5 ປີ ວຽງຈັນບໍລິຈາກເລືອດ 15.689 ຖົງ

ຂ່າວ: ແກ້ວອຸດົມ

ໃນໄລຍະ 5 ປີຜ່ານມາ (2016-2020) ແຂວງວຽງຈັນ ໄດ້ວາງຄາດໝາຍການບໍລິຈາກເລືອດທົ່ວສັງຄົມດ້ວຍຄວາມສະໝັກໃຈໃຫ້ໄດ້ 12.900 ຖົງ, ແຕ່ປະຕິບັດຕົວຈິງໄດ້ 15.689 ຖົງ ລື່ນແຜນການ 2.807 ຖົງ.

  ທ່ານ ດຣ ບຸນເນົາ ພະຈອມພົນ ຫົວໜ້າອົງການກາແດງແຂວງວຽງຈັນກ່າວໃນກອງປະຊຸມຄະນະກຳມະການປຸກລະດົມຂົນຂວາຍການບໍລິຈາກເລືອດ ແລະຄຸ້ມຄອງບໍລິການເລືອດປອດໄພທີ່ໄຂຂຶ້ນທີ່ຫ້ອງວ່າການປົກຄອງແຂວງໃນວັນທີ 20 ກັນຍາ 2021 ກ່າວວ່າ: ໃນໄລຍະ 5 ປີຜ່ານມາ (2016-2020) ແຂວງວຽງຈັນ ໄດ້ວາງຄາດໝາຍການບໍລິຈາກເລືອດທົ່ວສັງຄົມດ້ວຍຄວາມສະໝັກໃຈໃຫ້ໄດ້ 12.900 ຖົງ, ແຕ່ປະຕິບັດຕົວຈິງໄດ້ 15.689 ຖົງ ລື່ນແຜນການ 2.807 ຖົງ. 

  ໃນນີ້ປີ 2016 ແຜນ 2.100 ຖົງ, ປະຕິບັດໄດ້ 2.575 ຖົງ, ລື່ນແຜນ 475 ຖົງ,ໃນນີ້ປີ 2017 ແຜນ 2.300 ຖົງ, ປະຕິບັດໄດ້ 2.2.957 ຖົງ,ລື່ນແຜນ 675 ຖົງ,ໃນນີ້ປີ 2018 ແຜນ 2.400 ຖົງ,ປະຕິບັດໄດ້ 3.410 ຖົງ, ລື່ນແຜນ 1.010 ຖົງ, ໃນນີ້ປີ 2019 ແຜນ 3.000 ຖົງ, ປະຕິບັດໄດ້ 3.341 ຖົງ, ລື່ນແຜນ 341 ຖົງ, ໃນນີ້ປີ 2020 ແຜນ 3.100 ຖົງ, ປະຕິບັດໄດ້ 3.406 ຖົງ, ລື່ນແຜນ 306 ຖົງ.

   ພ້ອມນີ້ຍັງໄດ້ແຈກຍາຍເລືອດໃຫ້ກັບໂຮງໝໍພາຍໃນປະເທດທີ່ຂາດເລືອດສຸກເສີນເປັນຕົ້ນໂຮງໝໍ 103 ຈຳນວນ11 ຖົງ, ໂຮງໝໍມິດຕະພາບ 29 ຖົງ, ໂຮງໝໍມະໂຫສົດ 5 ຖົງ, ໂຮງໝໍແຂວງຊຽງຂວາງ 2 ຖົງ, ໂຮງໝໍຫຼວງພະບາງ 1 ຖົງ, ໂຮງໝໍວຽງຈັນ-ຮ່າໂນຍ 1 ຖົງ ແລະໂຮງໝໍຈຳປາສັກ 1 ຖົງ. 

   ນອກນີ້ຍັງໄດ້ຈັດກອງປະຊຸມປະຈໍາປີແບບມີສ່ວນຮ່ວມໄດ້ 1 ຄັ້ງ, ສ້າງເຄືອຂ່າຍອາສາສະໝັກຜູ້ບໍລິຈາກເລືອດໄດ້ຈຳນວນ 123 ຄົນ, ຍິງ 42 ຄົນ, ປຸກລະດົມກຸ່ມນັກທຸລະກິດເພື່ອຂໍການສະໜັບສະໜູນເຄື່ອງທີ່ລະນຶກລວມມູນຄ່າທັງໝົດ 44,98 ລ້ານກີບ, ຈັດກອງປະຊຸມຮ່ວມກັບຄະນະບໍລິຫານງານຊາວໜຸ່ມແຂວງວຽງຈັນ ແລະ ປກສ ແຂວງວຽງຈັນບ່ອນລະ 1 ຄັ້ງ, ມີຜູ້ເຂົ້າຮ່ວມ 87 ຄົນ, ຍິງ11 ຄົນ.

    ສຳລັບແຜນການ 5 ປີ ຕໍ່ໜ້າ (2021-2025) ອົງການກາແດງແຂວງວຽງຈັນຈະປຸກລະດົມທຸກພາກສ່ວນໃນສັງຄົມເຂົ້າຮ່ວມບໍລິຈາກເລືອດໃຫ້ໄດ້ 19.000 ຖົງ ແລະສ້າງກອງທຶນກູ້ໄພໃຫ້ໄດ້ເມືອງລະ 1 ກອງທຶນ.

 ທ່ານຫົວໜ້າອົງການກາແດງແຂວງວຽງຈັນກ່າວອີກວ່າ: ສຳລັບປີ 2021 ອົງການກາແດງແຂວງໄດ້ວາງຄາດໝາຍຮັບບໍລິຈາກເລືອດທົ່ວສັງຄົມໃຫ້ໄດ້ 3.600 ຖົງ. ເຊິ່ງແຜນ 6 ເດືອນຕົ້ນປີ 2021 ໃຫ້ໄດ້ 1.989 ຖົງ, ປະຕິບັດຕົວຈິງໄດ້ພຽງ 1.524 ຖົງ ທັງນີ້ກໍ່ຍ້ອນສະພາບການລະບາດຂອງພະຍາດໂຄວິດ 19 ແລະບາງເມືອງທີ່ຢູ່ຫ່າງໄກຍັງບໍ່ທັນໄດ້ລົງໄປຈັດຕັ້ງປະຕິບັດ.

แชร์