ສະພາປະຊາຊົນອຸດົມໄຊ ສ້າງແຜນກຳນົດພະນັກງານນຳພາ-ຄຸ້ມຄອງ

   ກອງປະຊຸມການສ້າງແຜນກຳນົດພະນັກງານນຳພາ-ຄຸ້ມຄອງ ຂອງສະພາປະຊາຊົນແຂວງອຸດົມໄຊ ປີ 2021-2025 ໄດ້ຈັດຂຶ້ນໃນວັນທີ 9 ກັນຍາຜ່ານມາເປັນ ກຽດເຂົ້າຮ່ວມມີ ທ່ານ ຄຳດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີທ່ານ ນາງ ລີຈັນ ສີສຸທຳ ຮອງຫົວໜ້າຄະນະຈັດຕັ້ງແຂວງ, ຄະນະກວດກາແຂວງ, ພ້ອມດ້ວຍພະນັກງານຫຼັກແຫຼ່ງພາຍໃນສະພາປະຊາຊົນແຂວງເຂົ້າຮ່ວມ.
   ທ່ານ ຄຳເຜີຍ ງອນວັນຄຳ ຮອງປະທານສະພາປະຊາຊົນແຂວງກໍ່ໄດ້ຂຶ້ນຜ່ານບົດລາຍງານການເມືອງການຈັດຕັ້ງປະຕິບັດວຽກງານໃນໄລຍະຜ່ານມາໂດຍຫຍໍ້ດ້ານດີຜົນງານ, ດ້ານອ່ອນ ຂໍ້ຄົງຄ້າງ ແລະທິດທາງແຜນການ, ກອງປະຊຸມໄດ້ຍົກສູງວຽກງານການສ້າງແຜນກຳນົດພະນັກງານນຳພາ-ຄຸ້ມຄອງໃນແຕ່ລະໄລຍະເພື່ອໃຫ້ແທດເໜາະກັບສະພາບຕົວຈິງ, ພ້ອມດຽວກັນ ທ່ານ ນາງ ລີຈັນ ສີສຸທຳ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນເຜີຍແຜ່ເຊື່ອມຊຶມບັນດາເອກະສານຕິດພັນກັບການສ້າງແຜນກໍານົດພະນັກງານນໍາພາ-ຄຸ້ມຄອງຂັ້ນພະແນກການ-ອົງການ ໂດຍສັງລວມເອົາບາງເນື້ອໃນມະຕິຂອງກົມການເມືອງສູນກາງພັກຕິດພັນກັບວຽກງານສ້າງແຜນກຳນົດພະນັກງານນໍາພາ-ຄຸ້ມຄອງຢູ່ຂັ້ນພະແນກການ, ອົງການຂອງແຂວງນໍາສະເໜີ, ທົບທວນຄືນຕໍ່ກັບບາງເນື້ອໃນມະຕິຂອງກົມການເມືອງສູນກາງພັກໂດຍມີຈຸດປະສົງຄາດໝາຍເພື່ອຄາດຄະເນເປົ້າໝາຍພະນັກງານທີ່ຈະຈັດວາງເຂົ້າໃນຕຳແໜ່ງນຳພາ-ຄຸ້ມຄອງ ແຕ່ລະຂັ້ນ,ແຕ່ລະຂະແໜງການ,ແນໃສ່ຮັບປະກັນລັກສະນະສືບທອດ, ປ່ຽນແທນຕໍ່ເນື່ອງໃນສະເພາະໜ້າ ແລະຍາວນານ, ການສ້າງແຜນກຳນົດພະນັກງານເປັນການກະກຽມບຸກຄະລາກອນໃນລັກສະນະເປີດກວ້າງເພື່ອໃຫ້ມີແຫຼ່ງເລືອກເຟັ້ນພະນັກງານນໍາພາ-ຄຸ້ມຄອງຕອບສະໜອງທາງດ້ານຈຳນວນ, ຄຸນນະພາບ, ໂຄງປະກອບຕາມຄວາມຮຽກຮ້ອງຕ້ອງການຂອງບັນດາຕຳແໜ່ງນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແຫນງການໃນລະບົບການເມືອງ, ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະການຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ, ແນໃສ່ປົກປັກຮັກສາ ແລະສ້າງສາປະເທດຊາດຕາມຈຸດໝາຍສັງຄົມນິຍົມ.
  ການສ້າງແຜນກຳນົດພະນັກງານນຳພາ-ຄຸ້ມຄອງ ເປັນວຽກງານໜຶ່ງທີ່ສໍາຄັນພື້ນຖານຂອງວຽກງານພະນັກງານ, ຮັບປະກັນການຫັນວຽກງານພະນັກງານດໍາເນີນຕາມລະບຽບການ,ແບບແຜນເພື່ອຕອບສະໜອງໜ້າທີ່ການ ເມືອງຂອງພັກ-ລັດສະເພາະໜ້າ ແລະຍາວນານ,ເປັນການຫັນຍຸດທະສາດກ່ຽວກັບວຽກງານພະນັກງານເປັນອັນລະອຽດ, ສ້າງໂຄງການສັງລວມພື້ນຖານໃຫ້ແກ່ການສ້າງແຜນກໍ່ສ້າງ-ບຳລຸງ, ຄາດຄະເນ,ສັບຊ້ອນ ແລະຈັດວາງພະນັກງານຢ່າງສົມເຫດສົມຜົນ. ຮັບປະກັນຄວາມຖືກຕ້ອງ, ໂປ່ງໃສ, ພາວະວິໄສ, ຮອບດ້ານ, ຍຸຕິທຳ, ຄໍານຶງເຖິງໂຄງປະກອບເພດ, ເຜົ່າ ແລະເລັ່ງໃສ່ພະນັກງານໜຸ່ມໃຫ້ກວມອັດຕາສ່ວນຫຼາຍ. ທັງນີ້ກໍ່ເພື່ອຄັດເລືອກເອົາພະນັກງານທີ່ມີຄຸນທາດການເມືອງໜັກແໜ້ນແລະມີຄຸນສົມບັດພຽງພໍທີ່ຈະເປັນພະນັກງານການນຳໃນອະນາຄົດ.

แชร์