ສັງທອງ ຖືກະສິກຳ ເປັນເສົາຄໍ້າ

ຂ່າວ: ຣັດສະໝີ ດວງສັດຈະ

  ສັງທອງ, ນະຄອນຫຼວງວຽງຈັນ ເປັນເມືອງທີ່ມີທີ່ຕັ້ງ, ເງື່ອນໄຂ ແລະທ່າແຮງທີ່ບົ່ມຊ້ອນຫຼາຍດ້ານໂດຍສະເພາະກະສິກໍາ, ບໍລິການ ແລະທ່ອງທ່ຽວ, ໃນຜ່ານມາເມືອງສາມາດຂຸດຄົ້ນ ແລະ ເອົາພາກກະສິກໍາເປັນທ່າແຮງຕົ້ນຕໍທີ່ມີການຜະລິດຕິດພັນກັບການພັດທະນາຄຸນນະພາບຜະລິດຕະພັນ; ທົ່ວເມືອງມີເນື້ອທີ່ທັງໝົດ 75.982 ເຮັກຕາ; ເປັນພື້ນທີ່ພູເນີນສູງ ກວມ 40% ຂອງເນື້ອທີ່ທັງໝົດ, ສະເພາະເນື້ອທີ່ກະສິກໍາມີ 29 ພັນກວ່າ ເຮັກຕາເໝາະແກ່ການປູກຝັງ ແລະລ້ຽງສັດ; ພ້ອມນັ້ນ, ຍັງລະບົບໂຄງລ່າງພື້ນຖານຂະຫຍາຍຕົວທີ່ສະດວກແກ່ການຜະລິດກະສິກໍາ ແລະການບໍລິການດ້ານຕ່າງໆ; ນອກນັ້ນ, ຍັງມີບໍ່ຄໍາ, ບໍ່ກົ່ວ, ບໍ່ຫີນ ເເລະແຮ່ຊາຍ.

  ທ່ານ ສັງວອນ ພິມມະສອນ ຮອງເຈົ້າເມືອງສັງທອງ ແຈ້ງໃຫ້ຮູ້ວ່າ: ທົ່ວເມືອງມີພົນລະເມືອງທັງໝົດ 32 ພັນກວ່າຄົນ, ຍິງ 16 ພັນກວ່າຄົນ, ລວມມີ 35 ບ້ານ; ເສດຖະກິດ-ສັງຄົມຂະຫຍາຍຕົວຢ່າງຕໍ່ເນື່ອງ 7,4 % ຕໍ່ປີ, ໂຄງປະກອບເສດຖະກິດມີການຫັນປ່ຽນຕາມທິດທີ່ຕັ້ງໜ້າ,ລວມຍອດຜະລິດຕະພັນພາຍໃນໄດ້ 1.114 ຕື້ກີບ, ລາຍຮັບສະເລ່ຍຕໍ່ຫົວຄົນບັນລຸ 34 ລ້ານກີບ ຫຼືເທົ່າກັບ 3.885 ໂດລາຕໍ່ຄົນຕໍ່ປີສາມາດລຶບລ້າງຄອບຄົວທຸກຍາກໄດ້ 100%, ໂຄງປະກອບເສດຖະກິດຕາມຂະແໜງການໄດ້ຂະຫຍາຍຕົວຕາມທິດໂດຍຖືເອົາວຽກງານກະສິກໍາເປັນຫຼັກໃນນີ້ເນື້ອທີ່ປູກເຂົ້ານາປີມີທັງໝົດ 8,5 ພັນເຮັກຕາ ສາມາດເກັບກູ້ຜົນຜະລິດເຂົ້ານາແຊງ ແລະນາປີໄດ້ທັງໝົດ 37 ພັນກວ່າໂຕນ, ສະເລ່ຍໃສ່ຫົວຄົນໄດ້ 1.175 ໂຕນຕໍ່ຄົນ; ປູກພືດອຸດສາຫະກໍາເນື້ອທີ່ແຜນການ 1.155 ເຮັກຕາ ປະຕິບັດໄດ້ 97,4%; ປູກໄມ້ໃຫ້ໝາກປະຕິບັດໄດ້ 117,59%; ພ້ອມນັ້ນ; ມີສັດລ້ຽງທັງໝົດ 128.155 ໂຕ, ລ້ຽງເປັນຟາມມີ 11 ຟາມ, ມີສັດລ້ຽງ 13,2 ພັນໂຕ ໃນນີ້ມີງົວ, ແບ້, ໝູ, ໄກ່ ແລະ ເຕົ່າ, ພິເສດເມືອງສັງທອງຮັບການສະໜັບສະໜູນຈາກໂຄງການນິວຊີແລນເປັນໂຄງການສົ່ງເສີມປະຊາຊົນລ້ຽງງົວໃຫ້ມີຄຸນນະພາບຊີ້ນ ຫຼືການທອມ ງົວຄຸນນະພາບເພື່ອສົ່ງຂາຍໃຫ້ຕະຫຼາດພາຍໃນ ແລະຕ່າງປະເທດ, ປະຈຸບັນມີຄອບຄົວທີ່ເຂົ້າໃນໂຄງການ 26 ຄອບຄົວ, ໂຄງການປູກຫຍ້າໃຫ້ອາຫານສັດ 63,2 ເຮັກຕາ, ສັກວັກແຊງກັນພະຍາດ, ຂ້າພະຍາດກາຟາກ ແລະສ້າງຮົ້ວງົວໃນໂຄງການ; ວຽກງານຊົນລະປະທານ, ທົ່ວເມືອງມີ 10 ໂຄງການ ໃນນີ້ມີ 5 ສະຖານນີສູບນໍ້າ, ອ່າງເກັບນໍ້າ 4 ແຫ່ງ ແລະ1 ຝາຍນໍ້າລົ້ນ (ບ້ານວັງມ້າ) ສາມາດຕອບສະໜອງການຜະລິດໄດ້ 1,8 ພັນກວ່າເຮັກຕາ,ປະຈຸບັນນໍາໃຊ້ໄດ້ 3 ແຫ່ງເຫຼືອ 2 ແຫ່ງ ຍັງກໍ່ສ້າງສ້ອມແປງບໍ່ທັນສໍາເລັດ.

   ທິດທາງພັດທະນາໃນຕໍ່ໜ້າ, ການພັດທະນາມີຄວາມສົມສ່ວນກົມກຽວລະຫວ່າງໂຄງປະກອບເສດຖະກິດກະສິກໍາປ່າໄມ້ຕິດພັນກັບອຸດສາຫະກໍາປຸງແຕ່ງ, ຫັດຖະກໍາ ແລະການບໍລິການໂດຍຖືເອົາການຜະລິດກະສິກໍາເປັນເສົາຄໍ້າ, ປົກປັກຮັກສາສິ່ງແວດລ້ອມ, ປ່າສະຫງວນແຫ່ງຊາດພູພະນັງ, ປ່າປ້ອງກັນ, ປ່າຕົ້ນນໍ້າ, ຂະຫຍາຍເນື້ອທີ່ສີຂຽວປົກຫຸ້ມໃຫ້ໄດ້ 75% ຂຶ້ນໄປ, ຮັກສາແຫຼ່ງນໍ້າທໍາມະຊາດບໍ່ໃຫ້ບົກແຫ້ງ, ຮູ້ນໍາໃຊ້ຊັບພະຍາກອນທໍາມະຊາດ, ພັດທະນາແຫຼ່ງທ່ອງທ່ຽວທໍາມະຊາດ, ປະຫວັດສາດ ແລະວັດທະນະທໍາ; ຫັນເປັນຕົວເມືອງດ້ວຍການສ້າງ 3 ເຂດພັດທະນາຄື: ເຂດທີ 1 ບັນດາບ້ານທີ່ຕັ້ງລຽບຕາມແມ່ນໍ້າຕອນ 16 ບ້ານ ເປັນເຂດປູກເຂົ້າ, ພືດຜັກ ແລະເຂດທ່ອງທ່ຽວທາງປະຫວັດສາດ, ທໍາມະຊາດ; ເຂດທີ 2: ໝູ່ບ້ານຢູ່ລຽບແມ່ນໍ້າຂອງ 13 ບ້ານເປັນເຂດອຸດສາຫະກໍາ-ການຄ້າ, ການບໍລິການທ່ອງທ່ຽວແມ່ນໍ້າຂອງ ແລະການຜະລິດກະສິກໍາສະອາດ; ເຂດທີ 3: ໝູ່ບ້ານທີ່ຕັ້ງລຽບສາຍນໍ້າສັງ 6 ບ້ານ ເປັນເຂດລ້ຽງສັດໃຫຍ່, ປູກພືດອຸດສາຫະກໍາ ແລະທ່ອງທ່ຽວທໍາມະຊາດ.

แชร์