ເມືອງແກ້ວອຸດົມ ປະເມີນມາດຖານສ້າງບ້ານ ແລະຄອບຄົວວັດທະນະທຳ

  ໃນວັນທີ 21 ກັນຍາຜ່ານມານີ້ ທ່ານ ພູທອງ ພົງໄຊພົນ ວ່າ ການຫົວໜ້າຫ້ອງການຖະແຫຼງຂ່າວວັດທະນະທຳ ແລະທ່ອງທຽ່ວ ເມືອງແກ້ວອຸດົມ ແຂວງ ວຽງຈັນພ້ອມດ້ວຍທີມງານໄດ້ລົງປະເມີນມາດຖານ ແລະເງື່ອນໄຂການສ້າງບ້ານ, ຄອບຄົວ ແລະບຸກຄົນວັດທະນະທຳບ້ານຖິ່ນແກ້ວ ເມືອງແກ້ວອຸດົມ.

  ທ່ານ ນາງ ຄູນຄຳ ຫຼວງອະໄພ ເລຂາພັກບ້ານ ນາຍບ້ານໆຖິ່ນແກ້ວ ເມືອງແກ້ວອຸດົມໄດ້ລາຍງານການເມືອງຂອງບ້ານໃຫ້ຮູ້ວ່າ: ບ້ານຖີ່ນ ແກ້ວເປັນບ້ານເທສະບານຂອງ ເມືອງແກ້ວອຸດົມ ມີເນື້ອທີ່ທັງໝົດ 552,24 ເຮັກຕາ,ມີ 220 ຫຼັງຄາ, ມີ 193 ຄອບຄົວ, ມີປະຊາກອນ ທັງໝົດ 1.048 ຄົນ, ຍິງ 523 ຄົນ, ແບ່ງເປັນ 18 ໜ່ວຍສາມັກຄີ, ບ້ານຖິ່ນແກ້ວໄດ້ມີອາຊີບຕົ້ນຕໍ ເປັນຊາວຄ້າຂາຍກວມເອົາ 80%, ພະນັກງານສັງກັດລັດ 10%, ກຳມະ ກອນ 10%, ພາຍໃນບ້ານມີ ເສັ້ນທາງຄົມມະນາຄົມທຽວໄດ້ຕະຫຼອດປີ, ມີສະຖານທີ່ຈອດລົດ, ໃນນີ້ມີຕະຫຼາດໃຫຍ່ ຊຶ່ງຕັ້ງຢູ່ໃຈກາງເທສະບານບ້ານ-ເມືອງ ເປັນ ແຫຼ່ງການຂະຫຍາຍຕົວດ້ານເສດ ຖະກິດ, ບ້ານຖີ່ນແກ້ວໄດ້ພັດທະນາບ້ານ, ສາມາດໄດ້ຮັບໃບຮັບຮອງເປັນບ້ານ 3 ສະອາດ, ບ້ານປ້ອງກັນຄວາມສະຫງົບ, ບ້ານປອດຄະດີ, ບ້ານແບບຢ່າງປະຕິບັດກົດໝາຍ ແລະໄດ້ໜ່ວຍພັກແຂງ-ປອດໃສ ເຂັ້ມແຂງ, ໜັກແໜ້ນ 2 ປີຊ້ອນ.

  ຈາກນັ້ນທ່ານ ພູທອງ ພົງໄຊພົນ ວ່າການ ຫົວໜ້າຫ້ອງການ ຖວທ ເມືອງແກ້ວອຸດົມໄດ້ຜ່ານດຳລັດ ເລກທີ 123/ລບ, ລົງວັນທີ 16 ກຸມພາ 2021 ວ່າດ້ວຍການສ້າງຄອບຄົວ ແລະບ້ານວັດທະນະທຳໃຫ້ຮູ້ວ່າ: ດຳລັດສະບັບນີ້ກຳນົດຫຼັກການ ແລະລະບຽບການໃນການຄຸ້ມຄອງ ແລະກວດກາວຽກງານສ້າງຄອບຄົວ ແລະບ້ານວັດທະນະທຳເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວມີຄວາມເປັນເອກະພາບ, ມີປະສິດຕິພາບ ແລະມີປະສິດທິຜົນແນໃສ່ກໍ່ ສ້າງຮາກຖານການເມືອງໃຫ້ໜັກແໜ້ນເຂັ້ມແຂງ, ຊຸກຍູ້ການພັດທະນາດ້ານວັດຖຸ ແລະຈິດໃຈຂອງຄອບຄົວ ແລະບ້ານໃຫ້ດີຂຶ້ນ, ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ, ສ້າງສັນຕິເຄົາລົບ ແລະປະຕິບັດກົດໝາຍ, ອະນຸລັກຮັກສາ, ສົ່ງເສີມຄຸນຄ່າມູນເຊື້ອວັດທະນະທຳອັນດີງາມຂອງຊາດ, ຂອງເຜົ່າ, ເລືອກເຟັ້ນ ແລະຮັບເອົາສິ່ງຍອດຍິ່ງທີ່ສອດຄ່ອງທາງດ້ານວັດທະນະທຳຂອງຍຸກສະໄໝປະກອບສ່ອນເຂົ້າໃນການພັດທະນາເສດຖະກິດ-ສັງຄົມຂອງຊາດ.

  ສຳລັບມາດຖານການສ້າງຄົນວັດທະນະທຳປະກອບດ້ວຍ 6 ມາດຖານ, ມາດຖານການສ້າງຄອບຄົວ ວັດທະນະທຳປະກອບດ້ວຍ 5 ມາດຖານ, ມາດຖານການສ້າງບ້ານວັດທະນະທຳປະກອບດ້ວຍ 5 ມາດຖານ ແລະບາດກ້າວການສ້າງບ້ານວັດທະນະທຳ (ໂດຍຫຍໍ້) 5 ບາດກ້າວ.

----

ໜັງສືພິມ ເສດຖະກິດ-ສັງຄົມ

แชร์