ຣັດເຊຍ ມອບວັກຊິນປ້ອງກັນໂຄວິດໃຫ້ລັດຖະບານລາວ 30 ພັນໂດສ

   ວັກຊິນສະປຸດນິກໄລ (Sputnik Light) ປ້ອງກັນພະຍາດໂຄວິດ-19 ຈຳນວນ 30 ພັນໂດສ ທີ່ໄດ້ຮັບການຊ່ວຍເຫຼືອຈາກລັດຖະບານຣັດເຊຍໃຫ້ແກ່ລັດຖະບານລາວ ໄດ້ມາເຖິງນະຄອນຫຼວງວຽງຈັນ ໃນວັນທີ 22 ກັນຍາ 2021, ຕາງໜ້າຮັບໂດຍທ່ານ ນາງ ຈັນຖະໜອມ ມະນີທິບ ຫົວໜ້າຫ້ອງການກະຊວງສາທາລະນະສຸກ, ໂດຍມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

    ທ່ານຫົວໜ້າຫ້ອງການກະຊວງສາທາລະນະສຸກໄດ້ຕີລາຄາສູງ ແລະສະແດງຄວາມຂອບໃຈຕໍ່ລັດຖະບານຣັດເຊຍທີ່ເຫັນໄດ້ຄວາມສຳຄັນນຳເອົາວັກຊິນຈຳນວນດັ່ງກ່າວ ມາມອບໃຫ້ໃນຄັ້ງນີ້, ຊຶ່ງເປັນການເພີ່ມທະວີການຮ່ວມມືເຮັດໃຫ້ວຽກງານຕ້ານ ແລະສະກັນກັ້ນການແຜ່ລະບາດຂອງພະຍາດໂຄວິດ-19 ຢູ່ສປປລາວເບົາບາງລົງ ແລະກັບຄືນສູ່ສະພາບປົກກະຕິໂດຍໄວ,ພ້ອມທັງຢືນຢັນວ່າຈະນຳເອົາວັກຊິນຈຳນວນດັ່ງກ່າວ,ໄປນຳໃຊ້ໃຫ້ເກີດຜົນປະໂຫຍດສູງສຸດກໍຄືນຳໄປສັກໃຫ້ບຸກຄົນກຸ່ມເປົ້າໝາຍໃຫ້ທັນການ ແລະທົ່ວເຖິງ.

  ການຊ່ວຍເຫຼືອໃນຄັ້ງນີ້, ໄດ້ສະແດງໃຫ້ເຫັນເຖິງສາຍພົວພັນການຮ່ວມມືທີ່ດີລະຫວ່າງສອງປະເທດ ລາວ-ຣັດເຊຍ ທີ່ມີມາແຕ່ດົນນານແລ້ວນັ້ນໃຫ້ໄດ້ຮັບການເສີມຂະຫຍາຍຂຶ້ນໄປເລື້ອຍໆ, ທັງເປັນການປະກອບສ່ວນສຳຄັນເຮັດໃຫ້ການລະບາດຂອງພະຍາດໂຄວິດ-19 ຢູ່ ສປປ ລາວ ຫຼຸດລົງໂດຍໄວ.

ຂ່າວ-ພາບ: ທະນູທອງ

• 23/09/2021