ສາລະວັນ ເລັ່ງສ້າງຕະຫຼາດຊຸມຊົນເຂດແຫຼ່ງທ່ອງທ່ຽວອຸທິຍານພູຜາສຸກໃຫ້ສຳເລັດໃນ 3 ເດືອນ

ໂດຍ: ກິນດາວັນ ອ້ວນນາຄູ

   ໂຄງການກໍ່ສ້າງຕະຫຼາດຊຸມຊົນບ້ານຄຳທອງ ເມືອງສາລະວັນ ຊຶ່ງນອນໃນເຂດແຫຼ່ງທ່ອງທ່ຽວອຸທິຍານພູຜາສຸກທີ່ພວມຢູ່ໃນຂັ້ນຕອນການລົງມືກໍ່ສ້າງ ແລະຄາດວ່າຈະໃຫ້ສຳເລັດ ແລະເປີດໃຫ້ພໍ່ແມ່ປະຊາຊົນໄດ້ຊົມໄຊ້ຢ່າງເປັນທາງການໃນເດືອນຕຸລາ 2021 ນີ້.

    ທ່ານ ວິລະສັກ ດວງພະຈັນ ຫົວໜ້າຂະແໜງສົ່ງເສີມວິສະຫະກິດຂະໜາດກາງ ແລະຂະໜາດນ້ອຍພະແນກອຸດສະຫະກຳ ແລະການຄ້າແຂວງສາລະວັນທັງເປັນກອງເລຂາຄະນະຮັບຜິດຊອບການກໍ່ສ້າງຕະຫຼາດຊຸມຊົນພູຜາສຸກ ບ້ານຄຳທອງ ເມືອງສາລະວັນ ລາຍງານໃນໂອກາດທີ່ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນໍາຂົງເຂດວັດທະນະທຳ-ສັງຄົມ ພ້ອມຄະນະລົງຕິດຕາມຊຸກຍູ້ໂຄງການກໍ່ສ້າງຕະຫຼາດດັ່ງກ່າວວ່າ: ການກໍ່ສ້າງແມ່ນໄດ້ເລີ່ມມາແຕ່ວັນທີ 1 ສິງຫາ 2021, ໂຄງສ້າງປະກອບດ້ວຍເບຕົງເສີມເຫຼັກ, ຂະໜາດ12 x 15,5ແມັດ, ມຸງດ້ວຍສັງກະສີ, ມີຫ້ອງນໍ້າ 4 ຫ້ອງ, ຈຸດຕັ້ງແທ່ງນໍ້າ, ໂຊນຈັດວາງຕະຫຼາດວັນນັດ, ບ່ອນຈອດລົດດ້ານໜ້າຕະຫຼາດ, ເສັ້ນທາງເຂົ້າ-ອອກ ແລະຮ່ອງລະບາຍນໍ້າ, ໂຄ່ງການກໍ່ສ້າງຕະຫຼາດດັ່ງກ່າວແມ່ນເປັນທຶນສົມທົບລະຫ່ວາງພາກລັດ-ເອກະຊົນພາຍໃນແຂວງສາລະວັນຄາດວ່າຈະໄຊ້ທຶນໃນການກໍ່ສ້າງທັງໝົດ 250 ລ້ານກ່ວາກີບ.

   ພາຍຫຼັງກໍ່ສ້າງຕະຫຼາດແຫ່ງນີ້ແລ້ວຈະເປັນບ່ອນແລກປ່ຽນຊື້-ຂາຍສິນຄ້າຂອງປະຊາຊົນໃນເຂດດັ່ງກ່າວໃຫ້ມີຄວາມສະດວກສະບາຍຫຼາຍຂື້ນ, ທັງເປັນການກະກຽມຮອງຮັບໃຫ້ກັບນັກທ່ອງທ່ຽວທັງພາຍໃນ ແລະຕ່າງປະເທດທີ່ຈະເຂົ້າມາທ່ຽວໃນເຂດແຫຼ່ງທ່ອງທ່ຽວອຸທິຍານພູຜາສຸກກໍ່ຄືສະຖານທີ່ທ່ອງທ່ຽວແຫ່ງອຶ່ນໆພາຍໃນແຂວງສາລະວັນ

แชร์