ວັດສີເມືອງ ອີກສະຖານທີ່ທ່ອງທ່ຽວທີ່ສຳຄັນ

   ວັດສີເມືອງ ເປັນສະຖານທີ່ເກົ່າແກ່ຂອງປະຊາຊົນຄົນລາວຊາວ ພຸດຕັ້ງຢູ່ໃຈກາງເມືອງຊຶ່ງເປັນສະ ຖານທີ່ພັກຜ່ອນຢອນໃຈຂອງແຂກ ຕ່າງດ້າວຊາວຕ່າງແດນທີ່ໄດ້ເຂົ້າມາ ທ່ຽວຊົມ ແລະເປັນແຫຼ່ງທ່ອງທ່ຽວ ທີ່ຂຶ້ນຊື່ລືນາມຂອງ ສປປ ລາວ ກໍວ່າໄດ້ ແລະເປັນສະຖານທີ່ທ່ອງທ່ຽວ ທີ່ມີຊື່ສຽງທາງດ້ານວັດທະນະທໍາອັນເກົ່າແກ່ຂອງຊາວລາວ ຊຶ່ງໄດ້ມີປະຫວັດຄວາມເປັນມາອັນຍາວ ນານຕາມປະຫວັດສາດທີ່ໄດ້ເລົ່າ ລືກັນມາຫຼາຍເຊັນຄົນຈຶ່ງກາຍ ເປັນສະຖານທີ່ອັນສັກສິດ ແລະສັກ ກາລະບູຊາຂອງປະຊາຊົນພາຍໃນ ແລະຕ່າງປະເທດທັງເປັນມູນມໍລະ ດົກອັນລໍ້າຄ່າຂອງຊາດລາວອີກ ດ້ວຍ.

   ວັດສີເມືອງ ເປັນວັດທີ່ຕັ້ງຂອງ ເສົາຫຼັກເມືອງວຽງຈັນ, ຊາວບ້ານ ມັກໄປປະກອບພິທີບູຊາຕາມຄວາມ ເຊື່ອຖື. ມີເລື່ອງເລົ່າກັນມາວ່າໃນເວລາຊາວເມືອງກຳລັງທຳພິທີປັກຫຼັກເມືອງຢູ່ນັ້ນ; ນາງ ສີ ຜູ້ຊຶ່ງກຳ ລັງຖືພາໄດ້ສະລະຊີບໂດດລົງຂຸມ, ນາງຖືກຝັງພ້ອມກັບຫຼັກເມືອງ ແລະ ກາຍເປັນຜີຫຼັກເມືອງ. ວັດນີ້ຈຶ່ງໄດ້ຊື່: ສີເມືອງການທຳພິທີບວງສວງ ຜີຫຼັກເມືອງຈະມີຂຶ້ນທຸກໆປີກ່ອນບຸນ ນະມັດສະການພະທາດຫຼວງ ແລະ ຂະບວນແຫ່ຜາສາດເຜິ້ງອັນງົດງາມ ກໍ່ຈະເລີ່ມແຫ່ແຕ່ວັດນີ້ໄປສູ່ພຣະທາດຫຼວງວຽງຈັນ. ແຕ່ລະປີເມື່ອຮອດ ງານບຸນນະມັດສະການແລ້ວກໍຈະມີປະຊາຊົນຄົນລາວຊາວພຸດ, ມີນັກ ທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວຊົມພ້ອມທັງຮ່ວມສະເຫຼີມສະຫຼອງ  ແລະຂາບໄຫວ້ຢ່າງ ຫຼວງຫຼາຍ.  ນອກຈາກງານບຸນແລ້ວ, ໃນທຸກໆວັນສິນກໍຈະມີຜູ້ຄົນເຂົ້າມາບູຊາ-ຂາບໄຫວ້ວັດສີເມືອງບໍ່ໄດ້ຂາດ ແລະນັກທ່ອງທ່ຽວເຂົ້າມາທ່ຽວຊົມ ແລະຂາບໄຫວ້.

   ວັດສີເມືອງ ເປັນສະຖານທີ່ທ່ອງທ່ຽວທີ່ມີຊື່ສຽງ ແລະໂດດເດັ່ນຂອງ ຄົນລາວຊາວພຸດ ຈິງເຮັດໃຫ້ຜູ້ຄົນທາງພາຍໃນ ແລະຕ່າງປະເທດຫຼັ່ງໄຫຼເຂົ້າມາທ່ຽວຊົມ ແລະຂາບໄຫ້ວ ບໍ່ຂາດສາຍແຕ່ເຖິງຢ່າງໃດກໍ່ຕາມ ຖ້າຫາກຜູ້ໃດທີ່ຍັງບໍ່ໄດ້ໄປກໍຢ່າລືມ ໄປທ່ຽວຊົມ ແລະກາບໄຫວ້ວັດສີ ເມືອງແດ່ເດີເພື່ອຮັບເອົາພອນອັນປະເສີດເລີດລໍ້ານໍາມາບັນເທົາຄວາມທຸກໂສກ ແລະຊ່ວຍໃຫ້ທ່ານມີຄວາມສຸກ, ສະບາຍໃຈ, ມີຄວາມສຸກສົດຊື່ນອາຍຸຍືນຍາວທ່ານເອີຍ.

 ນສພເສດຖະກິດ-ສັງຄົມ

ໂດຍ: ວົງມະນີ

แชร์