ອົງການໄອຍະການ ປະກາດພະນັກງານພັກການ-ຮັບອຸດໜູນບຳນານ

  ອົງການໄອຍະການປະຊາ ຊົນສູງສຸດ ໄດ້ຈັດພິທີປະກາດພະນັກງານການນຳຂອງອົງການໄອຍະການປະຊາຊົນສູງສຸດອອກພັກການ-ຮັບອຸດໜູນບຳນານໃນວັນທີ 10 ກັນຍາ 2021 ໂດຍມີທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ, ມີບັນດາຄະນະພັກ, ຄະນະນຳ, ຫົວໜ້າກົມ-ຮອງກົມ ແລະພາກ ສ່ວນກ່ຽວຂ້ອງເຂົ້າຮ່ວມ.


    ທ່ານ ສີອຳພອນ ຈັນລາຕີ ຮອງຫົວໜ້າກົມຄຸ້ມຄອງພະນັກງານຄະນະຈັດຕັ້ງສູນກາງພັກໄດ້ຜ່ານລັດຖະດໍາລັດຂອງປະທານປະເທດວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກພັກການ-ຮັບອຸດໜູນບໍານານສະບັບເລກທີ 196/ປປທ, ລົງວັນທີ 28/7/ 2021 ໂດຍອະນຸມັດໃຫ້ທ່ານ ບຸນຍັງ ຈັນດາລາສານ ກຳມະການປະຈຳພັກ, ຮອງຫົວໜ້າອົງການໄອຍະການປະຊາຊົນສູງສຸດເຂົ້າສັງກັດລັດໃນວັນທີ 13 ກໍລະກົດ 1973 ລວມອາຍຸການ 48 ປີ ເຫັນດີອະ ນຸມັດ ແລະ ຄິດໄລ່ເງິນອຸດໜູນບໍານານ ແລະອື່ນໆຕາມຂັ້ນ, ຊັ້ນໃນປະຈຸບັນຊຶ່ງໃນໄລຍະທີ່ຜ່ານມາທ່ານໄດ້ປະກອບສ່ວນສໍາຄັນເຂົ້າໃນວຽກງານອົງການໄອຍະການປະຊາຊົນສູງສຸດ ເປັນເວລາດົນນານຊຶ່ງມີຫຼາຍຜົນງານທີ່ຍາດມາໄດ້ ແລະສະແດງເຖິງການປະຕິບັດວຽກງານທີ່ຜ່ານມາຢ່າງຮອບດ້ານ.
    ໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ກໍໄດ້ສະແດງຄວາມຂອບໃຈ ແລະ ສະແດງຄວາມຮູ້ບຸນຄຸນ ແລະ ຍ້ອງຍໍຊົມເຊີຍຕໍ່ກັບຜົນງານໂດຍຍົກບາງບົດຮຽນ, ປະສົບການຂອງທ່ານຮອງຫົວໜ້າອົງການໄອຍະການປະຊາຊົນສູງສຸດໃນໄລຍະຜ່ານມາວ່າ: ທ່ານ ບຸນຍັງ ຈັນດາລາສານ ເປັນພະນັກງານປະຕິວັດຜູ້ທີ່ອຸທິດຕົນເອງຕໍ່ພັກ-ລັດ ກໍຄືການຈັດຕັ້ງຕະຫຼອດໄລຍະທີ່ເຮັດໜ້າທີ່ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ, ທ່ານໄດ້ອຸທິດຕົນ ແລະທຸ່ມເທເຫື່ອແຮງ, ສະຕິປັນຍາເຂົ້າໃນການປະຕິບັດໜ້າທີ່ການເມືອງໃນການຊີ້ນໍາ-ນໍາພາວຽກງານໄອຍະການປະຊາຊົນໂດຍສະເພາະວຽກງານກອງເລຂາຄະນະກໍາມະການອະໄພຍະໂທດ ລະດັບຊາດ ແລະວຽກງານຄ້າຍຄຸມຂັງ-ດັດສ້າງ, ວຽກງານກວດກາ ແລະວຽກງານຕິດຕາມກວດກາການປະຕິບັດຄໍາຕັດສິນຂອງສານຢ່າງມີຜົນສໍາເລັດຫຼາຍດ້ານ. ພ້ອມນີ້, ທ່ານຍັງໄດ້ຮຽກຮ້ອງໃຫ້ພະນັກງານການນໍາລຸ້ນສືບທອດໄດ້ຮຽນຮູ້ບົດຮຽນ, ປະສົບການເພື່ອປັບປຸງແບບແຜນການນໍາພາ-ຊີ້ນໍາ ທີ່ພາໃຫ້ມີຜົນສໍາເລັດຕໍ່ໜ້າທີ່ວຽກງານເພື່ອນໍາໃຊ້ເຂົ້າໃນການສືບຕໍ່ປະຕິບັດໜ້າທີ່ວຽກງານ ໂດຍສະເພາະໃນຂົງເຂດວຽກງານອົງການໄອຍະການປະຊາຊົນສູງສຸດ.

แชร์