ເອກະຊົນສຳປະທານດິນລັດ ສ້າງຕະຫຼາດຍົມມະລາດເໜືອ

   ຂ່າວ: ເມືອງຍົມມະລາດ

   ວັນທີ 17 ກັນຍາ 2021 ທີ່ສຳນັກງານເມືອງຍົມມະລາດ ແຂວງຄຳມ່ວນ ໄດ້ຈັດພິທີຮ່ວມເຊັນສັນຍາສຳປະທານເນື້ອທີ່ດິນຂອງລັດເພື່ອພັດທະນາຕະຫຼາດເຂດບ້ານຍົມມະລາດເໜືອເມືອງຍົມມະລາດ ແຂວງຄຳມ່ວນ ໃຫ້ກຽດເປັນປະທານໂດຍທ່ານ ບຸນທະໄຫວ ໂດໄລສານ ຮອງເຈົ້າເມືອງໆຍົມມະລາດ,ມີບັນດາທ່ານຫົວໜ້າ - ຮອງຫົວໜ້າຫ້ອງການທີ່ກ່ຽວຂ້ອງຂັ້ນເມືອງ ແລະທ່ານ ເຄນ ພຸດທະວົງ ຜູ້ສຳປະທານເຂົ້າຮ່ວມ.

    ທ່ານ ເກີນຄຳ ໜໍ່ສຸວັນ ຫົວໜ້າຫ້ອງການແຜນການ ແລະການລົງທຶນເມືອງໄດ້ຂຶ້ນຜ່ານເອກະສານເນື້ອໃນສັນຍາໃນການສຳປະທານຊຶ່ງເນື້ອທີ່ໃນການສຳປະທານໃນຄັ້ງນີ້ ມີເນື້ອທີ່ທັງໝົດ 6.171 ຕາແມັດ ມູນຄ່າການລົງທຶນທັງ ໝົດ 2,15 ຕື້ກີບ ໃນໄລຍະການສຳປະທານແມ່ນ 30 ປີ ຈຸດປະສົງເພື່ອພັດທະນາທີ່ດິນດັ່ງກ່າວເຂົ້າໃນການບໍລິການດ້ານຕະຫຼາດ, ຄ້າຂາຍສິນຄ້າພາຍໃນເມືອງ ແລະຕ່າງເມືອງ, ເພື່ອອຳນວຍຄວາມສະດວກ, ຮັກສາຄວາມເປັນລະບຽບຮຽບຮ້ອຍ, ປົກປ້ອງສິດ ແລະຜົນປະໂຫຍດໃນການຄ້າຂາຍຂອງພໍ່ແມ່ປະຊາຊົນ, ເພື່ອອຳນວຍຄວາມສະດວກໃຫ້ແກ່ຜູ້ລົງທຶນໃນການດຳເນີນກິດຈະການ ແລະເພື່ອໃຫ້ຖືກຕ້ອງຕາມລະບຽບ ກົດໝາຍ.

 ກອງປະຊຸມຍັງໄດ້ຮັບຟັງການໂອ້ລົມຂອງລົມຂອງທ່ານ ບຸນທະໄຫວ ໂດໄລສານ ຮອງເຈົ້າເມືອງໆຍົມມະລາດຊຶ່ງທ່ານໄດ້ເນັ້ນໜັກໃຫ້ບັນດາທ່ານຫ້ອງການທີ່ກ່ຽວຂ້ອງ ແລະຜູ້ປະກອບການເອົາໃຈໃສ່ໃນການພັດທະນາໂຄງລ່າງເພື່ອປັບປຸງຊີວິດການເປັນຢູ່ຂອງພໍ່ແມ່ປະຊາຊົນຊາວເມືອງຍົມມະລາດໃຫ້ດີຂຶ້ນເປັນກ້າວໆ. ຫຼັງຈາກນັ້ນກອງປະຊຸມໄດ້ຮ່ວມກັນລົງນາມເຊັນສັນຍາຊຶ່ງຕາງໜ້າພາກລັດໂດຍ ທ່ານ ເກີນຄຳ ໜໍ່ສຸວັນ ຫົວໜ້າຫ້ອງການແຜນການ ແລະ ການລົງທຶນກັບທ່ານ ເຄນ ພຸດທະວົງ ໃນນາມຜູ້ສຳປະທານໂດຍມີ ທ່ານ ບຸນທະໄຫວ ໂດໄລສານ ຮອງເຈົ້າເມືອງໆ ຍົມມະລາດ ແລະ ບັນດາທ່ານຫົວໜ້າ-ຮອງຫົວໜ້າຫ້ອງການທີ່ກ່ຽວຂ້ອງຂັ້ນເມືອງ ເຂົ້າຮ່ວມເປັນສັກຂີພິຍານ.

แชร์