ສະຖານທູດໄທ ມອບເງິນຊ່ວຍເຫຼືອ ສປປ ລາວ ຕ້ານໂຄວິດ

   ສະຖານທູດໄທ ປະຈໍາ ສປປ ລາວ ໄດ້ມອບເງິນຊ່ວຍເຫຼືອເພື່ອປ້ອງກັນການລະບາດຂອງພະຍາດໂຄວິດ-19 ໃຫ້ແກ່ລັດຖະບານລາວ ຈຳນວນ 538.000 ບາດ ໂດຍໄດ້ມີພິທີມອບ-ຮັບໃນວັນທີ 9 ກັນຍາ 2021 ຊຶ່ງມອບໂດຍທ່ານ ເຈດສະດາ ກະຕະເວທິນ ເອກອັກ ຄະຣາຊະທູດໄທ ປະຈໍາ ສປປ ລາວ ແລະຮັບໂດຍທ່ານ ອາລຸນໄຊສູນ ນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ, ມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
   ການຊ່ວຍເຫຼືອຄັ້ງນີ້, ເປັນການຮ່ວມກັນລະຫວ່າງສະຖານເອກອັກ ຄະຣາຊະທູດໄທ ປະຈຳ ສປປ ລາວ ແລະສະຖານກົງສຸນໃຫຍ່ໄທປະຈຳແຂວງສະຫວັນນະເຂດ ແນໃສ່ຕ້ານ ແລະປ້ອງກັນການລະບາດຂອງພະຍາດໂຄວິດ-19 ໃນ ສປປ ລາວ ໂດຍຜ່ານສູນກາງ ຊາວໜຸ່ມປະຊາຊົນ ປະຕິວັດລາວ ເພື່ອສົ່ງໄປຊ່ວຍເຫຼືອບັນດາແຂວງ ຂອງ ສປປ ລາວ ທີ່ກໍາລັງຮັບເອົາແຮງງານລາວທີ່ເດີນທາງກັບຄືນປະເທດຈຳນວນຫຼວງຫຼາຍ, ເຈົ້າໜ້າທີ່ດ່ານຕ່າງໆມີຄວາມສ່ຽງໃນການຕ້ອນຮັບແຮງງານເຫຼົ່ານີ້ ໂດຍສະເພາະການກວດຫາເຊື້ອພະຍາດໂຄວິດ-19, ການບໍລິການດ້ານອາຫານ ແລະສະຫວັດດີການຂອງແຮງງານ.
   ໃນທ້າຍເດືອນສິງຫາຜ່ານມາ, ທ່ານ ອະທິປັດ ໂຣດຈະນະໄພບູນ ກົງສຸນໃຫຍ່ໄທ ປະຈຳແຂວງສະຫວັນນະເຂດ ກໍໄດ້ມອບເງິນຈຳນວນ 200.000 ບາດ ໃຫ້ທ່ານ ເລຂາຄະນະບໍລິຫານງານສູນກາງ ຊາວໜຸ່ມປະຊາຊົນ ປະຕິວັດລາວ ໃນໂອກາດທີ່ທ່ານເດີນທາງໄປຊຸກຍູ້ຄະນະສະເພາະກິດວິຊາການດ້ານຕ່າງໆ ຢູ່ສູນຈໍາກັດບໍລິເວນ ແຮງງານລາວທີ່ແຂວງສະຫວັນນະເຂດ.

แชร์