ສວນຊາ 36 ຮັບຄວາມນິຍົມຈາກພາຍໃນ ແລະຕ່າງປະເທດ

ຂ່າວ: ບຸນນິກ

 ສວນຊາ 36 ເປັນບໍລິສັດດຽວໃນລາວທີ່ຜະລິດຊາແບບປະສົມປະສານນັບແຕ່ຂັ້ນຕອນການປູກ, ການເກັບ, ການຜະລິດຈົນຮອດການຈຳໜ່າຍປະຈຸບັນເປັນທີ່ນິຍົມກັນຂອງຜູ້ບໍລິໂພກທັງພາຍໃນ ແລະຕ່າງປະເທດຂະນະປະຈຸບັນສວນຊາ 36 ຈາກ ສປປ ລາວ ແມ່ນໄດ້ຮັບຫຼຽນຄຳລາງວັນຊະນະເລີດຈາກການແຂ່ງຂັນຊາໂລກ 2021.

   ທ່ານ ນາງ ຫົງມະນີ ແກ້ວໄຊຍະຈັກ ປະທານສວນຊາ 36 ໄດ້ ໃຫ້ຂໍ້ມູນກັບທາງທີມງານນັກຂ່າວໜັງສືພິມເສດຖະກິດ-ສັງຄົມພວກ ເຮົາຮູ້ວ່າ: ສວນຊາ 36 ຕັ້ງຢູ່ພາກໃຕ້ຂອງປະເທດລາວທີ່ເມືອງປາກຊ່ອງ, ແຂວງຈໍາປາສັກ ເຂດພູພຽງບໍລິເວນເປັນເຂດດິນພູເຂົາໄຟຊຶ່ງເປັນເຂດດິນທີ່ດີທີ່ສຸດໃນການປູກຊາ ແລະຍັງນອນຢູ່ໃນເຂດພູມອາກາດຊຸ່ມເຢັນສົ່ງຜົນໃຫ້ຊາມີລົດຊາດດີເປັນພິເສດໄດ້ລົງທຶນກໍ່ສ້າງລະບົບໂຮງງານຜະລິດຊາທີ່ສວນຊາ 36 ປາກຊ່ອງເພື່ອຮັກສາໄວ້ຕົ້ນຊາທ້ອງຖິ່ນຂອງປະຊາຊົນ ລາວທີ່ມີມານັບພັນປີ ແລະພັດທະນາສວນຊາເພື່ອໃຫ້ໄດ້ໃບຊາຄຸນນະພາບດີເສີມສ້າງຜະລິດຕະພັນທ້ອງຖິ່ນຂອງລາວໃນເນື້ອທີ່ 150 ເຮັກຕາຂອງສວນຊາ 36 ປະ ກອບດ້ວຍຕົ້ນຊາພັນປີ, ຕົ້ນຊາຮ້ອຍປີ, ຕົ້ນໄມ້ກິນໝາກ, ພ້ອມດ້ວຍຕົ້ນກາເຟພວກເຮົາໄດ້ພະຍາຍາມຮັກສາຄວາມສະອາດ ແລະສິ່ງແວດລ້ອມເພື່ອໃຫ້ເຂດນີ້ເປັນເຂດນິເວດວິທະຍາສີຂຽວຂອງປະເທດລາວ, ເປັນໜ້າຕາຂອງລາວເຮົາ.

   ສວນຊາ 36 ເປັນບໍລິສັດອຸດສາຫະກໍາ ແລະກະສິກໍາພິເສດຂອງລາວທີ່ສ້າງຕັ້ງຂຶ້ນກ່ອນໝູ່ໝົດ, ທັງເປັນວິສາຫະກິດໜຶ່ງດຽວທີ່ລວມເອົາການປົກປັກຮັກສາຕົ້ນຊາບູຮານ, ການເກັບກ່ຽວການຜະລິດ ແລະການຈໍາໜ່າຍມາລວມຕົວເຂົ້າກັນໂດຍທາງສວນຊາ 36 ແມ່ນໄດ້ຜ່ານການກວດກາຢັ້ງຢືນຮັບຮອງຈາກມາດຕະຖານສາກົນ Eu rofins ແລະການຮັບຮອງຈາກກະສິກຳອິນຊີລາວວ່າເປັນຊາເພື່ອສຸຂະພາບທີ່ຄົງຄວາມເປັນທຳມະຊາດອີກດ້ວຍ.

 ສວນຊາ 36 ຖືກວາງສະແດງຢູ່ທີ່ງານວາງສະແດງສິນຄ້າຈີນອາຊຽນ ຄັ້ງທີ 18 ງານວາງສະແດງສິນຄ້າຈີນ-ອາຊຽນ ຄັ້ງທີ 18 ໃນວັນທີ 16 ກັນຍາ 2021 ນີ້, ຊາສວນຊາ36 ຈາກ ສປປ ລາວ ແມ່ນໄດ້ຮັບຫຼຽນຄຳລາງວັນຊະນະເລີດຈາກການແຂ່ງຂັນຊາໂລກ 2021 World Tea Championship 2021 ເມື່ອບໍ່ດົນມານີ້, ຜະລິດຕະພັນຊາບູຮານຂອງ ບໍລິສັດ ລາວທີຊິກ ມາເນີ ການຄ້າ ຂາອອກ-ຂາເຂົ້າ ຈໍາກັດຜູ້ດຽວ ໄດ້ຮັບຫຼຽນຄຳລາງວັນຊະນະເລີດຂອງກຸ່ມຊາແດງໃນການແຂ່ງຂັນຊາໂລກປະຈຳປີ 2021. ພ້ອມດຽວກັນນັ້ນ, ຍັງຖືກເຊີນເຂົ້າຮ່ວມພິທີມອບລາງວັນ ແລະງານວາງສະແດງອຸດສາຫະກໍາຊາໂລກທີ່ຈະຈັດຂຶ້ນທີ່ມະຫານະຄອນນິວຢອກໃນໝໍ່ໆນີ້.

   ຄະນະກຳມະການຈັດການແຂ່ງຂັນຊາໂລກໄດ້ກ່າວໃນຈົດໝາຍວ່າ: “ສວນຊາ 36 ໄດ້ມີສ່ວນຮ່ວມໃນງານວາງສະແດງຊາສາກົນທຸກປະເພດຢ່າງຫ້າວຫັນ. ຄະນະກຳມະການຈັດງານນີ້ໄດ້ເຫັນ ແລະຮັບຮູ້ເຖິງປະຫວັດຂອງສວນຊາ 36, ມາດຕະຖານຂອງຂະບວນການຜະລິດຊາ, ຄຸນນະພາບຂອງຊາ, ສະພາບແວດລ້ອມທີ່ເປັນເອ ກະລັກຂອງທ້ອງຖິ່ນລາວ, ພາຊະນະບັນຈຸ ແລະອື່ນໆ ທີ່ໄດ້ຜ່ານການກວດສອບຢ່າງລະອຽດທີ່ຖ້ວນ. ຫຼັງຈາກການໄຕ່ຕອງຂອງຄະນະກຳມະການ, ສຸດທ້າຍໄດ້ຕັດສິນ ໃຫ້ຊາສວນຊາ36 ຈາກ ສປປ ລາວ ຊະນະລາງວັນຊະນະເລີດໃນສາຂາຊາແດງຂອງການແຂ່ງຂັນຊາໂລກປະຈຳປີ 2021”.

  ມີລາຍງານວ່າງານວາງສະແດງອຸດສາຫະກຳຊາໂລກໄດ້ຈັດຂຶ້ນທຸກປີຕັ້ງແຕ່ປີ 2003 ແລະເປັນໜຶ່ງໃນ 50 ງານວາງສະແດງສາກົນທີ່ສຳຄັນຢູ່ໃນອາເມລິກາເໜືອ.

  ງານດັ່ງກ່າວ, ດຶງດູດຜູ້ນຳສິນຄ້າມາວາງສະແດງຫຼາຍຮ້ອຍຄົນ ແລະດຶງດູດຊ່ຽວຊານຫຼາຍກວ່າ 5.000 ຄົນ ຈາກຫຼາຍກວ່າ 50 ປະເທດ ແລະພາກພື້ນໃນແຕ່ລະປີເຮັດໃຫ້ງານວາງສະແດງອຸດສາຫະກຳຊາໂລກກາຍເປັນງານວາງສະແດງພິເສດຂອງອຸດສາຫະກໍາຊາສາກົນທີ່ມີຈໍານວນປະເທດເຂົ້າຮ່ວມຫຼາຍທີ່ສຸດໃນໂລກ. ງານດັ່ງກ່າວ,ໄດ້ຮັບການສະໜັບສະໜູນຈາກງານວາງສະແດງຊາໂລກ ແລະຮ່ວມຈັດໂດຍມູນນິທິ Desert Oasis ທີ່ຈະຈັດຂຶ້ນທີ່ມະຫານະຄອນນິວຢອກ ແລະເມືອງອື່ນໆ ໃນສະຫະລັດອາເມຣິກາ.

แชร์