ເຈົ້າແຂວງບໍ່ແກ້ວ ຊຸກຍູ້ປະຕິບັດ 2 ວາລະແຫ່ງຊາດ

ຂ່າວ: ສາຍສະໝອນ ແກ້ວວິສິດ

  ເມື່ອບໍ່ດົນມານີ້, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວພ້ອມຄະນະ ແລະພະແນກການກ່ຽວຂອງລົງຕິດຕາມຊຸກຍູ້ການຈັດຕັ້ງປະຕິບັດວຽກງານຮອບດ້ານປະຈໍາ 9 ເດືອນປີ 2021 ແລະການຈັດຕັ້ງປະຕິບັດ 2 ວາລະແຫ່ງຊາດຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ການແກ້ໄຂບັນຫາຢາເສບຕິດຢູ່ເມືອງຜາອຸດົມເພື່ອຮັບຟັງການລາຍງານດ້ານດີ, ດ້ານອ່ອນ, ບັນຫາຂໍ້ຄົງຄ້າງ, ຄວາມຫຍຸ້ງຍາກໃນການຈັດຕັ້ງປະຕິບັດໃນໄລຍະຜ່ານມາເພື່ອໃຫ້ຄະນະນຳຂອງແຂວງ, ພະແນກການມີທິດຊີ້ນຳ, ແນະນຳວິທີການຕ່າງໆເປັນບ່ອນອີງໃນການຈັດຕັ້ງປະຕິບັດເຮັດໃຫ້ວຽກງານ 3 ເດືອນ ທ້າຍປີ 2021 ໄດ້ມີຜົນສຳເລັດຕາມຄາດໝາຍທີ່ວາງໄວ້.

   ທ່ານ ຈັນທອນ ພົນທະລາ ເຈົ້າເມືອງຜາອຸດົມໄດ້ລາຍງານການເຄື່ອນໄຫວວຽກງານຮອບດ້ານປະຈໍາ 9 ເດືອນຜ່ານມາ ແລະທິດທາງແຜນການ 3 ເດືອນທ້າຍປີ 2021 ເປັນຕົ້ນແມ່ນວຽກງານການເມືອງ-ແນວຄິດ, ວຽກງານ ປກຊ-ປກສ, ວຽກງານວັດທະນາທໍາ-ສັງຄົມ, ວຽກງານນິຕິບັນຍັດ ແລະ ຕຸລາການ, ວຽກງານ ຫ້ອງວ່າການເມືອງ, ວຽກງານເສດຖະກິດມາຮອດປະຈຸບັນປະຕິ ບັດລາຍຮັບໄດ້ທັງໝົດ 19,4 ຕື້ກວ່າກີບ ທຽບແຜນການປີປະຕິ ບັດໄດ້ 64,43%, ຮັບດຸນດ່ຽງ ຈາກແຂວງປະຕິບັດໄດ້ 18,3 ຕື້ ກວ່າກີບທຽບແຜນການປີປະຕິບັດໄດ້ 67,19%, ລາຍຮັບພາຍໃນເມືອງປະຕິບັດໄດ້ 1,1 ຕື້ກວ່າກີບ ທຽບແຜນການປີປະຕິບັດໄດ້39,25%, ລາຍຈ່າຍປະຕິບັດໄດ້ 19,2 ຕື້ກວ່າກີບ ທຽບແຜນການປີປະຕິບັດໄດ້ 63,73%, ສ່ວນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນແມ່ນໄດ້ແບ່ງຄວາມຮັບຜິດຊອບອັນເປັນລະອຽດໃຫ້ແຕ່ລະພາກສ່ວນ, ສຸມໃສ່ຊຸກຍູ້ສົ່ງເສີມ ແຫຼ່ງລາຍຮັບທີ່ມີ, ຂຸດຄົ້ນທ່າແຮງທີ່ບົ່ງຊ້ອນໃຫ້ເປັນບ່ອນສ້າງລາຍຮັບເຂົ້າງົບປະມານກໍ່ຄືຊຸກຍູ້ສົ່ງເສີມການປູກການລ້ຽງໃຫ້ຫຼາຍການເປັນສິນຄ້າ ແລະການແກ້ໄຂບັນຫາຢາເສບຕິດແມ່ນເນັ້ນໃສ່ 2 ກຳລັງເປັນເຈົ້າການຈັດຕັ້ງປະຕິບັດ, ພ້ອມຈະສ້າງເປັນແຜນການອັນລະອຽດໃຫ້ຖືກທິດຕາມຂັ້ນເທິງວາງອອກ.

   ຈາກນັ້ນ, ທ່ານ ບົວຄົງ ນາມມະວົງ ໄດ້ເນັ້ນໜັກໃຫ້ຄະນະນຳຂອງເມືອງ ແລະທຸກພາກສ່ວນຕ້ອງສືບຕໍ່ເປັນເຈົ້າການສຶກສາອົບຮົມການເມືອງແນວຄິດໃນຖັນແຖວພະນັກງານຕະຫຼອດຮອດປະຊາຊົນບັນດາເຜົ່າໃຫ້ກຳແໜ້ນຕໍ່ແນວທາງນະໂຍບາຍຂອງພັກ-ລັດ, ເພີ່ມທະວີເອົາໃຈໃສ່ວຽກງານ ປກຊ-ປກສ ຕິດພັນກັບການປ້ອງກັນການລະບາດພະຍາດໂຄວິດ-19 ໃຫ້ທັນການ, ສືບຕໍ່ສ້າງແຜນແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ຕິດພັນກັບແຜນພັດທະນາເສດຖະກິດ-ສັງ ຄົມ 5 ປີຂອງເມືອງ, ຕ້ອງຮູບປັບປຸງແບບແຜນວິທີເຮັດວຽກໃນຊ່ວງວິດກິດໂຄວິດ-19 ແນໃສ່ຫຼຸດຜ່ອນຜົນກະທົບ ແລະເຮັດໃຫ້ມີຜົນສຳເລັດຕາມລຳດັບ, ສຳລັບການ ສະເໝີຂອງເມືອງນັ້ນ, ຈະໃຫ້ພະແນກກ່ຽວຂ້ອງຊ່ວຍ ແລະແກ້ໄຂຕາມເງື່ອນໄຂຂອງສະພາບຄວາມເປັນຈິງ.

แชร์