ທ່າແຕງ ສືບຕໍ່ສົມທົບທຶນຕິດຕັ້ງໄຟຟ້າເຍືອງທາງໃຫ້ 2 ບ້ານ

 ໃນວັນທີ 13 ກັນຍາ 2021 ທີ່ຫ້ອງວ່າການປົກຄອງເມືອງທ່າແຕງ ແຂວງເຊກອງ ໄດ້ຈັດພິທີມອບເງິນສົມທົບທຶນເພື່ອຈັດຊື້ໄຟເຍືອງທາງໃຫ້ 2 ບ້ານຄື: ບ້ານກົກພຸງໃຕ້ ແລະບ້ານກົກພຸງເໜືອບ້ານລະ 5 ລ້ານກີບ, ໂດຍເປັນກຽດກ່າວມອບຂອງທ່ານ ສົມເພັດ ເອີດລັດດາ ເຈົ້າເມືອງໆທ່າແຕງ, ກ່າວຮັບແມ່ນອໍານາດການປົກຄອງສອງ ບ້ານດັ່ງກ່າວ, ໂດຍມີທ່ານ ນາງ ແກ້ວອຸດອນ ດວງມະນີວົງ ຫົວໜ້າຄະນະໂຄສະນາອົບຮົມເມືອງ, ທັງເປັນຜູ້ຊີ້ນໍາເຂດຈຸດສຸ່ມພັດທະນາທີ 2 ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
  ທ່ານ ສົມເພັດ ເອີດລັດດາ ເຈົ້າເມືອງໆທ່າແຕງ ໄດ້ກ່າວວ່າ: ຈໍານວນເງິນ 10 ລ້ານກີບ ທີ່ມອບໃຫ້ສອງບ້ານກົກພຸງໃຕ້ ແລະບ້ານກົກພຸງເໜືອ ແມ່ນເພື່ອເປັນການສືບຕໍ່ປະກອບສ່ວນສົມທົບທຶນເຂົ້າໃນການຕິດຕັ້ງໄຟໂຊລລາເຊວເຍືອງທາງຫຼວງໃຫ້ມີຄວາມສະຫວ່າງໃນຍາມຄໍ່າຄືນຊຶ່ງການປະກອບສ່ວນທຶນໃນຄັ້ງນີ້ແມ່ນການພັດທະ ນາໃນຫົວຂໍ້ 4 ຮ່ວມຄື: ຮ່ວມກັນປຶກສາຫາລື-ວາງແຜນ,ຮ່ວມກັນຈັດຕັ້ງປະຕິບັດຕົວຈິງ, ຮ່ວມກັນຕິດຕາມກວດກາປະເມີນຜົນ ແລະຮ່ວມກັນສະຫຼຸບຜົນສໍາເລັດພ້ອມທັງແບ່ງປັນຜົນປະໂຫຍດ.
  ທ່ານເຈົ້າເມືອງໆທ່າແຕງ ໄດ້ກ່າວຕື່ມວ່າ: ການຕິດຕັ້ງໄຟຟ້າເຍືອງທາງແມ່ນຕ້ອງເຮັດໃຫ້ຖືກຕ້ອງ ແລະສອດຄ່ອງຕາມເຕັກນິກວິຊາການຂອງພາກສ່ວນກ່ຽວຂ້ອງ, ໂດຍແນໃສ່ຮັບປະກັນໃນການຊົມໃຫ້ຍາວນານ, ນອກຈາກນີ້ກໍເປັນການເພີ່ມແສງສະຫວ່າງໃນຍາມຄໍ່າຄືນເພື່ອຫຼີກລຽງບັນຫາປະກົດການຫໍ້ຍທໍ້ຕາມທ້ອງຖະໜົນໃຫ້ຫຼຸດນ້ອຍຖອຍລົງເທື່ອລະກ້າວ.

ຂ່າວ: ພອນ ບຸນອຸທິດ

• 15/09/2021