ສິງກະໂປ ພົບຜູ້ຕິດເຊື້ອໂຄວິດເພີ່ມສູງຂຶ້ນ

  ລັດຖະບານສິງກະໂປປະກາດຍອມຮັບວ່າ ຈຳນວນຕົວເລກຜູ້ຕິດເຊື້ອໃໝ່ພາຍໃນປະເທດໄດ້ເພີ່ມສູງຂຶ້ນໃນອາທິດຜ່ານມາຈາກ 76 ຄົນ ຕໍ່ມື້ເພີ່ມເປັນ 288 ຄົນຕໍ່ມື້ ໂດຍຄາດວ່າ ຈະມີທ່າອ່ຽງເພີ່ມສູງເຖິງ ມື້ລະພັນຄົນໃນອີກບໍ່ດົນເຖິງແມ່ນປະຊາກອນ 81% ຈະໄດ້ຮັບວັກແຊງປ້ອງກັນໂຄວິດ-19 ຄົບສອງໂດສແລ້ວກໍຕາມ.
  ຕາມຂ່າວຕ່າງປະເທດລາຍງານວ່າ ລັດຖະບານສິງກະໂປໄດ້ຮຽກຮ້ອງໃຫ້ປະຊາຊົນຫຼຸດຜ່ອນກິດຈະກຳທາງສັງຄົມທີ່ບໍ່ຈຳເປັນພ້ອມກຽມເລັ່ງກວດຫາເຊື້ອໃຫ້ປະຊາຊົນໃນກຸ່ມສ່ຽງຂະນະດຽວກັນນັ້ນ, ລັດຖະບານຍັງມີແຜນຫຼຸດຈຳນວນວັນກັກໂຕຈາກ 14 ມື້ ເຫຼືອພຽງ 10 ວັນເນື່ອງຈາກສາຍພັນເດລຕ້າມີຊ່ວງເວລາຂອງການຟັກໂຕສັ້ນລົງ ຊຶ່ງຄາດວ່າ ຈະເລີ່ມປະຕິບັດນັບແຕ່ອາທິດນີ້ເປັນຕົ້ນໄປພ້ອມໃຫ້ຜູ້ປ່ວຍໂຄວິດທີ່ສັກວັກແຊງຄົບກັບໄປປິ່ນປົວຕົນເອງຢູ່ບ້ານເຮືອນຂອງໃຜລາວ.
  ຢ່າງໃດກໍຕາມ, ລັດຖະບານສິງກະໂປຈະບໍ່ມີການນຳໃຊ້ມາດຕະການລ໊ອກດາວອີກຄັ້ງແຕ່ຈະນຳໃຊ້ມາດຕະການຕັດວົງຈອນແທນ ໂດຍອີງໃສ່ປະສົບການຂອງການລະບາດໂຄວິດ-19 ໃນຫຼາຍປະເທດໄດ້ຊີ້ໃຫ້ເຫັນວ່າຄື້ນການແຜ່ລະບາດຈະໃຊ້ເວລາປະມານ 4-8 ອາທິດກ່ອນທີ່ມັນຈະເພີ່ມຕົວເລກສູ່ຈຸດສູງທີ່ສຸດແລ້ວຈຶ່ງຄ່ອຍຫຼຸດຈຳນວນຕໍ່າລົງໃນເວລາຕໍ່ມາ.

-----

ໜັງສືພິມ ເສດຖະກິດ-ສັງຄມ

แชร์