ຍອດຂາຍຜະລິດຕະພັນລາວປອດສານພິດລົງເຄິ່ງໜຶ່ງຮຽກຮ້ອງສັງຄົມໃຊ້ສິນຄ້າພາຍໃນຫຼາຍຂື້ນ

    ໃນໄລຍະເກືອບ 2 ປີ ທີ່ປະເທດເຮົາໄດ້ມີການລະບາດຂອງພະຍາດໂຄວິດ-19 ຊຶ່ງໄດ້ສົ່ງຜົນກະທົບຫຼາຍດ້ານຕໍ່ການພັດທະນາເສດຖະກິດຂອງປະເທດ, ປະຊາຊົນ, ຫົວໜ່ວຍທຸລະກິດ ແລະ ຜູ້ປະກອບການຜະລິດຕ່າງໆ ເຊັ່ນດຽວກັບສູນສົ່ງເສີມຜະລິດຕະພັນລາວປອດສານພິດໄດ້ຮັບຜົນກະທົບຢ່າງໜັກໂດຍເຮັດໃຫ້ການຜະລິດສິນຄ້າຫຼຸດລົງ ແລະສິ່ງສຳຄັນແມ່ນຍອດການຈຳໜ່າຍສິນຄ້າຫຼຸດລົງເຄິ່ງໜຶ່ງຖ້າທຽບໃສ່ຍອດຂາຍກ່ອນການລະບາດຂອງພະຍາດໂຄວິດທັງນີ້ປະທານສູນດັ່ງກ່າວຍັງຮຽກຮ້ອງໃຫ້ສັງຄົມຫັນມາຊົມໃຊ້ຜະລິດຕະພັນຂອງຄົນລາວຫຼາຍຂຶ້ນເພື່ອຫຼຸດຜ່ອນການນຳເຂົ້າຈາກຕ່າງປະເທດ.

   ທ່ານ ຄຳສິງ ສີຫາເທບ ປະທານສູນສົ່ງເສີມຜະລິດຕະພັນລາວປອດສານພິດໃຫ້ສຳພາດວ່າ: ສູນສົ່ງເສີມຜະລິດຕະພັນລາວປອດສານພິດຍາມໃດກໍ່ເປັນຫ່ວງເປັນໃຍນຳສຸຂະພາບຂອງປະຊາຊົນຄົນລາວເຮົາ, ໃນໄລຍະເກືອບ 2 ປີ ປະເທດພວກເຮົາໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ຫຼາຍສົມຄວນລັດຖະບານໄດ້ ມີມາດຕະການປ້ອງກັນເປັນຢ່າງດີເຮັດໃຫ້ການລະບາດຢູ່ໃນປະເທດເຮົາຖືວ່າຢູ່ໃນລະດັບທີ່ສາມາດປ້ອງກັນໄດ້, ສຳລັບສູນສົ່ງເສີມຜະລິດຕະພັນລາວປອດສານພິດແມ່ນ ໄດ້ຮັບຜົນກະທົບຫຼາຍສົມຄວນໂດຍເມື່ອກ່ອນຍອດການຈຳໜ່າຍສິນຄ້າຂອງພວກເຮົາຖ້າທຽບໃສ່ໄລຍະທີ່ມີການລະບາດຂອງພະຍາດໂຄວິດເຫັນໄດ້ວ່າຍອດການ ຈຳໜ່າຍສິນຄ້າຫຼຸດລົງເຄິ່ງໜຶ່ງເນື່ອງຈາກວ່າເຮົາໄດ້ປະຕິບັດຕາມນະໂຍບາຍຂອງພັກ-ລັດທີ່ວ່າຕ້ອງຊ່ວຍກັນໃນການປະຄັບປະຄອງຮັກສາການເຄື່ອນໄຫວຂອງການ ຜະລິດເປັນປົກກະຕິເພື່ອຕອບສະໜອງໃຫ້ປະຊາຊົນເຮົາຊຶ່ງພວກເຮົາກໍ່ໄດ້ຮັກສາການຜະລິດໄວ້ເປັນປົກກະຕິເຖິງຍອດຈຳໜ່າຍຈະຫຼຸດລົງພະນັກງານກໍຍັງຮັກສາໄວ້ຄື ເກົ່າແຕ່ການຜະລິດຫຼຸດລົງເພາະການຈຳໜ່າຍຫຼຸດລົງແນວໃດກໍ່ຕາມພວກເຮົາກໍສູ້ຊົນຈັດສົ່ງສິນຄ້າໃຫ້ລູກຄ້າໄດ້ເປັນປົກກະຕິຕາມທີ່ລູກຄ້າສັ່ງ.

   ທ່ານ ຄຳສິງ ສີຫາເທບ ຍັງໄດ້ຮຽກຮ້ອງໃຫ້ທົ່ວສັງຄົມພ້ອມກັນອູ້ມຊູປົກປັກຮັກສາຜະລິດຕະພັນຂອງລາວເຮົາສິນຄ້າທີ່ຄົນລາວເຮົາຜະລິດເພື່ອຄວາມຍືນຍົງຖ້າຫາກບໍ່ຊົມໃຊ້ສິນຄ້າພາຍໃນກໍ່ຈະເຮັດໃຫ້ສິນຄ້າພາຍໃນໝົດໄປ ແລະມີແຕ່ສິນຄ້າຕ່າງປະເທດໃນທ້ອງຕະຫຼາດບ້ານເຮົາ, ຖ້າຫາກເຮົາຊົມໃຊ້ສິນຄ້າພາຍໃນຫຼາຍຂຶ້ນກໍ່ຈະຊ່ວຍໃຫ້ຫຼຸດຜ່ອນການນຳເຂົ້າສິນຄ້າບາງປະເພດໄດ້ທີ່ສຳຄັນກໍ່ຈະມີເງິນຕາເພີ່ມຂຶ້ນເຮັດໃຫ້ເງິນກີບເຮົາແຂງຄ່າ, ການຜະລິດພາຍໃນກໍ່ຈະເພີ່ມຂຶ້ນປະຊາຊົນກໍ່ມີລາຍໄດ້ກ້າວໄປເຖິງເຮັດໃຫ້ປະຊາຊົນພົ້ນທຸກໄດ້.

   ປະຈຸບັນສູນສົ່ງເສີມຜະລິດຕະພັນລາວປອດສານພິດໄດ້ຜະລິດສິນຄ້າຄຸນນະພາບອອກສູ່ສັງຄົມ 60 ກວ່າຊະນິດເປັນຕົ້ນແມ່ນຊາ, ເຫັດໝື່ນປີ, ກາເຟເຫັດໝື່ນປີ, ກາເຟຜັກອີ່ຮຸມປາແດກສຳເລັດຮູບດອນໂຂງ, ນໍ້າດື່ມແຮ່ທາດທຳມະຊາດພູໂຂງ ແລະຜະລິດຕະພັນອື່ນໆ.

แชร์