ເມືອງງາ ມີຫຼາຍດ້ານພົ້ນເດັ່ນ

  ຕະຫຼອດໄລຍະ 6 ເດືອນຕົ້ນປີ 2021 ພາຍໃຕ້ການຊີ້ນໍາໆພາຂອງຄະນະບໍລິຫານງານພັກ ເມືອງງາແຂວງອຸດົມໄຊ ເຫັນວ່າມີວຽກງານຫຼາຍດ້ານທີ່ພົ້ນເດັ່ນ ແລະມີຜົນສຳເລັດຕາມລະດັບຄາດໝາຍ.

  ທ່ານ ນາງ ມະນີຈັນ ວິໄລຈິດ ເລຂາພັກເມືອງເຈົ້າເມືອງງາໃຫ້ສໍາພາດວ່າ: ເມືອງງາ ເປັນເມືອງ ໜຶ່ງໃນຈຳນວນ 7 ເມືອງ ຂອງ ແຂວງອຸດົມໄຊ, ມີ 9 ກຸ່ມບ້ານ, ມີ 60 ບ້ານ, ມີປະຊາກອນທັງໝົດ 33.543 ຄົນ, ຍິງ 16.223 ຄົນ, ຊຶ່ງຕະຫຼອດໄລຍະ 6 ເດືອນຜ່ານມາຄະນະພັກ, ຄະນະນຳເມືອງງາ ໄດ້ເອົາໃຈໃສ່ຊີ້ນຳ-ນໍາພາສະມາຊິກພັກ, ພະນັກງານ-ລັດຖະກອນຕະຫຼອດຮອດປະຊາຊົນບັນດາເຜົ່າພາຍໃນເມືອງຢ່າງຕັ້ງໜ້າ ແລະສາມາດຍາດໄດ້ຜົນສຳ ເລັດຫຼາຍດ້ານ ໂດຍສະເພາະແມ່ນດ້ານການເມືອງ-ແນວຄິດ, ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານເສດຖະກິດ, ດ້ານວຽກງານວັດທະນະທໍາ-ສັງຄົມ ແລະອື່ນໆ.

  ທ່ານ ນາງ ມະນີຈັນ ວິໄລຈິດ ເຈົ້າເມືອງງາ ກ່າວຕື່ມວ່າ: ຜົນສຳເລັດອັນພົ້ນເດັ່ນຂອງການເຄື່ອນໄຫວຈັດຕັ້ງປະຕິບັດວຽກງານແຕ່ລະດ້ານໄລຍະ 6 ເດືອ ຕົ້ນ ປີ 2021 ນີ້ ຖ້າທຽບໃສ່ສະພາບລວມ, ຄວາມຮຽກຮ້ອງຕ້ອງການ ແລະພາລະບົດບາດ, ສິດ ແລະໜ້າທີ່ຍັງມີບາງດ້ານທີ່ຍັງເປັນຈຸດອ່ອນ ແລະຂໍ້ຄົງຄ້າງຈະ ໄດ້ສືບຕໍ່ໃນການປັບປຸງແກ້ໄຂ ໂດຍສະເພາະແມ່ນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍຍັງບໍ່ທັນເຂັ້ມງວດ, ທຶນທີ່ຈະພັດທະນາພື້ນຖານໂຄງ ລ່າງຍັງມີໜ້ອຍ, ການຜະລິດເປັນສິນຄ້າຂອງປະຊາຊົນສ່ວນໃຫຍ່ຍັງອີງໃສ່ແຕ່ທຳມະຊາດ, ການຈັດເກັບລາຍຮັບພາຍໃນເມືອງຍັງບໍ່ທັນບັນລຸຕາມຕົວເລກເປົ້າ ໝາຍ, ການຄຸ້ມຄອງລາຄາສິນຄ້ານຳເຂົ້າຍັງເຮັດບໍ່ທັນໄດ້ດີລວມທັງຄຸນນະພາບການຮຽນ-ການສອນຂອງຄູ-ອາຈານ ແລະນັກ ຮຽນຍັງບັນລຸໝາກຜົນບໍ່ທັນສູງ.

  ເພື່ອສືບຕໍ່ເຮັດໃຫ້ການເຄື່ອນໄຫວວຽກງານຮອບດ້ານມີຜົນສໍາເລັດຕາມລະດັບຄາດໝາຍທີ່ວາງ ໄວ້ພາຍໃຕ້ການຊີ້ນໍາ-ນໍາພາຂອງຄະນະບໍລິຫານງານພັກເມືອງງານັ້ນຄະນະພັກ, ຄະນະນໍາຂອງເມືອງກໍ່ໄດ້ກຳນົດທິດທາງແຜນການ ແລະວຽກງານຈຸດສຸມ 6 ເດືອນທ້າຍປີ 2021 ຢ່າງລະອຽດ ໂດຍສະເພາະແມ່ນສືບຕໍ່ຟື້ນຟູເສດຖະກິດໃຫ້ມີການຂະຫຍາຍຕົວຢ່າງຕໍ່ເນື່ອງ, ປັບປຸງແບບແຜນການຊີ້ນຳ-ນໍາພາຂອງຄະນະພັກແຕ່ລະຂັ້ນໃຫ້ມີຄວາມເຂັ້ມແຂງ ແລະອື່ນໆ.

----

ໂດຍ: ຄານມະນີ ຮຽນດໍຈັນ

แชร์