ໂຮງໝໍຟູຢູທ້າງ ຮັບເໝົາສະຖານທີ່ແຍກປ່ຽວຄົນຕ່າງຊາດເຂົ້າມາຫຼວງນໍ້າທາ

ຂ່າວ:  ມຸນຕີ ໄຊຍະສິດທິວົງ

   ໃນວັນທີ 9 ກັນຍາຜ່ານມາຢູ່ໂຮງໝໍແຂວງຫຼວງນໍ້າທາ, ໄດ້ຈັດພິທີເຊັນສັນຍາຮັບເໝົາສະຖານທີ່ຈໍາກັດບໍລິເວນ ເເລະແຍກປ່ຽວສໍາລັບຄົນຕ່າງປະເທດຜູ້ທີ່ມີຄວາມສ່ຽງ ຫຼືຜູ້ສໍາພັດໃກ້ສິດກັບຜູ້ຕິດເຊື້ອພະຍາດໂຄວິດ-19 ທີ່ເດີນທາງເຂົ້າມາແຂວງຫຼວງນໍ້າທາ ແລະກວດວິເຄາະຊອກຫາເຊື້ອພະຍາດໂຄວິດ-19, ລະຫ່ວາງອົງການປົກຄອງແຂວງຫຼວງນໍ້າທາ ແລະໂຮງໝໍຟູຢູທ້າງຈຳກັດຜູ້ດຽວ,ເປັນກຽດເຂົ້າຮ່ວມຂອງທ່ານ ພົມມະສຸກ ວິໄລກຸນ ຮອງເຈົ້າແຂວງຫົວໜ້າຄະນະສະເພາະກິດເພື່ອປ້ອງ ກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຢູ່ ແຂວງຫຼວງນໍ້າທາ, ມີພາກສ່ວນທີ່ກ່ຽວຂ້ອງ, ພະນັກງານວິຊາການທັງສອງຝ່າຍເຂົ້າຮ່ວມ.
   ທັງສອງຝ່າຍໄດ້ຕົກລົງເຫັນດີເຊັນສັນຍາຮ່ວມກັນໃນການຮັບເໝົາສະຖານທີ່ຈຳກັດບໍລິເວນ ແລະແຍກປ່ຽວສໍາລັບຜູ້ເດີນທາງມາຈາກຕ່າງປະເທດ ແລະຜູ້ສໍາພັດໃກ້ສິດກັບຜູ້ຕິດເຊື້ອຢູ່ພາຍໃນ ແຂວງຫຼວງນໍ້າທາ, ໂດຍໄດ້ກໍານົດສະຖານທີ່ໂຮງແຮມ, ເຮືອນພັກ ເເລະຮ້ານອາຫານຢູ່ພາຍໃນແຂວງຫຼວງນໍ້າທາເປັນສູນຈຳກັດບໍລິເວນຊົ່ວຄາວຄື: ໂຮງແຮມຮ່ວງຈິງ (ນໍ້າທາ), ໂຮງແຮມຮ່ວງຈິງ (ບໍ່ເຕ່ນ), ເຮືອນພັກດາວອນ, ເຮືອນພັກທຸລະກິດ, ເຮືອນພັກຄຸນຊັບ, ເຮືອນພັກໂຊກໄຊທອນ, ເຮືອນພັກ ກົງເອີ, ເຮືອນພັກຈິງກິ້ວ, ເຮືອນພັກ ຄິວລົດ, ເຮືອນພັກຈິງຍີ້, ເຮືອນພັກວິລະເຮືອນພັກທະວີໄຊ ແລະເຮືອນພັກບົວສອນ, ລວມມີ 592 ຫ້ອງນອນແຕ່ລະຫ້ອງມີເຄື່ອງຮັບໃຊ້ຫ້ອງນອນ ແລະຫ້ອງນໍ້າຄົບຊຸດ, ໄດ້ກຳນົດເອົາຮ້ານອາຫານ 5 ຮ້ານ ສາມາດຮັບສົ່ງອາຫານໄດ້ 3100 ຄົນຕໍ່ມື້ , ເຊິ່ງຜູ້ທີ່ຈະມາກັກແຍກປ່ຽວຕ້ອງໄດ້ຈ່າຍເງິນໃຫ້ຜູ້ຮັບເໝົາສະເລ່ຍ 2.842-3.542 ຢວນຕໍ່ 14 ມື້ຕໍ່ຄົນ ຊຶ່ງທາງຜູ້ຮັບເໝົາຈະປະຕິບັດພັນທະຕ່າງໆໃຫ້ແກ່ລັດໂດຍຕ້ອງເສຍພັນທະໃຫ້ລັດ 10% ຂອງລາຍຮັບຈາກການກວດວິເຄາະຊອກຫາເຊື້ອພະຍາດໂຄວິດ-19 ຂອງໂຮງໝໍຟູຢູທ້າງຈໍາກັດ ຜູ້ດຽວ ທີ່ປະຈໍາຢູ່ໂຮງໝໍແຂວງຫຼວງນໍ້າທາອີງຕາມການກໍານົດຄ່າກວດຕົວຈິງຂອງກະຊວງສາທາລະນະສຸກໃນແຕ່ລະໄລຍະຊຶ່ງໄດ້ກຳນົດສັນຍາເປັນເວລາ 3 ປີ ແລະສາມາດຕໍ່ໄດ້ຕາມການເຫັນດີຂອງສອງຝ່າຍ.
   ໂອກາດດັ່ງກ່າວກໍ່ໄດ້ລົງນາມເຊັນສັຍຍາລະຫວ່າງທ່ານ ພົມມະສຸກ ວິໄລກຸນ ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ແຂວງ ແລະທ່ານ ຄໍາພັນ ຜູ້ອໍານວຍການໂຮງໝໍຟູຢູທ້າງ ຈຳກັດຜູ້ດຽວ ໂດຍມີພາກສ່ວນທີ່ກ່ຽວຂ້ອງ, ພະນັກງານວິຊາການທັງສອງຝ່າຍເຂົ້າຮ່ວມເປັນສັກຂີພິຍານ.

แชร์