ ປະເທດໃກ້ຄຽງ, ຊຶ່ງເຮັດໃຫ້ລັດຖະບານລາວຕ້ອງໄດ້ປະຕິບັດມາດຕາການປິດເມືອງນັບແຕ່ຕົ້ນເດືອນເມສາ 2021 ເປັນຕົ້ນມາ.

   ແຕ່ເຖີງຢ່າງໃດກໍ່ຕາມຍ້ອນຄວາມເອົາໃຈໃສ່ຊີ້ນໍາໆພາຢ່າງໃກ້ຊິດຂອງຄະນະພັກ, ຄະນະອໍານວຍການ ລນລ ແລະຄວາມຮັບຜິດຊອບຂອງ ລນລ ສາຂາ ຈໍາປາສັກ ໄດ້ມີຄວາມພະຍາຍາມແກ້ໄຂຜົນກະທົບຕໍ່ທຸລະກິດລັດບໍລິຫານເຮັດໃຫ້ປະຊາຊົນສາມາດທໍາການຜະລິດໄດ້ຢ່າງຕໍ່ເນື່ອງ ແລະມີຄວາມໝັ້ນທ່ຽງເຮັດໃຫ້ການຈັດຕັ້ງປະຕິບັດການນໍ້າເຂົ້ານໍ້າມັນເພື່ອສະໜອງລູກຄ້າໃນ 8 ເດືອນຜ່ານມາໄດ້ທັງໝົດ 29 ລ້ານກວ່າລິດ, ສາມາດຈໍາໜ່າຍນໍ້າມັນທຸກຊະນິດໄດ້ 34 ລ້ານກວ່າລິດ, ໃນນັ້ນ ແອັດຊັງພິເສດ 3,6 ແສນລິດ, ແອັດຊັງທໍາມະດາ 8,34 ລ້ານລິດ, ກາຊວນ 20,35 ລ້ານລິດ ແລະນໍ້າປະເພດອື່ນໆຈໍານວນໜຶ່ງ.

  ທ່ານ ຈັນຫອມ ດວງບຸບຜາ ກ່າວຕື່ມວ່າ: ຄຽງຄູ່ກັບການນໍ້າເຂົ້າ ແລະຈໍາໜ່າຍນໍ້າມັນໃຫ້ກັບສັງຄົມຢ່າງເປັນປົກຄະຕິ ແລະມີຄວາມຢຸດຕິທໍາໂປ່ງໃສຕໍ່ກັບລູກຄ້າແລ້ວທາງລັດວິສາຫະກິດນໍ້າມັນເຊື້ອໄຟລາວສາຂາແຂວງຈໍາປາສັກກໍ່ຍັງໄດ້ປະກອບສ່ວນມອບພັນທະໃຫ້ແກ່ລັດເປັນປະຈໍາ ແລະ ຕໍ່ເນື່ອງ, ຊຶ່ງໃນ 8 ເດືອນຜ່ານມາສາມາດມອບພັນທະໄດ້ 189 ກວ່າຕື້ກີບ, ພ້ອມຈະສູ້ຊົນນໍ້າເຂົ້າ ແລະຈໍາໜ່າຍນໍ້າມັນໃຫ້ໄດ້ໃນ 4 ເດືອນທ້າຍປີໃຫ້ໄດ້ຕາມແຜນປະຈໍາປີຂອງ ລນລ ວາງອອກ.

แชร์