ອົງການກາແດງສະວິດເຊີແລນ ຊ່ວຍອາຫານຜູ້ປິ່ນປົວໂຄວິດສູນຄໍາມ່ວນ

   ຫວ່າງແລ້ວນີ້ທີ່ຫ້ອງວ່າການແຂວງຄໍາມ່ວນ, ຄະນະສະເພາະກິດຂັ້ນແຂວງເພື່ອປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ໄດ້ມີກອງປະຊຸມປຶກສາຫາລືກັບພາກສ່ວນທີ່ກ່ຽວຂ້ອງເພື່ອປະຕິບັດນະໂຍບາຍດ້ານມະນຸດສະທໍາຕໍ່ຜູ້ທີ່ເຂົ້າປິ່ນປົວຢູ່ສູນທີ່ທາງການແຂວງຄໍາມ່ວນໄດ້ກໍານົດໄວ້ໂດຍສະເພາະແມ່ນການຊ່ວຍເຫຼືອດ້ານອາຫານການກິນ ແລະນໍ້າດື່ມໃຫ້ແກ່ຜູ້ທີ່ເຂົ້າປິ່ນປົວຢູ່ສູນກັກກັນໃນໄລຍະການເພີ່ມທະວີຄວາມເຂັ້ມງວດໃນປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19, ໂດຍການເປັນປະທານຂອງທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນຄະນະສະເພາະກິດຂັ້ນແຂວງທັງເປັນປະທານອົງການກາແດງແຂວງມີທ່ານ ສົມສະອາດ ອຸ່ນສີດາ ຮອງເຈົ້າແຂວງຄໍາມ່ວນ, ມີບັນດາຜູ້ຕາງໜ້າຈາກພາກສ່ວນກ່ຽວຂ້ອງແຂວງ ແລະຕາງໜ້າອົງການກາແດງແຫ່ງປະເທດສະວິດເຊີ ແລນເຂົ້າຮ່ວມ.
   ທ່ານ ວິລິດ ພະສະຫວັດ ຜູ້ປະສານງານກັບອົງການກາແດງແຫ່ງປະທານສະວິດເຊີແລນໄດ້ວ່າ: ໃນການຈັດຕັ້ງປະຕິບັດກິດຈະກໍາຊ່ວຍເຫຼືອດ້ານອາຫານການກິນ ແລະນໍ້າດື່ມໃຫ້ແກ່ຜູ້ທີ່ເຂົ້າປິ່ນປົວຮັກສາອາການຢູ່ສູນກັກກັນໃນໄລຍະການເພີ່ມທະວີຄວາມເຂັ້ມງວດໃນປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແມ່ນສືບຕໍ່ຈາກການຈັດຕັ້ງປະຕິບັດໃນໄລຍະຜ່ານມາເນື່ອງຈາກເຫັນວ່າກິດຈະກໍາດັ່ງກ່າວແມ່ນມີຄວາມຈໍາເປັນໃນການຮັກສາສຸຂະພາບ ແລະ ພາລະນາ ໄມຂອງຜູ້ເຂົ້າກັກກັນ ແລະ ປິ່ນປົວພະຍາດຢ່າງເທົ່າທຽມກັນໂດຍໄດ້ຮັບອັດຕາກິນວັນລະ 30 ພັນກີບຕໍ່ 3 ຄາບ ເພື່ອນໍາໃຊ້ເຂົ້າໃນການຈັດຊື້ອາຫານ ແລະ ນໍ້າດື່ມ ໂດຍທາງອົງການກາແດງແຫ່ງປະເທດສະວິດເຊີແລນແມ່ນຕົກລົງເຫັນດີຊ່ວຍເຫຼືອທັງ 5 ສູນທົ່ວແຂວງ.
   ທ່ານ ນາງ ມະໄລເພັດ ສູນທອນນະວົງ ຜູ້ປະກອບການທຸລະກິດຮ້ານອາຫານພູເບ້ຍໄດ້ກ່າວວ່າ: ຂ້າພະເຈົ້າໃນນາມທີ່ໄດ້ຮັບການມອບໝາຍຈາກຄະນະສະເພາະກິດຂັ້ນແຂວງເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຈະຮັກສາມາດຖານ ແລະຄຸນນະພາບຂອງອາຫານໃຫ້ຖືກຫຼັກອະນາໄມເພື່ອແນໃສ່ສົ່ງເສີມສຸຂະພາບຂອງຜູ້ເຂົ້າກັກກັນຈໍາກັດບໍລິເວນ ແລະປິ່ນປົວພາຍໃນສູນຊຶ່ງຈະໄດ້ເລີ່ມຈັດຕັ້ງປະຕິບັດນັບແຕ່ຕອນເຊົ້າ ຂອງວັນທີ 27 ກັນຍາ 2021 ໂດຍຈະມີການຕິດຕາມ, ກວດກາຈາກຄະນະກໍາມະການທີ່ກ່ຽວຂ້ອງແຂວງຕື່ມອີກ.

ຂ່າວ-ພາບ: ແຂວງຄໍາມ່ວນ

แชร์