ໄຊຍະ ໃຊ້ 14,7 ຕື້ກີບ ສ້ອມແປງສຸກເສີນໄລຍະສັ້ນ 2 ຂະແໜງການ

ຂ່າວ: ບຸນທີ

   ພິທີເຊັນສັນຍາການສ້ອມແປງສຸກເສີນໄລຍະສັ້ນ 2 ຂະແໜງການພະແນກກະສິກໍາ ແລະປ່າໄມ້ແຂວງ ແລະພະແນກໂຍທາທິການ ແລະຂົນສົ່ງແຂວງກັບກຸ່ມບໍລິສັດລາວໃຕ້ການຄ້າ ແລະການລົງທຶນຈໍາກັດໄດ້ຈັດຂຶ້ນໃນວັນທີ 20 ກັນຍາ 2021 ນີ້ທີ່ຫ້ອງປະຊຸມຊັ້ນ 2 ພະແນກກະສິກໍາ ແລະປ່າໄມ້ແຂວງ. ໂດຍເຂົ້າຮ່ວມຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີເຈົ້າເມືອງໄຊຍະບູລີ ພ້ອມດ້ວຍຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງພ້ອມດ້ວຍພະນັກງານວິຊາການເຂົ້າຮ່ວມ.

  ໂຄງການສ້ອມແປງສຸກເສີນໄລຍະສັ້ນໂຄງການຊົນລະປະທານທີ່ຖືກຜົນກະທົບຈາກພາຍຸໂຄກຸມາມີ 7 ເມືອງຄື: ເມືອງໄຊຍະບູລີມີ 9 ໂຄງການຄື: ໂຄງການນາຍາວ, ມີໄດສູບນໍ້າບ້ານນາຍາວ, ສ້ອມແປງຕໍມໍ, ເສົາຄໍ້າທໍ່ວາງທໍ່ຕາມແລວເກົ່າ ແລະໃສ່ທໍ່ຄອງທີ່ຂາດຍາວ 42 ແມັດ, ໂຄງການນາລາບ້ານນາລາມີສ້ອມແປງລະບົບຕູ້ບັງຄັບ ແລະມໍເຕີສູບນໍ້າຄືນໃໝ່, ອ່າງຫ້ວຍແຄ່ນບ້ານນາຄູນໃສ່ທໍ່ເຫຼັກ, ເສົາຄໍ້າ, ດິນຖົມ ແລະທໍ່ລະບາຍ, ໂຄງການຫ້ວຍໂງ່ເບີ 1 ບ້ານປົ່ງ, ສີມຸງຄຸນປະກອບມີການສ້ອມ ແປງຫົວງານ ແລະລະບົບຄອງເໝືອງ, ໂຄງການຫ້ວຍແດກ 3 ບ້ານນາງີ້ວຍົກລະດັບກໍ່ສ້າງເປັນຝາຍຖາວອນ, ໂຄງການນໍ້າປີງ ບ້ານນາມອນ ຍົກລະດັບກໍ່ສ້າງເປັນຝາຍຖາວອນ,ໂຄງການນໍ້າທັງບ້ານນາທັງສ້ອມແປງຫົວງານ ແລະລະບົບຄອງເໝືອງ,ໂຄງການນໍ້າແດກ 1 ບ້ານນາງີ້ວ ລອກຕະກອນໜ້າອ່າງ ແລະສ້ອມແປງຝາປິກ.

 ເມືອງຄອບມີ 3 ໂຄງການຄື: ໂຄງການນໍ້າປາຍ 2 ບ້ານໂພນສະຫວ່າງ ສ້ອມແປງຫົວງານ ແລະລະບົບຄອງເໝືອງ, ໂຄງການຫ້ວຍພະບ້ານຫ້ວຍພະນ້ອຍສ້ອມແປງຫົວງານ ແລະລະບົບຄອງເໝືອງ, ໂຄງການນໍ້າປາຍ 3 ບ້ານດອນຕັນ ສ້ອມແປງຫົວງານ ແລະລະບົບຄອງເໝືອງ.

   ເມືອງຊຽງຮ່ອນມີ 2 ໂຄງການ ຄື: ໂຄງການຮ່ອງຄໍ້າບ້ານຄໍ້າ ສ້ອມແປງຫົວງານ ແລະລະບົບຄອງເໝືອງ, ໂຄງການນໍ້າງື່ມ 3 ບ້ານສີນັກໄຊ້ສ້ອມແປງລະບົບຄອງເໝືອງ.

   ເມືອງຫົງສາມີ 3 ໂຄງການຄື: ໂຄງການສີສຸພັນ, ຝາຍນໍ້າຕັບກິ່ວສາລາບ້ານນໍ້າຕັບ, ບ້ານກິ່ວສ້ອມແປງຫົວງານ ແລະລະບົບຄອງເໝືອງ, ໂຄງການນໍ້າຍອນ ບ້ານຫ້ວຍຈວງ ສ້ອມແປງຫົວງານ ແລະລະບົບຄອງເໝືອງ, ໂຄງການຫ້ວຍສິ່ງ 2 ບ້ານປາກຫ້ວຍຍາງສ້ອມແປງຫົວງານ ແລະລະບົບຄອງເໝືອງ.

   ເມືອງພຽງມີ 3 ໂຄງການຄື: ໂຄງການນໍ້າຕອມບ້ານກາງປັບປຸງທາດລະບາຍຊາຍ, ຂຸດລອກຕະກອນໜ້າອ່າງ ແລະສ້ອມແປງທ້າຍຝາຍຄືນໃໝ່, ໂຄງການຝາຍນາໃໝ່+ນໍ້າມູນ 2 ບ້ານໂພນສະອາດກໍ່ສ້າງ-ສ້ອມແປງຫົວງານຄືນໃໝ່.

   ເມືອງແກ່ນທ້າວມີ 1 ໂຄງການຄື: ໂຄງການນໍ້າຕໍາ ບ້ານນາບອນ ສ້ອມແປງ ຄອງເໝືອງ ແລະເມືອງໄຊສະຖານມີ 1 ໂຄງການຄື: ໂຄງການນໍ້າໂພະ 1 ບ້ານມີໄຊ ສ້ອມແປງຫົວງານລວມມູນຄ່າທັງໝົດ 11 ຕື້ 649 ລ້ານກວ່າກີບ. ສ່ວນການກໍ່ສ້າງສ້ອມແປງສຸກເສີນໄລຍະສັ້ນພະແນກ ຍທຂ ແມ່ນສ້ອມແປງເສັ້ນທາງເມືອງໄຊສະຖານຈໍານວນ 7 ເສັ້ນ, ສ້ອມແປງຂົວອູ່ບ້ານນາຕໍນ້ອຍຫາບ້ານນາຕໍໃຫຍ່ ຈໍານວນ 1 ແຫ່ງ ລວມມູນຄ່າການກໍ່ສ້າງທັງ 2 ຂະແໜງການໄລຍະສັ້ນມີທັງໝົດ 14,7 ຕື້ກີບ ໂດຍແມ່ນທຶນງົບປະມານບ້ວງເງິນແຮລັດຖະບານມອບໃຫ້ກຸ່ມບໍລິສັດລາວໃຕ້ການຄ້າຈໍາກັດເປັນຜູ້ຮັບເໝົາກໍ່ສ້າງເຊິ່ງຈະເລີ່ມກໍ່ສ້າງສ້ອມແປງໃນເດືອນຕຸລາ ປີ 2021 ຫາເດືອນມີນາ 2022 ກໍານົດ 6 ເດືອນ ໃຫ້ສໍາເລັດ.

 ຕອນທ້າຍທ່ານ ຄໍາເພັດ ພົມມະລາດ ຫົວໜ້າພະແນກ ຍທຂ, ທ່ານ ບຸດສະກອນ ອິນທະລັງສີ ຫົວໜ້າພະແນກກະສິກໍາ ແລະປ່າໄມ້ແຂວງໃນນາມເຈົ້າຂອງໂຄງການ ແລະ ທ່ານ ແສງຈັນ ໝັ້ນແສນສຸກ ປະທານກຸ່ມບໍລິສັດລາວໃຕ້ການຄ້າ ແລະ ການລົງທຶນຈໍາກັດໃນນາມຜູ້ຮັບເໝົາກໍ່ສ້າງໄດ້ຮ່ວມກັນເຊັນບົດບັນທຶກການກໍ່ສ້າງທັງ 2 ຂະແໜງຢ່າງເປັນທາງການໂດຍເຂົ້າຮ່ວມເປັນສັກຂີພິຍານຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີພ້ອມດ້ວຍແຂກທີ່ເຂົ້າຮ່ວມ. 

แชร์