9 ເດືອນ ຊີເອັນພີ ຮັບໂກຕ້າສົ່ງອອກແຮ່ທາດ 2 ແສນກວ່າໂຕນ

ຂ່າວ: ຫ້ອງການພະລັງງານ

  ວັນທີ 15 ກັນຍານີ້ການນຳຂັ້ນແຂວງອຸດົມໄຊ ແລະການນຳເມືອງໄຊໄດ້ລົງຊຸກຍູ້, ຕິດຕາມການຂຸດຄົ້ນແຮ່ເຫຼັກໃນຂອບເຂດສຳປະທານຂອງບໍລິສັດ CNP ສຳຫຼວດ ແລະຂຸດຄົ້ນບໍ່ແຮ່ຂາອອກຂາເຂົ້າໂດຍມີ ທ່ານ ອາລຸນ ບຸນວິໄລ ຫົວໜ້າພະແນກພະລັງງານ ແລະບໍ່ແຮ່ແຂວງ, ທ່ານ ວາລີ ຈືນໍ ເຢັງ ເຈົ້າເມືອງໆໄຊ ແລະພາກສ່ວນທີ່ກ່ຽວຂ້ອງຈຳນວນໜຶ່ງ.

    ການລົງຊຸກຍູ້, ຕິດຕາມການຂຸດຄົ້ນບໍ່ແຮ່ຍັງໄດ້ມີການສັງເກດການບູລະນະເສັ້ນທາງຂົນສົ່ງແຮ່ທາດ, ຜົນກະທົບດ້ານສິ່ງແວດລ້ອມ ແລະຜົນກະທົບຕໍ່ປະຊາຊົນທີ່ຢູ່ເຂດໃກ້ຄຽງ.

   ສຳລັບຢູ່ແຂວງອຸດົມໄຊ ບໍລິສັດ CNP ສຳຫຼວດ ແລະຂຸດຄົ້ນບໍ່ແຮ່ຂາອອກ-ຂາເຂົ້າ ໄດ້ເຊັນສັນຍາສຳປະທານກັບກະຊວງພະລັງງານ ແລະບໍ່ແຮ່ມາແຕ່ຕົ້ນປີ 2011 ໂດຍມອບໃຫ້ພະແນກພະລັງງານ ແລະບໍ່ແຮ່ແຂວງອຸດົມໄຊເປັນຜູ້ຄຸ້ມຄອງ ແລະເມືອງເປັນຜູ້ຕິດຕາມ.

   ການຂຸດຄົ້ນແມ່ນຂຸດຄົ້ນຢູ່ 3 ຈຸດ ຄື: ຂຸດຄົ້ນແຮ່ທອງຢູ່ເຂດບ້ານນາສະຫວ່າງ, ເມືອງນາໝໍ້ ເນື້ອທີ່ 16 ກິໂລຕາແມັດ, ຂຸດຄົ້ນແຮ່ຊືນສັງກະສີ ຢູ່ເຂດບ້ານນາໄຊ, ເມືອງນາໝໍ້ ເນື້ອທີ່ 14 ກິໂລຕາແມັດ ແລະຂຸດຄົ້ນແຮ່ເຫຼັກ ເຂດບ້ານຕາງເງີຍ, ເມືອງຫຼາ ເນື້ອທີ່ 16 ກິໂລຕາ ແມັດ. ມີໂຮງງານ 1 ຈຸດ, ລານພັກແຮ່ 3 ຈຸດ, ລານພັກແຮ່ເຂດບ້ານໂພນໂຮມ, ບ້ານກໍນ້ອຍຫຼັກ 14 ແລະຫຼັກ 16. ເລີ່ມແຕ່ເດືອນມັງກອນ ຫາ ເດືອນກັນຍາ 2021 ທາງບໍລິສັດໄດ້ຮັບໂກຕ້າສົ່ງອອກແຮ່ທາດຈຳນວນ 2 ແສນກວ່າໂຕນ.

แชร์