JDB ມອບ 200 ລ້ານກີບຊ່ວຍ ນວ ສູ້ໂຄວິດ

ຂ່າວ: ຄຳຕົ້ນ ວໍລະຈັກ

    ທະນາຄານຮ່ວມພັດທະນາ ຫຼື JDB ເປັນທະນາຄານທຸລະກິດເອກະຊົນທີ່ທັນສະໄໝອັນດັບແຖວໜ້າຂອງ ສປປ ລາວ ນອກຈາກຈະມຸ້ງໝັ້ນໃນການເຄື່ອນໄຫວທຸລະກິດແລ້ວຍັງໃຫ້ຄວາມສໍາຄັນກ່ຽວກັບການປະກອບສ່ວນຊ່ວຍເຫຼືອສັງຄົມ, ໂດຍສະເພາະແມ່ນການຕ້ານ ແລະສະກັດກັ້ນການລະບາດຂອງພະຍາດໂຄວິດ- 19 ທີ່ເກີດຂຶ້ນໃນໄລຍະຜ່ານມາຈົນຮອດປະຈຸບັນ.

    ຊຶ່ງຫຼ້າສຸດໃນວັນທີ 22 ກັນຍາ 2021 ຢູ່ທີ່ສໍານັກງານຫ້ອງວ່າການປົກຄອງນະຄອນຫຼວງວຽງຈັນ ທ່ານ ວິໄລ ສີພະພອນ ຜູ້ອຳນວຍການໃຫຍ່ທະນາຄານຮ່ວມ ພັດທະນາ (JDB) ພ້ອມດ້ວຍທ່ານ ຄໍາຊູ ຢ່າງ ຮອງຜູ້ອໍານວຍການໃຫຍ່, ທ່ານ ປອ. ບົວວອນ ຈັນທະນີເລີດ ຫົວໜ້າຫ້ອງການທະນາຄານຮ່ວມພັດທະນາໄດ້ນໍາເອົາເງິນສົດຈໍານວນ 200.000.000 ກີບ ໄປມອບໃຫ້ນະຄອນຫຼວງວຽງຈັນເພື່ອນໍາໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໂດຍສະເພາະແມ່ນຊຸກຍູ້ວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂກວິດ-19 ທີ່ພວມລະບາດເປັນວົງກ້ວາງໃນຫຼາຍຕົວເມືອງຢູ່ນະຄອນຫຼວງວຽງຈັນ.

    ຕາງໜ້ານະຄອນຫຼວງວຽງຈັນກ່າວຮັບໂດຍ ທ່ານ ອານຸພາບ ຕຸນາລົມ ເລຂາທິການສູນກາງພັກ, ເລຂາຄະນະພັກປະທານສະພາປະຊາຊົນນະຄອນຫຼວງວຽງຈັນ ພ້ອມດ້ວຍຄະນະສະເພາະກິດນະຄອນຫຼວງວຽງຈັນ. 

  ໂອກາດດັ່ງກ່າວ ທ່ານ ອານຸ ພາບ ຕຸນາລົມ ກໍ່ໄດ້ສະແດງຄວາມຂອບໃຈ ແລະຊົມເຊີຍ ທ່ານ ວິໄລ ສີພະພອນ ພ້ອມດ້ວຍຄະນະທີ່ໄດ້ມອບເງິນຊ່ວຍເຫຼືອນະຫຼວງວຽງຈັນໃນຄັ້ງນີ້ເພື່ອນຳໃຊ້ເຂົ້າໃນວຽກງານປ້ອງກັນ, ສະກັດກັ້ນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ໃນຄັ້ງນີ້.

   ໃນໂອກາດດັ່ງກ່າວ ທ່ານ ອານຸ ພາບ ຕຸນາລົມ ເລຂາທິການສູນກາງພັກ, ເລຂາຄະນະພັກປະທານສະພາປະຊາຊົນນະຄອນຫຼວງວຽງຈັນຍັງໄດ້ຝາກຄວາມຂອບໃຈມາຍັງ ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາ ແລະອວຍພອນໃຫ້ທຸລະກິດຂອງທະນາຄານຮ່ວມພັດທະນາໃຫ້ມີຄວາມຈະເລີນຮຸງເຮືອງຂຶ້ນໄປເລື້ອຍມີສ່ວນຮ່ວມໃນການຊ່ວຍເຫຼືອສັງຄົມຕະຫຼອດໄປ.

แชร์