ຢຸດເລາະ! ຢຸດຊຸມແຊວ ຫາກຢາກຢຸດໂຄວິດລະບາດຊຸມຊົນ

ຂ່າວ: ຣັດສະໝີ ດວງສັດຈະ

   ນັບແຕ່ອາທິດຜ່ານມານີ້, ຢູ່ປະເທດເຮົາເຫັນວ່າ: ການນໍາເຂົ້າເຊື້ອພະຍາດໂຄວິດ-19 ຈາກຕ່າງປະເທດມີຈັງຫວະຫຼຸດລົງ; ແຕ່ຂະນະດຽວ, ການແຜ່ລະບາດຂອງພະຍາດດັ່ງກ່າວຢູ່ຊຸມຊົນກໍ່ຂ້ອນຂ້າງສູງຜິດປົກກະຕິຊຶ່ງເປັນເຫດໃຫ້ເຈົ້າໜ້າທີ່ທີ່ປະຕິບັດພາລະກິດປະຈັນບານໃນປ້ອມດ້ານໜ້າຕ້ອງໄດ້ຮັບເຊື້ອພະຍາດຢ່າງຫຼີກລ່ຽງບໍ່ໄດ້; ຕົ້ນຕໍຂອງການແຜ່ເຊື້ອດັ່ງກ່າວແມ່ນຍ້ອນພະນັກງານ, ທະຫານ, ຕໍາຫຼວດແລະປະຊາຊົນຈໍານວນບໍ່ໜຶ່ງປະໝາດ, ລະເຫຼີງ ແລະບໍ່ປະຕິບັດຄໍາສັ່ງຂອງຄະນະສະເພາະກິດຢ່າງເຂັ້ມງວດ, ມີການສັນຈອນເຂົ້າເຂດແດງ-ບ້ານແດງ ແລະ ມີຈໍານວນບໍ່ໜ້ອຍຍັງຊຸມແຊວ, ຕັ້ງວົງຊຸມຊົນຊຸມແຊວ, ເຮັດກິດຈະກໍາຕ່າງໆ ໃນຫຼາຍສະຖານທີ່ ແລະກໍ່ຕ້ອງຂໍຊົມເຊີຍການນໍາ, ຄະນະສະເພາະກິດ ແລະຊາວແຂວງຫົວພັນທີ່ເສີມຂະຫຍາຍທາດແທ້, ມູນເຊື້ອເດັດດ່ຽວສູ້ຮົບ ແລະແຂວງຫົວພັນກາຍເປັນປ້ອມໝັ້ນແຫ່ງດຽວຂອງປະເທດທີ່ສາມາດສະກັດກັ້ນ ແລະຕ້ານກັບພະຍາດໂຄວິດໄດ້ຈົນເທົ່າທຸກມື້ນີ້.

      ມາຮອດປະຈຸບັນ, ທົ່ວປະເທດມີຜູ້ຕິດເຊື້ອສະສົມທັງໝົດ 17.682 ຄົນ, ເສຍຊີວິດສະສົມ 16 ຄົນ ແລະຄົນເຈັບກໍາລັງປິ່ນປົວ 4.414 ຄົນ; ດັ່ງທ່ານ ດຣ. ລັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງວ່າ: ວານນີ້ (ວັນທີ 13 ກັນຍາ 2021) ມີຜູ້ເດີນທາງເຂົ້າຕາມດ່ານຕ່າງໆໃນ ສປປ ລາວ ທັງໝົດ 1.486 ຄົນ; ມີສູນຈຳກັດບໍລິ ເວນ ທີ່ຍັງເປີດຢູ່ 93 ສູນ ແລະ 54 ໂຮງ ແຮມ, ມີຜູ້ຈຳກັດບໍລິເວນ 5.705 ຄົນ ແລະໄດ້ກວດວິເຄາະທັງໝົດ 3.985 ຄົນ, ໃນນັ້ນກວດພົບຜູ້ຕິດເຊື້ອໃໝ່ 127 ຄົນ ແລະຕິດເຊື້ອໃນຊຸມຊົນ 54 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອຜ່ານມາ; ສໍາລັບການຕິດເຊື້ອໃນຊຸມຊົນຢູ່ນະຄອນຫຼວງວຽງຈັນ ມີ 24 ຄົນ, ຈໍານວນໜຶ່ງກໍ່ໄປອົບອຸ່ນເຮືອນດີ (ຄົນເສຍຊີວິດ) ຫຼັງໜຶ່ງຢູ່ບ້ານສາງນໍ້າມັນ, ນະຄອນປາກເຊ, ແຂວງຈໍາປາສັກໃນວັນທີ 3-10 ກັນຍາ 2021 ພ້ອມກັນກັບ 9 ຄົນ.

   ທ່ານ ດຣ. ລັດສະໝີ ວົງຄໍາຊາວ ກ່າວຕື່ມວ່າ: ໃນຂະນະນີ້, ທ່າອ່ຽງການລະບາດຂອງພະຍາດໂຄວິດຢູ່ໃນທົ່ວໂລກລວມທັງ ສປປ ລາວ ຍັງບໍ່ທັນເປັນທີ່ໄວ້ວາງໃຈ, ຫຼາຍແຂວງຍັງມີການລະບາດຢູ່ໃນລະດັບ 2 ແລະພ້ອມມີທ່າອ່ຽງທີ່ຈະກ້າວໄປຫາລະດັບ 3 ນັ້ນກໍ່ຄືລະດັບສູງສຸດ; ສະນັ້ນການປະຕິບັດມາດຕະການທີ່ຄະນະສະເພາະ ກິດວາງອອກແມ່ນມີຄວາມຈໍາ ເປັນທີ່ສຸດທີ່ຈະຕ້ອງໄດ້ ສືບຕໍ່ຈັດ ຕັ້ງປະຕິບັດຢ່າງເຄັ່ງຄັດ ໂດຍສະ ເພາະຫຼີກເວັ້ນການເດີນທາງໄປ ສະຖານທີ່ສ່ຽງ, ສະຖານທີ່ແອອັດ ເຊັ່ນ: ເຮືອນດີ, ເຮືອນກຳ,ພິທີການທາງປະເພນີ ແລະສາສະໜາ, ງານດອງ, ຮ້ານອາຫານ-ບັນເທິງ ແລະອື່ນໆ, ບໍ່ໃຫ້ຊຸມແຊວກັນເປັນກຸ່ມ, ການຮັກສາໄລຍະຫ່າງ, ໃສ່ຜ້າອັດປາກ-ດັງ,ລ້າງມືເລື້ອຍໆດ້ວຍສະບູ ແລະນໍ້າສະອາດ ຫຼືເຈວລ້າງມືທີ່ມີທາດເຫຼົ້າ 70 ຂື້ນໄປ, ຮັກສາມາລະຍາດໃນການໄອ-ຈາມ,ຖ້າຫາກທ່ານຮູ້ສຶກວ່າ: ເປັນກຸ່ມສ່ຽງຕ້ອງຈໍາກັດບໍລິເວນຕົນເອງທັນທີພ້ອມທັງໄປກວດຊອກຫາເຊື້ອ, ເຖິງວ່າ: ຜົນກວດຈະເປັນລົບແຕ່ກໍ່ຕ້ອງໄດ້ສືບຕໍ່ຈຳກັດບໍລິເວນຕົນເອງຈົນຄົບກໍານົດ 14 ວັນ ຫຼືກັບມາກວດຄືນ (ຖ້າວ່າມີອາການຜິດປົກກະຕິ); ຈົ່ງພ້ອມກັນດໍາລົງຊີວິດປົກກະຕິແບບໃໝ່ (newno mal) ແລະ ຮ່ວມແຮງຮ່ວມໃຈສາມັກຄີພ້ອມກັນຜ່ານຜ່າວິກິດນີ້ໄປດ້ວຍກັນ.

  ຕໍ່ບັນຫາດັ່ງກ່າວ; ໃນນາມສື່ມວນຊົນຂໍຮຽກຮ້ອງມາຍັງຄະນະພັກ-ຄະນະບັນຊາ, ອໍານາດການປົກຄອງທຸກຂັ້ນພ້ອມທັງປະຊາຊົນລາວບັນດາເຜົ່າຈົ່ງເພີ່ມທະວີມາດຕະການສູງກວ່າເກົ່າເພື່ອເດັດດ່ຽວຕໍ່ສູ້ກັບພະຍາດດັ່ງກ່າວຢ່າງເຂັ້ມງວດດ້ວຍການນໍາໃຊ້ມາດຕະການທີ່ເດັດຂາດຕໍ່ຜູ້ລ່ວງລະເມີດ;ບໍ່ອະນຸຍາດໃຫ້ອົງກອນ ແລະບຸກຄົນໃດຝ່າຝືນຕໍ່ຄໍາສັ່ງ ແລະ ແຈ້ງການຂອງລັດຖະບານ, ຂອງຄະນະສະເພາະກິດ ແລະ ອໍານາດການປົກຄອງຢ່າງເດັດຂາດ; ຫ້າມຄົນເຂົ້າ-ອອກຢູ່ເຂດ ຫຼື ບ້ານແດງ (ຍົກເວັ້ນຜູ້ມີຄວາມຈໍາເປັນແທ້ໆ); ພ້ອມນັ້ນ, ທັງພາກລັດພາກທຸລະກິດກໍ່ຄວນໃຫ້ການອຸປະຖໍາຄໍ້າຊູ, ຊ່ວຍເຫຼືອດ້ານສະບຽງອາຫານ ແລະເຄື່ອງໃຊ້ປະຈໍາວັນແກ່ປະຊາຊົນໃນເຂດບ້ານແດງໃນໄລຍະທີ່ກັກຕົວຢູ່ບ້ານເຮືອນ; ພ້ອມນັ້ນ, ທະຫານ, ຕໍາຫຼວດ ແລະເຈົ້າໜ້າທີ່ໆກ່ຽວຂ້ອງຕ້ອງຍົກສູງຄວາມຮັບຜິດຊອບໃນການກວດກາເວນຍາມ, ບໍ່ໃຫ້ມີການຕິດຕໍ່ພົວພັນໂດຍກົງໃນເຂດດັ່ງກ່າວທັງນີ້ກໍ່ເພື່ອເຮັດໃຫ້ສະພາບການກັບຄືນສູ່ປົກກະຕິໂດຍໄວ.

แชร์