ລັດ ສັ່ງອັດແຈບທຸກຮູຮົ່ວງົບປະມານ

ໂດຍ: ຣັດສະໝີ ດວງສັດຈະ

    ເພື່ອຈັດຕັ້ງຜັນຂະຫຍາຍມະຕິກອງປະຊຸມສະພາແຫ່ງຊາດກ່ຽວກັບການຮັບຮອງເອົາທິດທາງແຜນງົບປະມານແຫ່ງລັດ 5 ປີ(2021-2015) ແລະປະຕິບັດຕາມວາລະແຫ່ງຊາດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ເພື່ອສ້າງຄວາມເປັນເອກະພາບລະດັບສູງໃນການເພີ່ມທະວີການຄຸ້ມຄອງ ແລະຕ້ານການຮົ່ວໄຫຂອງລາຍຮັບງົບປະມານແຫ່ງລັດທີ່ຢູ່ໃນຄວາມຮັບຜິດຊອບຂອງບັນດາກະຊວງ, ອົງການລັດທຽບເທົ່າກະຊວງ, ນະຄອນຫຼວງວຽງຈັນ ແລະ ບັນດາແຂວງ, ບັນດາຂະແໜງການຂັ້ນສູນກາງ ແລະທ້ອງຖິ່ນໃນຂອບເຂດທົ່ວປະເທດ; ລັດຖະບານ, ຈຶ່ງສຸມໃສ່ແກ້ໄຂບັນຫາດັ່ງກ່າວຢ່າງຮີບດ່ວນໂດຍໄດ້ອອກຄໍາສັ່ງເລກທີ 18/ນຍ, ວັນທີ 16.09.2021 ວ່າດ້ວຍການ ເພີ່ມທະວີການຄຸ້ມຄອງ ແລະຕ້ານການຮົ່ວໄຫຼຂອງລາຍຮັບງົບປະມານແຫ່ງລັດແນໃສ່ເພື່ອຄຸ້ມຄອງ ແລະອັດທຸກຮູຮົ່ວລາຍຮັບງົບປະມານທັງນີ້ກໍ່ເພື່ອຄຸ້ມຄອງ ແລະນໍາໃຊ້ຊັບສົມບັດເຫຼົ່ານີ້ມາສ້າງສາພັດທະນາປະເທດຊາດ.

 ຕໍ່ບັນຫາດັ່ງກ່າວ; ນາຍົກລັດຖະມົນຕີໄດ້ອອກຄໍາສັ່ງ ເລກທີ 18/ ນຍ, ມີ 19 ຂໍ້ທີ່ຕິດພັນ (ຜູ້ຂຽນຂໍອະນຸຍາດຖອດເອົາບາງຂໍ້ຄວາມ) ໂດຍມອບໃຫ້ບັນດາກະຊວງ, ອົງການລັດທຽບເທົ່າກະຊວງ, ຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນສູນກາງແລະຂັ້ນແຂວງ, ຫົວໜ່ວຍງົບປະມານບໍລິຫານວິຊາການແລະອົງການປົກຄອງທ້ອງຖິ່ນທຸກຂັ້ນຕ້ອງເພີ່ມທະວີຄວາມຮັບຜິດຊອບຕາມໜ້າທີ່, ຂອບເຂດສິດຂອງຕົນໃນການຈັດຕັ້ງປະຕິບັດບັນດາກົດໝາຍ, ນິຕິກໍາໃຕ້ກົດໝາຍທີ່ໄດ້ກໍານົດອອກໃນວຽກງານຄຸ້ມຄອງ ແລະຕ້ານການຮົ່ວໄຫຼລາຍຮັບງົບປະມານແຫ່ງລັດ; ບັນດາກະຊວງ, ອົງການລັດທຽບເທົ່າກະຊວງ ແລະອົງການປົກຄອງທ້ອງຖິ່ນທຸກຂັ້ນໃຫ້ຢຸດຕິຫຼືລົບລ້າງບັນດານິຕິກໍາໃຕ້ກົດໝາຍທີ່ໄດ້ກໍານົດອອກໂດຍບໍ່ສອດຄ່ອງກັບກົດໝາຍ ແລະລະບຽບການຕ່າງໆຂອງການຄຸ້ມຄອງລາຍຮັບງົບປະມານແຫ່ງລັດ; ຄະນະກໍາມະການສົ່ງເສີມ ແລະຄຸ້ມຄອງການລົງທຶນຂັ້ນສູນກາງແລະຂັ້ນແຂວງເປັນເຈົ້າການເພີ່ມທະວີຄວາມຮັບຜິດຊອບໃນການຄົ້ນຄວ້າວາງມາດຕະການຈັດຕັ້ງປະຕິບັດໃຫ້ຖືກຕ້ອງເຊັ່ນ: ກົດໝາຍວ່າດ້ວຍການສົ່ງເສີມການລົງທຶນ; ວ່າດ້ວຍພາສີ (ສະບັບປັບປຸງ); ວ່າດ້ວຍການຄຸ້ມຄອງສ່ວຍສາອາກອນ; ວ່າດ້ວຍອາກອນຊົມໃຊ້; ວ່າດ້ວຍອາກອນລາຍໄດ້; ວ່າດ້ວຍອາກອນມູນຄ່າເພີ່ມ; ວ່າດ້ວຍບັນຊີ; ວ່າດ້ວຍວິສາຫະກິດ ແລະກົດໝາຍອື່ນທີ່ກ່ຽວຂ້ອງ. ໃນກໍລະນີອື່ນທີ່ນອກເໜືອຈາກກົດໝາຍແລະນິຕິກໍາທີ່ກໍານົດອອກແລ້ວຕ້ອງນໍາສະເໜີລັດຖະບານເພື່ອຂໍອະນຸມັດຈາກສະພາແຫ່ງຊາດໂດຍສະເພາະບັນດາໂຄງການລົງທຶນຂະໜາດໃຫຍ່ທີ່ຕິດພັນກັບຊັບພະຍາກອນທໍາມະຊາດ, ແຮ່ທາດ, ພະລັງງານໄຟຟ້າ ແລະໂຄງການກໍ່ສ້າງພື້ນຖານໂຄງລ່າງເຫຼົ່ານີ້ເປັນຕົ້ນ;

   ກະຊວງການເງິນ ແລະຂະແໜງການເງິນຂັ້ນທ້ອງຖິ່ນຮັບຜິດຊອບທົບທວນນະໂຍບາຍ, ກົດໝາຍ ແລະນິຕິກໍາໃຕ້ກົດໝາຍຂອງຂະແໜງການເງິນທີ່ປະກາດໃຊ້ໃນປະຈຸບັນ ແລະ ຄົ້ນຄວ້າສ້າງກົດໝາຍ ແລະ ນິຕິກໍາໃໝ່ເພື່ອຮັບປະກັນການຄຸ້ມຄອງລາຍຮັບຕາມຖານລາຍຮັບທີ່ມີປະຈຸບັນ ແລະ ທຸກທ່າແຮງບົ່ມຊ້ອນໃຫ້ຖືກຕ້ອງ, ຄົບຖ້ວນ ແລະເພີ່ມຂຶ້ນ, ອັດທຸກຊ່ອງວ່າງທີ່ຮົ່ວໄຫຼຈາກການສວຍໃຊ້ໜ້າທີ່ຂອງເຈົ້າໜ້າທີ່ທຸກຂັ້ນ, ທຸກລະດັບ, ບຸກຄົນ, ນິຕິບຸກຄົນແລະການຈັດຕັ້ງເພື່ອຮັບປະກັນບໍ່ໃຫ້ສາມາດຫຼົບຫຼີກ, ເຊື່ອງອໍາພັນທະຕໍ່ງົບປະມານແຫ່ງລັດຢ່າງຂາດຕົວ. ໃນກໍລະນີການຈັດຕັ້ງໃດໜຶ່ງຫາກຕົກລົງຫຼືສ້າງລະບຽບການຈັດເກັບລາຍຮັບທີ່ບໍ່ສອດຄ່ອງຕາມກົດໝາຍກໍ່ມີສິດສະເໜີລົບລ້າງຫຼືຢຸດຕິທັນທີ; ປະຕິຮູບກົນໄກການຄຸ້ມຄອງລາຍຮັບງົບປະມານຢ່າງແຂງແຮງ, ລວງເລິກຮອບດ້ານ; ສົມທົບກັບກະຊວງອຸດສາຫະກໍາ ແລະການຄ້າເພື່ອກໍານົດມາດຕະການຄຸ້ມຄອງການນໍາເຂົ້າ-ສົ່ງອອກ ແລະຈໍາໜ່າຍສິນຄ້ານໍາເຂົ້າຢູ່ໃນປະເທດ; ສົມທົບກະຊວງແຜນການ ແລະການລົງທຶນ, ກະຊວງພະລັງງານ ແລະບໍ່ແຮ່, ກະຊວງຊັບພະຍາກອນທໍາມະຊາດ ແລະສິ່ງແວດລ້ອມ ແລະບັນດາຂະແໜງການຂັ້ນສູນກາງ-ທ້ອງຖິ່ນທີ່ກ່ຽວຂ້ອງກ່ຽວກັບການຄຸ້ມຄອງລາຍຮັບຈາກ ຊັບພະຍາກອນທໍາມະຊາດ, ພະລັງ ງານແລະບໍ່ແຮ່ເພື່ອປັບປຸງລະບຽບ ການ, ກົນໄກການປະສານສົມທົບ ເລີ່ມແຕ່ຂອດຄຸ້ມຄອງອະນຸຍາດ, ສັນຍາ,ຊອກຄົ້ນ, ສໍາຫຼວດ,ສ້າງບົດວິພາກແລະຂຸດຄົ້ນ,ຈໍາໜ່າຍ, ສົ່ງອອກ ແລະການປະຕິບັດພັນທະຕ່າງໆໃນແຕ່ລະຂອດ; ສ້າງ ແລະ ປັບປຸງກົນໄກການຊຸກຍູ້ ແລະສົ່ງ ເສີມຈຸລະວິສາຫະກິດ, ວິສາຫະ ກິດຂະໜາດນ້ອຍ, ກາງ ແລະ ໃຫຍ່ໃຫ້ຖືບັນຊີໃຫ້ຖືກຕ້ອງ,ຄົບຖ້ວນຕາມກົດໝາຍບັນຊີ ແລະລະບຽບການທີ່ກ່ຽວຂ້ອງ;ກະຊວງແຜນການ ແລະການ ລົງທຶນຮັບຜິດຊອບເປັນເຈົ້າການ ໂດຍມີມາດຕະການບັງຄັບບັນດາ ໂຄງການທີ່ໄດ້ອະນຸຍາດໃນການເຊົ່າ-ສໍາປະທານທີ່ໄດ້ດໍາເນີນການຂຸດຄົ້ນ,ປຸງແຕ່ງໃນຂົງເຂດພະລັງງານ, ບໍ່ແຮ່ເພື່ອປະຕິບັດພັນທະຈາກຄ່າຊັບພະຍາກອນ, ຄ່າເຊົ່າ-ສໍາປະທານ, ຄ່າພາກຫຼວງ,ອາກອນປະເພດຕ່າງໆເຂົ້າງົບປະມານໃຫ້ຖືກຕ້ອງຕາມກົດໝາຍ ແລະລະບຽບການກໍານົດຕາມໃບອະນຸຍາດສໍາປະທານທີ່ຂະແໜງການອອກໃຫ້...; ພ້ອມນັ້ນ,ກະຊວງອຸດສາຫະກໍາ ແລະການຄ້າຮັບຜິດຊອບໃນການຊຸກຍູ້ການເຄື່ອນໄຫວຂອງສະພາການຄ້າ ແລະອຸດສາຫະກໍາແຫ່ງຊາດເພື່ອເຮັດໜ້າທີ່ຕາມພາລະບົດບາດຢ່າງແຂງແຮງໃນການຊຸກຍູ້ການດໍາເນີນທຸລະກິດ.              ທະນາຄານແຫ່ງ ສປປ ລາວ; ກະຊວງພະລັງງານ ແລະບໍ່ແຮ່; ກະຊວງຊັບພະຍາກອນທໍາມະຊາດ ແລະສິ່ງແວດລ້ອມ; ກະຊວງກະສິກໍາ ແລະປ່າໄມ້; ກະຊວງແຮງງານ, ສະຫວັດດີການ ແລະສັງຄົມ; ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ; ກະຊວງເຕັກໂນໂລຊີ ແລະການສື່ສານ; ກະຊວງໂຍທາທິການ ແລະຂົນສົ່ງ; ກະຊວງປ້ອງກັນຄວາມສະຫງົບ; ເຈົ້າຄອງ/ເຈົ້າ ແຂວງ... ຮັບຜິດຊອບບັນດາວຽກທີ່ຕິດພັນກັບຂະແໜງການ ແລະທ້ອງຖິ່ນຕາມທີ່ລະບຸໄວ້ໃນຄໍາສັ່ງສະບັບນີ້ໃຫ້ມີປະສິດທິພາບ ແລະປະສິດທິຜົນສູງ.

   ບັນດາກະຊວງ, ອົງການລັດທຽບເທົ່າກະຊວງ ແລະບັນດາອົງການປົກຄອງທ້ອງຖິ່ນປະສານສົມທົບກັບອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ອົງການພຸດທະສາສະໜາສໍາພັນລາວ, ສື່ມວນຊົນທຸກຂັ້ນມີໜ້າທີ່ຊ່ວຍຊຸກຍູ້, ໂຄສະນາເຜີຍແຜ່, ປະຊາສໍາພັນໃຫ້ທຸກພາກສ່ວນທົ່ວສັງຄົມໃນການເຂົ້າຮ່ວມ ແລະຕິດຕາມ, ກວດກາເຖິງຜົນສໍາເລັດ ແລະບັນດາຊ່ອງວ່າງໃນການປະຕິບັດໜ້າທີ່ຂອງພາກລັດທີ່ບໍ່ສອດຄ່ອງກັບລັດຖະທໍາມະນູນ, ກົດໝາຍແລະລະບຽບການຕ່າງໆ. 

     ບັນດາລັດຖະມົນຕີ,ຫົວໜ້າອົງການລັດທຽບເທົ່າກະຊວງ, ປະທານຄະນະກໍາມະການສົ່ງເສີມ ແລະ ຄຸ້ມຄອງການລົງທຶນຂັ້ນສູນກາງແລະຂັ້ນແຂວງ, ເຈົ້າຄອງ ນະຄອນຫຼວງວຽງຈັນ ແລະບັນດາທ່ານເຈົ້າແຂວງໃນທົ່ວປະເທດເປັນເຈົ້າການຮັບຜິດຊອບຊີ້ນໍານໍາພາການຈັດຕັ້ງປະຕິບັດຄໍາສັ່ງສະບັບນີ້ໃຫ້ເລິກເຊິ່ງ, ທົ່ວເຖິງ ແລະມີຜົນເປັນຮູບປະທໍາ, ພ້ອມທັງເພີ່ມທະວີການປຸກລະດົມຊວນເຊື່ອ, ຈັດຕັ້ງເຊື່ອມຊຶມໃຫ້ພະນັກງານລັດຖະກອນທີ່ຢູ່ໃນການຄຸ້ມຄອງຂອງຂະແໜງການຕົນທຸກຂັ້ນ ແລະ ໃຫ້ທົ່ວສັງຄົມມີຄວາມເຂົ້າໃຈ ແລະມີສະຕິສູງຕໍ່ການຄຸ້ມຄອງ ແລະການຈັດເກັບງົບປະມານແຫ່ງລັດຢ່າງຮັດກຸມແລະມີຈຸດສຸມ; ຖືເອົາວຽກງານດັ່ງກ່າວເຂົ້າໃນຂະບວນ ແຂ່ງຂັນຮັກຊາດ ແລະພັດທະນາ; ຕິດຕາມສັງລວມສະພາບການຈັດຕັ້ງປະຕິບັດລາຍງານໃຫ້ລັດຖະບານຊາບໃນແຕ່ລະໄລຍະ, ພ້ອມນັ້ນ, ບຸກຄົນ, ນິຕິບຸກຄົນແລະການຈັດຕັ້ງທີ່ໄດ້ປະຕິບັດໄດ້ດີຈະໄດ້ຮັບການຍ້ອງຍໍດ້ວຍຮູບການຕ່າງໆທີ່ເໝາະສົມ, ກົງກັນຂ້າມຖ້າບໍ່ປະຕິບັດຄໍາສັ່ງສະບັບນີ້, ສ້າງຄວາມເສຍຫາຍຈະດໍາເນີນມາດຕະການເບົາຫຼືໜັກຕາມກໍລະນີຢ່າງເຂັ້ມງວດເດັດຂາດ. 

แชร์