ຖວທ ໄຊຍະ ຊີ້ນຳວຽກທ່ອງທ່ຽວໄຊສະຖານ

ຂ່າວ: ບຸນທີ

   ເມື່ອບໍ່ດົນມານີ້, ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງໄຊຍະບູລີ ນໍາພາໂດຍທ່ານ ບຸນທະວີ ບຸນຊູຮັກ ຮອງຫົວໜ້າພະແນກ ຖວທ ແຂວງພ້ອມດ້ວຍຫົວໜ້າ, ຮອງຫົວໜ້າຂະແໜງການກ່ຽວຂ້ອງໄດ້ລົງໃຫ້ທິດຊີ້ນໍາວຽກງານທ່ອງທ່ຽວ, ການສ້າງບ້ານ, ກົມກອງ, ຄອບຄົວວັດທະນະທໍາຕິດພັນກັບ ວາລະແຫ່ງຊາດທີ່ພະແນກ ຖວທ ໄດ້ກໍານົດສະເພາະອອກມາເພື່ອພ້ອມກັນຈັດຕັ້ງປະຕິບັດໃຫ້ໄດ້ຕາມລະດັບຄາດໝາຍຢູ່ເມືອງໄຊສະຖານ ແຂວງໄຊຍະບູລີ.

   ໃນໂອກາດລົງມາໃນຄັ້ງນີ້, ທ່ານ ບຸນທະວີ ບຸນຊູຮັກ ຮອງຫົວໜ້າພະແນກ ຖວທ ແຂວງໄດ້ແຈ້ງຈຸດປະສົງ ແລະເປົ້າໝາຍຂອງທີມງານພະແນກ ຖວທ ໃຫ້ຄະນະ ພັກເມືອງໄຊສະຖານໄດ້ຮັບຮູ້ເພື່ອເປັນບ່ອນອີງ, ຈາກນັ້ນ, ທ່ານ ນາງ ຄໍາຜູ ສະຫງວນສິດ ຮອງເຈົ້າເມືອງໄຊສະຖານຜູ້ຊີ້ນໍາວຽກງານຂົງເຂດວັດທະນະທໍາສັງຄົມໄດ້ເປີດເຜີຍວ່າ: ເມືອງໄຊສະຖານເປັນເມືອງໜຶ່ງທີ່ນອນຢູ່ໃນ 11 ເມືອງຂອງແຂວງໄຊຍະບູລີ, ເປັນເມືອງພູດອຍ, ຄ້ອຍຊັນປະກອບ ມີ 21 ບ້ານ, ມີພົນລະເມືອງທັງ ໝົດ 16.568 ຄົນ ຍິງ 8.740 ຄົນ, ມີ 201 ໜ່ວຍຄຸ້ມຄອງ, ເປັນຊົນເຜົ່າໄປຣກວມເອົາເກືອບ 100%, ປະຊາຊົນໃນເມືອງສ່ວນຫຼາຍແມ່ນຢຶດຖືອາຊີບປູກຝັງ, ລ້ຽງສັດໃຫຍ່ໂດຍອາໄສທີ່ຕັ້ງພູມສັນຖານຂອງເມືອງເໝາະແກ່ການປູກຝັງເຊັ່ນ: ປູກຊາ (ແຈ) ທີ່ຂຶ້ນຊື່ສຽງຮຽງນາມຊາໝ້ຽງແຈເມືອງໄຊສະຖານ.

   ປະຈຸບັນເມືອງໄຊສະຖານໄດ້ປະກາດຮັບຮອງເປັນບ້ານວັດທະນະທໍາໄດ້ແລ້ວ 12 ບ້ານ ແລະສ້າງຄອບຄົວວັດທະນະທໍາໄດ້ທັງໝົດ 2.789 ຄອບຄົວ ແລະປະຈຸບັນນີ້ເມືອງຍັງສືບຕໍ່ສ້າງ, ປະເມີນຜົນທຸກໆ 3 ເດືອນ, 6 ເດືອນ ແລະ 1 ປີ ໃນການສ້າງບ້ານ, ກົມກອງ, ຄອບຄົວວັດທະນະທໍາຕິດພັນກັບການທ່ອງທ່ຽວໃນວາລະ ແຫ່ງຊາດທີ່ທາງພະແນກ ຖວທ ກໍານົດເປັນແຜນສະເພາະເພື່ອເປັນບ່ອນອີງໃນການກວດກາຕິດຕາມເປັນແຕ່ລະໄລຍະ, ຈາກນັ້ນ, ໄດ້ລົງເບິ່ງສະຖານທີ່ໂຮງງານອົບຊາ ຫຼືເອີ້ນກັນວ່າໂຮງງານຂົ້ວຊາທີ່ບ້ານສະແມດນ້ອຍ, ພ້ອມດຽວກັນນີ້, ກໍໄດ້ລົງເບິ່ງຈຸດຊົມວິວທີວທັດຕົວ ເມືອງໄຊສະຖານ ຈໍານວນ 2 ຈຸດ.

แชร์