ໂຄງການຟາມລ້ຽງງົວ ແລະຟາມລ້ຽງໝູເປັນສິນຄ້າແຂວງຜົ້ງສາລີ ຄາດໄດ້ລ້ຽງ ແລະຈໍາໜ່າຍໃນປີ 2022

    ໃນທ້າຍອາທິດທີ່ຜ່ານມານີ້, ທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີພ້ອມດ້ວຍຂະແໜງການທີ່ກ່ຽວຂ້ອງຂັ້ນແຂວງລົງເຄື່ອນໄຫວຕິດຕາມຊຸກຍູ້ໂຄງການຟາມລ້ຽງງົວ ແລະ ຟາມລ້ຽງໝູເປັນສິນຄ້າຂອງ ບໍລິສັດ ບຸນທະວິໄຊ ກໍ່ສ້າງ, ສ້ອມແປງເຄຫາສະຖານ, ຂົວ-ທາງ ແລະ ຊົນລະປະທານ.

  ທ່ານ ເຫຼັກ ສຸກສັນ ອຳນວຍການບໍລິສັດ ບຸນທະວິໄຊ ກໍ່ສ້າງ, ສ້ອມແປງເຄຫາສະຖານ, ຂົວ-ທາງ ແລະ ຊົນລະປະທານ ລາຍງານວ່າ: ໂຄງການຟາມລ້ຽງງົວແມ່ນຕັ້ງຢູ່ເຂດບ້ານພູນັ່ງເກົ່າ ເມືອງບຸນເໜືອ ແຂວງຜົ້ງສາລີ, ເປັນການລົງທຶນດ້ວຍເອກະຊົນ 100%, ມີມູນຄ່າການລົງທຶນ 48,60 ຕື້ກີບ ແລະມີເນື້ອທີ່ສໍາປະທານດິນລັດຈໍານວນ 97 ເຮັກຕາ, ປະຈຸບັນທາງບໍລິສັດກຳລັງທະລຸເສັ້ນທາງອ້ອມຂອບເຂດດິນທີ່ທັງບໍລິສັດສໍາປະທານໃນຈໍານວນ 97 ເຮັກຕາ ໄລຍະທາງປະມານ 3 ກິໂລແມັດ, ຂະຫຍາຍເສັ້ນທາງອ້ອມຂອບເຂດດິນທີ່ທັງບໍລິສັດສໍາປະທານໃນຈໍານວນ 97 ເຮັກຕາ ໄລຍະທາງປະມານ 5 ກິໂລແມັດ, ທະລຸເສັ້ນທາງພາຍໃນຟາມໄລຍະທາງ 2 ກິໂລແມັດ, ປັບສະຖານທີ່ສໍາລັບຕັ້ງຄອກລ້ຽງສັດ, ຫ້ອງການ, ບ່ອນເກັບມ້ຽນຫຍ້າໝັກ-ຫຍ້າແຫ້ງບ່ອນເກັບມ້ຽນອາຫານສັດ ແລະພື້ນທີ່ສໍາລັບກໍ່ສ້າງອ່າງເກັບນໍ້າຈັດຕັ້ງປະຕິບັດໄດ້ 60%, ໄຖ່ພື້ນທີ່ສໍາລັບປູກຫຍ້າເນື້ອທີ່ 15 ເຮັກຕາ ແລະໄດ້ປູກຫຍ້າລູຊີ, ຫຍ້າເນເປີຍ ແລະຫຍ້າຫວານ, ຊຶ່ງມາຮອດປະຈຸນບັນໜ້າວຽກດັ່ງກ່າວແມ່ນສາມາດຈັດຕັ້ງປະຕິບັດໄດ້ 80%.

   ສ່ວນຟາມລ້ຽງໝູແມ່ນຕັ້ງຢູ່ ເຂດບ້ານເດີນກິລາ ເມືອງບຸນເໜືອ ແຂວງຜົ້ງສາລີ, ເປັນການລົງທຶນດ້ວຍເອກະຊົນ 100% ມີມູນຄ່າການລົງທຶນ: 13,49 ຕື້ກີບ ມີເນື້ອທີ່ທັງໝົດ 22.470 ຕາແມັດ ເນື້ອທີ່ທີ່ນໍາໃຊ້ເຂົ້າໃນໂຄງການແມ່ນເປັນພື້ນທີ່ສ່ວນບຸກຄົນ (ທີ່ເປັນກໍາມະສິດຂອງເຈົ້າຂອງກິດຈະການເອງ 100%) ປະຈຸບັນທາງບໍລິສັດຕັ້ງປະຕິບັດແມ່ນສຳເລັດແມ່ນ ທະລຸ, ເປີດກ້ວາງເສັ້ນທາງ, ວາງທໍ່ເສັ້ນທາງເຂົ້າເຖີງຟາມ ໄລຍະ 6,5 ກິໂລແມັດ, ປັບສະຖານທີ່ຕັ້ງຫ້ອງການ, ຄອກສັດ ແລະສາງເກັບມ້ຽນອາຫານ, ຕັ້ງຫ້ອງການ ແລະເຮືອນພັກພະນັກງານ, ຕັ້ງສາງເກັບມ້ຽນອາຫານ ສໍາເລັດ 50%, ຕັ້ງຄອກຫມູອະນຸບານ 1 ຫຼັງ ຂະຫນາດ 14 ແມັດ x 75 ແມັດ ສໍາເລັດ 50%, ຕັ້ງຄອກໝູອະນຸບານ 3 ຫຼັງ ຂະໜາດ 14 ແມັດ x 75 ແມັດ ສໍາເລັດ 50%. ສຳລັບວຽກທີ່ຈະສືບຕໍ່ຈັດຕັ້ງປະຕິບັດຕໍ່ໜ້າ ແມ່ນກໍ່ສ້າງສາງເກັບມ້ຽນອາຫານໃຫ້ສໍາເລັດ, ສືບຕໍ່ກໍ່ສ້າງບັນດາຄອກລ້ຽງໝູ 6 ຫຼັງໃຫ້ສໍາເລັດ, ສືບຕໍ່ກໍ່ສ້າງລະບົບນໍ້າໃຊ້ໃນຟາມ, ກໍ່ສ້າງໄຟຟ້າທີ່ຈະນໍາໃຊ້ເຂົ້າໃນຟາມຊຶ່ງໄດ້ຈາກ 3 ແຫຼ່ງຄື: (ຈາກໄຟຟ້ານໍ້າຢອດ, ຈາກແສງຕາເວັນ ແລະ ຈາກໄບໂອແກ້ສ), ລ້ອມຮົ້ວອ້ອມຟາມເຊື່ງມາຄວາມຍາວ 700 ແມັດ ແລະ ກໍ່ສ້າງເຮືອນສໍາລັບເກັບນໍ້າເຊື່ອຄາດວ່າຕົ້ນປີ 2022 ໃຫ້ໄດ້ນໍາເຂົ້າມາລ້ຽງໃນຟາມ ແລະ ໃຫ້ໄດ້ຈໍາໜ່າຍໝູຊີ້ນໃນຕະຫຼາດເມືອງບຸນເໜືອໃນກາງປີ 2022. ໃນໂອກາດນີ້,

ທ່ານເຈົ້າແຂວງຜົ້ງສາລີໄດ້ກ່າວສະແດງຄວາມຍ້ອງຍໍຊົມເຊີຍມາຍັງບໍລິສັດທີ່ລົງທຶນໃນການສ້າງຟາມງົວ ແລະ ຟາມໝູຖ້າຫາກວ່າໂຄງການດັ່ງກ່າວເກີດຂຶ້ນ ມັນຈະສ້າງໃຫ້ເສດຖະກິດ-ສັງຄົມຂອງແຂວງມີການຂະຫຍາຍຕົວສູງພ້ອມກັນນີ້, ທ່ານເຈົ້າແຂວງຍັງໄດ້ເນັ້ນໃຫ້ບໍລິສັດຈົ່ງດຳເນີນທຸລະກິດຕາມເຕັກນິກຂອງກະສີກຳຢ່າງຖືກຕ້ອງໂດຍສະເພາະການເອົາໃຈໃສ່ໃນການບົວລະບັດສັດ,ໂຄກສັດ,ເພື່ອເຮັດໃຫ້ສັດມີຄວາມອຸດົມສົມບູນ ແລະຈຳໜ່າຍພາຍໃນແຂວງຢ່າງທົ່ວເຖິງ.

ພາບ-ຂ່າວ: ແສງຄຳ ສາລີວັນ

แชร์