ເຮືອນປະຊາຊົນຢູ່ເມືອງແກ່ນທ້າວ ຖືກນໍ້າຖ້ວມ ຮອບທີ 2

   ໃນວັນທີ 16-17 ກັນຍາ 2021 ນີ້, ເມືອງແກ່ນທ້າວ ແຂວງໄຊຍະບູລີ ມີຝົກຕົກໜັກເຮັດໃຫ້ເກີດນໍ້າຖ້ວມເນື້ອທີ່ທໍາການຜະລິດ ແລະສິ່ງປຸກສ້າງຂອງປະຊາຊົນ. ນອກຈາກນັ້ນ, ຍັງມີເສັ້ນທາງ ແລະຂົວບາງແຫ່ງຖືກນໍ້າຖ້ວມຈົນບໍ່ສາມາດສັນຈອນໄປ-ມາໄດ້.


    ສໍາລັບບ້ານທີ່ຖືກຜົນກະທົບມີ 5 ບ້ານ ຈໍານວນ 24 ຄອບຄົວຄື: ບ້ານທ້າວແກ່ນ 3 ຄອບຄົວ, ບ້ານຈອມແກ້ວ 1 ຄອບຄົວ, ບ້ານເມືອງໝໍ 15 ຄອບຄົວ, ບ້ານນາຫີນ 4 ຄອບຄົວ ແລະບ້ານນາບອນ 1 ຄອບຄົວ. ສ່ວນຫົນທາງຖືກນໍ້າເຊາະເຈື່ອນ 4 ຈຸດ ຄື: ແຕ່ສາມແຍກສາລານໍ້າວັງຫຼວງ-ຫໍແດນດິນ (ບ້ານລາດຂາມປ້ອມ), ສາມແຍກບ້ານນໍ້າເຕົ່າ-ບ້ານດົງສະຫງວນ (ເມືອງປາກລາຍ), ສາມແຍກບ້ານໂພນປ່າປໍ-ບ້ານກົກໄຮ່ຄໍາ ແລະບ້ານຫາດແດງ-ທ່າບັກເວີນຄໍາການສັນຈອນພົບຄວາມຫຍຸ້ງຍາກບາງຈຸດລົດນ້ອຍບໍ່ສາມາດທຽວໄດ້, ນໍ້າຖ້ວມຂົວ 8 ແຫ່ງ ຄື: ຂົວບ້ານຫາດແດງ-ບ້ານພວນ, ຂົວບ້ານຈອມແກ້ວ, ຂົວບ້ານນໍ້າເຕົ່າ, ຂົວບ້ານປາກຕົມ, ຂົວບ້ານຫ້ວຍບູຮາ, ຂົວບ້ານເມືອງໝໍ ແລະຂົວບ້ານປາກແຄມ 2 ແຫ່ງ. ສ່ວນມູນຄ່າຄວາມເສຍຫາຍ ແລະເນື້ອທີ່ນາຈະແຈ້ງໃຫ້ຊາບພາຍຫຼັງ.

 ຕໍ່ກັບສະພາບຜົນກະທົບຈາກພາຍຸຄັ້ງນີ້, ທາງຫ້ອງການແຮງງານ ແລະສະຫວັດດີການສັງຄົມເມືອງແກ່ທ້າວໄດ້ລົງເກັບກໍາຂໍ້ມູນ ແລະລາຍງານປະທານຄະນະກໍາມະທີການຄຸ້ມຄອງໄພພິບັດຂັ້ນເມືອງແລ້ວເພື່ອມີທິດຊີ້ນໍາໃນການຈັດຕັ້ງປະຕິບັດຂັ້ນຕອນຕໍ່ໄປ.

(ຂ່າວ: ຖວທ ແກ່ນທ້າວ)

แชร์