419 ຮ້ານແລກປ່ຽນເງິນຕາ ຕົວແທນ ທທກ

ຂ່າວ: ຣັດສະໝີ ດວງສັດຈະ

   ເພື່ອເຮັດໃຫ້ການເຄື່ອນໄຫວບໍລິການຂອງຮ້ານແລກປ່ຽນເງິນຕາມີປະສິດທິຜົນ ແລະສອດຄ່ອງກັບກົນໄກການຄຸ້ມຄອງເງິນຕາຕ່າງປະເທດໃນໄລຍະໃໝ່ຊຶ່ງໄດ້ຫັນຮ້ານແລກປ່ຽນເງິນຕາທີ່ໄດ້ຮັບອະນຸຍາດຈາກທະນາຄານແຫ່ງ  ສປປ ລາວ (ທຫລ) ເປັນຮ້ານຕົວແທນຂອງທະນາຄານທຸລະກິດ (ທທກ) ໃນການບໍລິການແລກປ່ຽນເງິນຕາ.

  ອີງຕາມແຈ້ງການຂອງຫ້ອງການ ທຫລ ສະບັບເລກທີ 175/ຫກ, ວັນທີ 17 ກັນຍາ 2021 ໃຫ້ຮູ້ວ່າ: ປະຈຸບັນໃນທົ່ວປະເທດມີຮ້ານແລກປ່ຽນເງິນຕາຈໍານວນ 419 ຮ້ານ ທີ່ຕັ້ງຢູ່ນະຄອນຫຼວງວຽງຈັນ 199 ຮ້ານ, ສະຫວັນນະເຂດ 50 ຮ້ານ, ຈໍາປາສັກ 26  ຮ້ານ, ຫຼວງພະບາງ 22 ຮ້ານ, ບໍ່ແກ້ວ 20 ຮ້ານ, ບໍລິຄໍາໄຊ 18 ຮ້ານ, ຊຽງຂວາງ 15 ຮ້ານ, ອຸດົມໄຊ 14 ຮ້ານ, ຄໍາມ່ວນ 13 ຮ້ານ, ວຽງຈັນ ແລະໄຊຍະບູລີ ແຂວງລະ 9 ຮ້ານ, ຫຼວງນໍ້າທາ-ສາລະວັນແຂວງລະ 6 ຮ້ານ, ຜົ້ງສາລີ 5 ຮ້ານ, ຫົວພັນ 4 ຮ້ານ, ເຊກອງ 2 ຮ້ານ, ອັດຕະປື 1 ຮ້ານ, ແຂວງໄຊສົມບູນບໍ່ທັນມີ.

     ໃນຈໍານວນດັ່ງກ່າວເປັນຮ້ານຕົວແທນຂອງ 9 ທທກ ໃນນີ້ທະນາຄານການຄ້າຕ່າງປະເທດລາວມະຫາຊົນ ມີ 86 ຮ້ານ, ທະນາຄານພັດທະນາລາວ 124 ຮ້ານ, ທະນາຄານຮ່ວມທຸລະກິດລາວ-ຫວຽດ 89 ຮ້ານ, ທະນາຄານຫວຽດຕິນລາວ ຈໍາກັດ 85 ຮ້ານ, ທະນາຄານມາຣູຮານ ເຈແປນ ລາວ ຈໍາກັດ 11 ຮ້ານ, ທະນາຄານສົ່ງເສີມກະສິກໍາ ແລະທະນາຄານເອສທີທະນາຄານລະ 9 ຮ້ານ, ທະນາຄານຮ່ວມພັດທະນາ 4 ຮ້ານ ແລະທະນາຄານບີໄອຊີ ລາວ ຈໍາກັດ 2 ຮ້ານ.

 ເພື່ອເປັນບ່ອນອີງໃນການຈັດຕັ້ງປະຕິບັດ, ທຫລ ໄດ້ອອກຂໍ້ຕົກລົງສະບັບ ເລກທີ 525/ທຫລ, ລົງວັນທີ 15 ກັນຍາ 2021 ກ່ຽວກັບການກໍານົດອັດຕາແລກປ່ຽນຂອງ ທຫລ, ທທກ ແລະ ຮ້ານແລກປ່ຽນເງິນຕາໃຫ້ສອດຄ່ອງກັບກົນໄກຕະຫຼາດທີ່ມີການຄຸ້ມຄອງຂອງລັດ, ສ້າງເງື່ອນໄຂໃຫ້ລະບົບທະນາຄານສາມາດເຄື່ອນໄຫວບໍລິການແລກປ່ຽນເງິນຕາໄດ້ຢ່າງຄ່ອງຕົວ, ອັດຕາແລກປ່ຽນມີຄວາມສະຫງົບປະກອບສ່ວນເຂົ້າໃນການຮັກສາສະຖຽນລະພາບດ້ານເງິນຕາໂດຍກົມນະໂຍບາຍເງິນຕາຂອງ ທຫລ ມີໜ້າທີ່ກໍານົດອັດຕາແລກປ່ຽນອ້າງອີງຂອງ ທຫລ ລະຫວ່າງເງິນກີບກັບເງິນໂດລາສະຫະລັດປະຈໍາວັນແລະແຈ້ງອັດຕາແລກປ່ຽນອ້າງອີງດັ່ງກ່າວພາຍໃນເວລາ 08:10 ໂມງເຊົ້າຂອງທຸກໆວັນລັດຖະການເພື່ອໃຫ້ບັນດາ ທທກ ແລະຮ້ານແລກປ່ຽນເງິນຕານໍາໃຊ້ເປັນບ່ອນອີງໃນການກໍານົດອັດຕາແລກປ່ຽນຂອງຕົນ.

  ການແຈ້ງອັດຕາແລກປ່ຽນໃຫ້ແກ່ມວນຊົນແມ່ນ ທທກ ແລະຮ້ານແລກປ່ຽນເງິນຕາຕ້ອງແຈ້ງອັດຕາແລກປ່ຽນຂອງຕົນໃຫ້ມວນຊົນຊາບພາຍໃນເວລາ 09:00 ໂມງຂອງແຕ່ລະວັນ, ກໍລະນີມີການປ່ຽນແປງລະຫວ່າງວັນຕ້ອງແຈ້ງອັດຕາແລກປ່ຽນທີ່ໄດ້ປັບປ່ຽນນັ້ນເປັນແຕ່ລະໄລຍະພາຍໃນວັນດັ່ງກ່າວຢ່າງເຄັ່ງຄັດ, ການແຈ້ງອັດຕາແລກປ່ຽນນັ້ນຕ້ອງປະຕິບັດໃນຮູບແບບທີ່ຊັດເຈນຈະແຈ້ງຢູ່ສະຖານທີ່ບໍລິການ, ເວັບໄຊທ໌ ແລະຜ່ານສື່ສັງຄົມຮູບແບບອື່ນໆຂອງຕົນ. ອັດຕາແລກປ່ຽນທີ່ແຈ້ງນັ້ນຕ້ອງຖືກຕ້ອງຕາມການຈັດຕັ້ງປະຕິບັດຕົວຈິງສໍາລັບທຸກທຸລະກໍາຂອງຕົນ.

  ໃນກໍລະນີຫາກພົບເຫັນບຸກຄົນ ຫຼືນິຕິບຸກຄົນທີ່ບໍ່ແມ່ນຮ້ານແລກປ່ຽນເງິນຕາຕົວແທນຂອງ ທທກ ຕາມລາຍຊື່ດັ່ງກ່າວມີການເຄື່ອນໄຫວແລກປ່ຽນເງິນຕາໃຫ້ບັນດາອົງການຈັດຕັ້ງທາງພາກລັດ-ພາກເອກະຊົນຕະຫຼອດເຖິງພົນລະເມືອງລາວທຸກທ່ານແຈ້ງມາຍັງກົມນະໂຍບາຍເງິນຕາ, ທຫລ ຫຼືກົມຕໍາຫຼວດເສດຖະກິດ, ກະຊວງປ້ອງກັນຄວາມສະຫງົບຊາບ; ພ້ອມດຽວນັ້ນ, ຂໍໃຫ້ບັນດາທ່ານ, ພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານ, ທະຫານ ແລະຕໍາຫຼວດໃນທົ່ວປະເທດຈົ່ງມີສະຕິລະວັງຕົວໃນການໃຊ້ບໍລິການແລກປ່ຽນເງິນຕາຂອງຜູ້ບໍ່ໄດ້ຮັບອະນຸຍາດທັງນີ້ກໍ່ເພືອຮັບປະກັນສະເຖຍລະພາບດ້ານເສດຖະກິດ, ການເງິນ-ເງິນຕາຂອງຊາດ ແລະ ຂອງປະຊາຊົນເຮົາ.

แชร์