ເອດີບີຊີ້ໂຄວິດຖ່ວງດຶງຟື້ນໂຕເສດຖະກິດລາວ

ການຟື້ນໂຕຂອງເສດຖະກິດຂອງ ສປປ ລາວ ໄດ້ຊັກຊ້າລົງເນື່ອງຈາກຄື້ນທີ່ສອງຂອງການລະບາດພະຍາດອັກເສບປອດຈາກເຊື້ອຈຸນລະໂລກສາຍພັນໃໝ່ (ໂຄວິດ-19) ທີ່ໄດ້ນຳໄປສູ່ການປິດປະເທດ ແລະເຮັດໃຫ້ການໃຊ້ຈ່າຍຫຼຸດລົງ.

ອີງຕາມບົດລາຍງານເສດຖະກິດການຄາດຄະເນການພັດທະນາຂອງອາຊີປະຈຳປີ 2021 ສະບັບປັບປຸງຈາກທະນາຄານພັດທະນາອາຊີ (ADB) ໃນວັນທີ 22 ກັນຍາ ນີ້ລະບຸວ່າ: ເສດຖະກິດຂອງ ສປປ ລາວ ຄາດວ່າ ຈະຂະຫຍາຍໂຕໃນອັດຕາ 2,3% ໃນປີ 2021 ເມື່ອທຽບໃສ່ 4,% ທີ່ໄດ້ຄາດຄະເນໄວ້ໃນເດືອນເມສາທີ່ຜ່ານມາ, ການຟື້ນໂຕຂອງເສດຖະກິດໃນທົ່ວໂລກຄາດວ່າຈະກະຕຸ້ນການເຕີບໂຕພາຍໃນປະເທດໃນປີ 2022, ເຖິງແມ່ນວ່າຈະຕໍ່າກວ່າທີ່ ADB ໄດ້ມີການຄາດຄະເນໄວ້ກ່ອນໜ້ານີ້.

    ທ່ານ ນາງ ໂຊໂນມິ ທະນາກະ, ຜູ້ຕາງໜ້າ ADB ປະ ຈຳ ສປປ ລາວ ໄດ້ໃຫ້ຮູ້ວ່າ: “ບັນດານະໂຍບາຍໃນການຫຼຸດຜ່ອນການລະບາດພະຍາດໂຄວິດ-19 ໄດ້ເຮັດ ໃຫ້ການຜະລິດຂອງຂະແໜງອຸດສາຫະກຳຫຼຸດລົງ ແລະສ້າງຜົນກະທົບຢ່າງໜັກໜ່ວງໃຫ້ແກ່ການເຕີບໂຕຂອງຂະແໜງການຄ້າຂາຍຍ່ອຍ, ການຂົນສົ່ງ ແລະການ ບໍລິການທ່ອງທ່ຽວ” ທ່ານຍັງໄດ້ໃຫ້ຮູ້ຕື່ມອີກວ່າ “ການຫຼຸດລົງຂອງກິດຈະກໍາທາງດ້ານເສດຖະກິດໄດ້ເພີ່ມຈຳນວນຄົນວ່າງງານ ແລະ ຫຼຸດລາຍໄດ້ຂອງຄົວເຮືອນລົງ, ໂດຍສະເພາະແມ່ນບັນດາແມ່ຍິງ ແລະຜູ້ທີ່ມີການສຶກສາບໍ່ສູງ. ການຟື້ນໂຕໄວຈາກການລະບາດພະຍາດແມ່ນຂຶ້ນກັບນະໂຍບາຍທີ່ຈະໃຫ້ການສະໜັບສະໜູນແກ່ບັນດາທຸລະກິດ ແລະຄົວເຮືອນເພື່ອປັບໂຕເຂົ້າກັບ‘ການດໍາລົງຊີວິດປົກກະຕິແບບໃໝ່.”

   ດ້ວຍຄວາມຕ້ອງການຢູ່ພາຍໃນປະເທດທີ່ຫຼຸດລົງໂດຍສະເລ່ຍໃນໄລຍະ 7 ເດືອນທໍາອິດຂອງປີນີ້ອັດຕາເງິນເຟີ້ຢູ່ໃນລະດັບ 3,1%, ຄ່າສະກຸນເງິນກີບໄດ້ຫຼຸດລົງເມື່ອ ທຽບກັບຄ່າສະກຸນເງິນຕາຕ່າງປະເທດ, ດ້ວຍຄວາມແຕກໂຕນຂອງອັດຕາແລກປ່ຽນລະຫວ່າງທາງການ ແລະທົ່ວໄປສໍາລັບເງິນກີບກັບເງິນໂດລາສະຫະລັດແມ່ນຫຼາຍ ກວ່າ 20% ໃນໄລຍະເດືອນກໍລະກົດທີ່ຜ່ານມາ, ຊຶ່ງສະທ້ອນໃຫ້ເຫັນເຖິງການຂາດແຄນເງິນຕາຕ່າງປະເທດຢູ່ພາຍໃນ ຫຼັງຈາກມີການຊໍາລະໜີ້ສິນຕ່າງປະເທດຂອງລັດຈຳນວນຫຼາຍ. ການເກັບລາຍຮັບຍັງບໍ່ທັນກັບຄືນສູ່ລະດັບກ່ອນມີການແຜ່ລະບາດພະຍາດຊຶ່ງເຮັດໃຫ້ການເງິນພາກລັດຍັງຄົງຖືກຈໍາກັດ.

   ບົດລາຍງານໄດ້ໃຫ້ຮູ້ວ່າການຟື້ນໂຕທາງດ້ານເສດຖະກິດຂອງປະເທດຈະໄດ້ຮັບການສະໜັບສະໜູນຈາກການອອກໃບອະນຸຍາດຂຸດຄົ້ນບໍ່ແຮ່ໃໝ່ ແລະລາຍຮັບຈາກການສົ່ງອອກກະແສໄຟຟ້າ, ພ້ອມທັງການເປີດນໍາໃຊ້ທາງລົດໄຟເຊຶ່ອມຈອດລະຫວ່າງ ສປປ ລາວ ແລະສາທາລະນະລັດປະຊາຊົນຈີນຕາມແຜນທີ່ໄດ້ວາງໄວ້. ໂດຍການຄາດການວ່າອຸນຫະພູມທີ່ອຸ່ນຂຶ້ນ ແລະຝົນຕົກຖືກຕ້ອງຕາມລະດູ, ການເກັບກ່ຽວຜົນຜະລິດເຂົ້າ ແລະພືດຜັກຕ່າງໆແມ່ນຄາດວ່າຈະບໍ່ມີຜົນກະທົບ.

   ສິ່ງທ້າທາຍຍັງຄົງມີຢູ່. ດັ່ງທີ່ໄດ້ລະບຸໄວ້ໃນບົດລາຍງານ, ການຄາດຄະເນການພັດທະນາຂອງອາຊີປະຈຳປີ 2021 ສະບັບເດືອນເມສາທີ່ຜ່ານມາ, ບັນດາມາດຕະ ການໃໝ່ ເພື່ອຄວບຄຸມການແຜ່ລະບາດພະຍາດໂຄວິດ-19 ແລະຄວາມຄືບໜ້າຂອງການສັກຢາວັກແຊງຈະສົ່ງຜົນກະທົບໃຫ້ເສດຖະກິດຂອງປະເທດມີການຂະຫຍາຍ ໂຕ. ມາດຕະການສ້າງຄວາມເຂັ້ມແຂງໃຫ້ແກ່ການຄຸ້ມຄອງເສດຖະກິດມະຫາພາກ ແລະປັບປຸງບັນຍາກາດສ້າງຄວາມເຊື່ອໝັ້ນໃຫ້ແກ່ນັກລົງທຶນຍັງຄົງມີຄວາມຈໍາເປັນ ຕໍ່ການຟື້ນໂຕຂອງເສດຖະກິດ ແລະສະຫວັດດີການຂອງຄົວເຮືອນ.

   ADB ມີຄວາມມຸ່ງໝັ້ນທີ່ຈະບັນລຸໃຫ້ພາກພື້ນອາຊີປາຊີຟິກມີຄວາມຈະເລີນຮຸ່ງເຮືອງ, ທົ່ວເຖິງ, ພ້ອມຮັບການປ່ຽນແປງ ແລະຍືນຍົງໄປພ້ອມໆກັບການຮັກສາ ຄວາມພະຍາຍາມຂອງຕົນໃນການລຶບລ້າງຄວາມທຸກຍາກ. ADB ຖືກສ້າງຕັ້ງຂຶ້ນໃນປີ 1966 ໂດຍມີ 68 ປະເທດສະມາຊິກເປັນເຈົ້າຂອງຊຶ່ງໃນນັ້ນມີ 49 ປະເທດ ແມ່ນມາຈາກພາກພື້ນ.

แชร์