ບັນຫາຢາເສບຕິດ ເປັນສິ່ງທ້າທາຍຕໍ່ການພັດທະນາເມືອງລະມາມ

ຂ່າວ: ດາວສະຫວັນ

    ທ່ານ ພັນໂທ ຮຽມ ໄຊຍະລາດ ຫົວໜ້າກອງບັນຊາການປ້ອງກັນຄວາມສະຫງົບ ເມືອງລະມາມ ໃນໂອກາດທີ່ທ່ານ ເຫລັກໄຫລ ສີວິໄລ ເຈົ້າແຂວງເຊກອງ, ພ້ອມຄະນະມາເຄື່ອນໄຫວຊຸກຍູ້ວຽກງານອັນຈໍາເປັນຮີບດ່ວນຢູ່ເມືອງລະມາມໃນທ້າຍອາທິດຜ່ານມາວ່າ: ປະຈຸບັນ, ບັນຫາຢາເສບຕິດຢູ່ເມືອງລະມາມຖືວ່າເປັນບັນຫາທີ່ແຜ່ລາມໄປເກືອບທຸກໆບ້ານມີທັງຜູ້ຊື້-ຂາຍ, ຜູ້ນຳສົ່ງເຄື່ອນຍ້າຍ ແລະຜູ້ຄອບຄອງ, ຕາມຕົວເລກສະຖິຕິ 8 ເດືອນຜ່ານມາສາມາດເກັບກຳໄດ້ 27 ບ້ານ ພົບເປົ້າໝາຍຊື້-ຂາຍ 68 ຄົນ, ຍິງ 3 ຄົນ, ເປົ້າໝາຍເສບ 444 ຄົນ, ຍິງ 9 ຄົນ, ຊຶ່ງບັນຫາດັ່ງກ່າວຍັງເປັນສິ່ງທ້າທາຍຕໍ່ການພັດທະນາຢູ່ເມືອງລະມາມ.

   ທ່ານຫົວໜ້າກອງບັນຊາການ ປກສ ເມືອງລະມາມ ຍັງໃຫ້ຮູ້ອີກວ່າ: ອີງຕາມສະຖິຕິຂໍ້ມູນເຫັນວ່າບັນຫາຢາເສບຕິດຍັງມີລັກສະນະແຜ່ຂະຫຍາຍເພີ່ມຂຶ້ນ ແລະໄດ້ກາຍເປັນສິ່ງທ້າທາຍໃຫ້ແກ່ການພັດທະນາຊາວໜຸ່ມ-ໄວໝຸ່ມກໍຄືບັນຫາຈຳເປັນຮີບດ່ວນທີ່ເມືອງລະມາມຕ້ອງໄດ້ເອົາໃຈໃສ່ແກ້ໄຂໃຫ້ຫລຸດນ້ອຍຖອຍລົງໂດຍຈະໄດ້ສືບຕໍ່ໂຄສະນາຕ້ານຜົນຮ້າຍຈາກຢາເສບຕິດ, ການສ້າງຄອບຄົວ ແລະບ້ານປອດຢາເສບຕິດ, ການສ້າງໂຮງຮຽນ ແລະກົມກອງປອດຢາເສບຕິດ, ທັງນີ້ກໍເພື່ອເຮັດໃຫ້ການແກ້ໄຂບັນຫາຢາເສບຕິດຢູ່ເມືອງລະມາມໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະສ້າງໃຫ້ເມືອງລະມາມມີຄວາມເຂັ້ມແຂງທາງດ້ານວຽກງານປ້ອງກັນຊາດ-ປ້ອງກັນຄວາມສະຫງົບຢ່າງແທ້ຈິງ.
   ໃນໄລຍະຜ່ານມາພາກສ່ວນກ່ຽວຂ້ອງຂອງເມືອງກໍໄດ້ມ້າງຄະດີຢາເສບຕິດໄດ້ 6 ລາຍ, ກັກຕົວຜູ້ຕ້ອງຫາ 10 ຄົນ, ກວດພົບ ແລະຢຶດຂອງກາງຢາເສບຕິດຈຳນວນ 339 ເມັດ, ສຶກສາອົບຮົມຜູ້ທີ່ຕິດຢາເສບຕິດທີ່ບໍ່ທັນຮ້າຍແຮງ 22 ຄົນ, ນຳສົ່ງຜູ້ຕິດຢາເສບຕິດຂັ້ນຮ້າຍແຮງ 2 ຄົນ.

แชร์