ຜູ້ນຳ 3 ພັກ 3 ປະເທດ ເອກະພາບເພີ່ມຮ່ວມມືຂົງເຂດຕ່າງໆ

   ການພົບປະຜູ້ນຳ 3 ພັກ 3 ປະເທດລາວ-ຫວຽດນາມ-ກຳປູເຈຍທີ່ ສສ ຫວຽດນາມ ໄດ້ເປັນເອກະພາບກ່ຽວກັບຄວາມສຳຄັນຂອງສາຍພົວພັນທີ່ເປັນມູນເຊື້ອ, ສາມັກຄີມິດຕະພາບ ແລະຊະໜິດຕິດພັນລະຫວ່າງ 3 ພັກແລະ3 ປະເທດ ພ້ອມໄດ້ເປັນເອກະພາບຈະເພີ່ມທະວີການຮ່ວມມືໃນຂົງເຂດຕ່າງໆ; ເສີມຂະຫຍາຍປະສິດທິຜົນຂອງບັນດາກົນໄກຮ່ວມມືທີ່ມີໃນປະຈຸບັນ ແລະສືບຕໍ່ແລກປ່ຽນ, ຮ່ວມມືໃນຂົງເຂດຕ່າງໆໃນໄລຍະຕໍ່ໜ້າທັງນີ້ກໍເພື່ອຜົນປະໂຫຍດຂອງປະຊາຊົນສາມຊາດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ໃນພາກພື້ນ ແລະໃນໂລກ.

ວັນທີ 26 ກັນຍາ 2021,ທີ່ສຳນັກງານສູນກາງພັກກອມມູນິດຫວຽດນາມທີ່ນະຄອນຫຼວງຮ່າໂນ້ຍ,ສສ ຫວຽດນາມ,ໄດ້ມີການພົບປະຜູ້ນຳ 3 ພັກລາວຫວຽດນາມ-ກຳປູເຈຍ ລະຫວ່າງສະຫາຍ ທອງລຸນ ສີສຸລິດ, ເລຂາທິການໃຫຍ່ພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ, ສະຫາຍ ຫງວຽນ ຝູ ຈ້ອງ, ເລຂາ ທິການໃຫຍ່ພັກກອມມູນິດຫວຽດນາມ ແລະສົມເດັດອັກຄະມະຫາເສນາບໍດີ ເຕໂຈ ຮຸນເຊັນ, ປະທານພັກປະຊາຊົນກຳປູເຈຍ, ນາຍົກລັດຖະມົນຕີແຫ່ງລາຊາອານາຈັກກຳປູເຈຍ.

   ການພົບປະຄັ້ງນີ້, ຜູ້ນຳຂອງທັງ 3 ພັກ ໄດ້ຕີລາຄາສູງຕໍ່ຄວາມໝາຍຄວາມສຳຄັນຂອງການພົບປະ; ໄດ້ແຈ້ງໃຫ້ກັນຊາບກ່ຽວກັບສະພາບຂອງແຕ່ລະພັກ, ແຕ່ລະປະເທດ, ໃນນັ້ນລວມມີວຽກງານພັກ, ການພັດທະນາເສດຖະກິດ-ສັງຄົມ, ພິເສດແມ່ນບັນຫາທີ່ສາມປະເທດພວມສຸມໃສ່ການປ້ອງກັນ ແລະສະກັດກັ້ນການລະບາດຂອງພະຍາດໂຄວິດ-19.

   ຜູ້ນຳທັງສາມພັກໄດ້ແລກປ່ຽນກ່ຽວກັບສະພາບການຮ່ວມມືໃນໄລຍະຜ່ານມາ; ປຶກສາຫາລືກ່ຽວກັບທິດທາງການຮ່ວມມືໃນຕໍ່ໜ້າ; ພ້ອມກັນເປັນເອກະພາບກ່ຽວກັບຄວາມສຳຄັນຂອງສາຍພົວພັນທີ່ເປັນມູນເຊື້ອ, ສາມັກຄີມິດຕະພາບ ແລະສະໜິດຕິດພັນລະຫວ່າງສາມພັກ ແລະສາມປະເທດ.

   ຜູ້ນຳສາມປະເທດໄດ້ເປັນເອກະພາບຈະເພີ່ມທະວີການຮ່ວມມືໃນຂົງເຂດຕ່າງໆ; ເສີມຂະຫຍາຍປະສິດທິຜົນຂອງບັນດາກົນໄກຮ່ວມມືທີ່ມີໃນປະຈຸບັນ ແລະ ສືບຕໍ່ແລກປ່ຽນ,ຮ່ວມມືໃນຂົງເຂດຕ່າງໆໃນໄລຍະຕໍ່ໜ້າ, ເພື່ອຜົນປະໂຫຍດຂອງປະຊາຊົນສາມຊາດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະການພັດທະນາຢູ່ໃນພາກພື້ນ ແລະໃນໂລກ.

    ໃນໂອກາດດຽວກັນນີ້ສະຫາຍ ທອງລຸນ ສີສຸລິດ, ເລຂາທິການໃຫຍ່ພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ມີການພົບປະສອງຝ່າຍກັບສະຫາຍ ຫງວຽນ ຝູ ຈ້ອງ, ເລຂາທິການໃຫຍ່ພັກກອມມູນິດ ຫວຽດນາມ, ສະຫາຍ ຫງວຽນ ຊວນ ຟຸກ, ປະທານປະເທດແຫ່ງ ສສ ຫວຽດນາມ ແລະສົມເດັດ ອັກຄະມະຫາເສນາບໍດີ ເຕໂຈ ຮຸນເຊັນ, ປະທານພັກປະຊາຊົນກຳປູເຈຍ, ນາຍົກລັດຖະມົນຕີແຫ່ງລາຊາອານາຈັກກຳປູເຈຍ.

แชร์