ອຸບັດຕິເຫດຂ້າຄົນລາວ 14 ຄົນ ຕໍ່ປະຊາກອນ 1 ແສນ

ຂ່າວ: ກະຊວງ ຍທຂ

  ໃນແຕ່ລະປີຕົວເລກສະເລ່ຍຄົນລາວມີຜູ້ເສຍຊີວິດ 14 ຄົນຕໍ່ປະຊາກອນໜຶ່ງແສນຄົນຍ້ອນອຸຕິບັດເຫດ, ຊຶ່ງເປັນຄວາມອັນຕະລາຍສ້າງຜົນເສຍຫາຍຢ່າງໃຫຍຫຼວງຕໍ່ສະພາບເສດຖະກິດ ແລະຊີວິດຂອງປະຊາຊົນທັງນີ້ພາກສ່ວນລັດກ່ຽວຂ້ອງໂດຍສະເພາະ ຍທຂ ແລະ ປກສ ກຳລັງເລັ່ງມືຮ່ວມປ້ອງກັນ ແລະແກ້ໄຂເພື່ອຕົວເລກສະເລ່ຍດັ່ງກ່າວຫຼຸດນ້ອຍຖອຍລົງໄດ້ໃນອານາຄົດ.

    ເມື່ອບໍ່ດົນມານີ້, ກົມຂົນສົ່ງກະຊວງໂຍທາທິການ ແລະຂົນສົ່ງ (ຍທຂ) ແລະ ກົມໃຫຍ່ຕຳຫຼວດກະຊວງປ້ອງກັນຄວາມສະຫງົບ (ປກສ) ໄດ້ເຊັນບົດບັນທຶກຄວາມເຂົ້າໃຈກ່ຽວກັບການນຳໃຊ້ໂປຣແກມຖານຂໍ້ມູນສຳລັບການປະເມີນຜົນ ແລະການລາຍງານກ່ຽວກັບອຸບັດຕິເຫດທາງຫຼວງເພື່ອເຮັດໃຫ້ການນໍາໃຊ້ລະບົບດັ່ງກ່າວມີຄວາມຍືນຍົງ ແລະໄດ້ນໍາໃຊ້ໃນຂອບເຂດທົ່ວປະເທດ,ທັງເປັນການສືບຕໍ່ຮ່ວມມື ແລະຍາດແຍ່ງການຊ່ວຍເຫຼືອຈາກຕ່າງປະເທດ ແລະອົງການຈັດຕັ້ງສາກົນອື່ນໆ ມານໍາໃຊ້ເຂົ້າໃນວຽກງານດັ່ງກ່າວເພື່ອເປັນການປ້ອງກັນ ແລະແກ້ໄຂບັນຫາອຸບັດຕິເຫດແນໃສ່ເຮັດໃຫ້ການເກີດອຸບັດຕິເຫດຫຼຸດລົງເທື່ອລະກ້າວໂດຍການຮ່ວມລົງນາມລະຫວ່າງທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງກະຊວງ ຍທຂ ແລະທ່ານ ພົຕ ຄຳກິ່ງ ຜຸຍຫລ້າມະນີວົງ ຫົວໜ້າກົມໃຫຍ່ຕຳຫຼວດກະຊວງ ປກສ, ມີທ່ານ ລັນ ແສງອາພອນ ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ພົນຕີ ທອງເຫຼັກ ມັງໜໍ່ເມກ ຮອງລັດຖະມົນຕີກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.

  ການນຳໃຊ້ໂປຣແກມຖານຂໍ້ມູນສຳລັບການປະເມີນຜົນແລະການລາຍງານກ່ຽວກັບອຸບັດຕິເຫດທາງຫຼວງເພື່ອຊ່ວຍໃນການສັງລວມລາຍງານກ່ຽວກັບການເກີດອຸບັດຕິ ເຫດທີ່ຍັງມີສູງຖ້າທຽບໃສ່ປະຊາກອນ, ການເກີດອຸບັດຕິເຫດແຕ່ລະຄັ້ງເຮັດໃຫ້ມີຜູ້ບາດເຈັບ ຫຼືເສຍຊີວິດຢ່າງຫຼວງຫຼາຍໂດຍສະເລ່ຍໃນແຕ່ລະປີມີຜູ້ເສຍຊີວິດ 14 ຄົນຕໍ່ປະຊາກອນໜຶ່ງແສນຄົນ, ຊຶ່ງອົງການສະຫະປະຊາຊາດເຫັນຄວາມອັນຕະລາຍ ແລະໃຫ້ຄວາມສໍາຄັນຕໍ່ຜົນເສຍຫາຍດັ່ງກ່າວ ແລະເພື່ອບັນລຸເປົ້າໝາຍແຜນດໍາເນີນງານແຫ່ງທົດສະວັດຂອງອົງການສະຫະປະຊາຊາດໃນການຫຼຸດຜ່ອນຈໍານວນຜູ້ເສຍຊີວິດຈາກການເກີດອຸບັດຕິເຫດຕາມທາງຫຼວງລົງ 50% ຈາກປີ 2020-2030 ໂດຍໄດ້ເນັ້ນໜັກກ່ຽວກັບຂໍ້ມູນການເກີດອຸບັດຕິເຫດຕ້ອງມີຄວາມຈະແຈ້ງ ແລະ ຊັດເຈນເພື່ອຈະໄດ້ນໍາເອົາຂໍ້ມູນດັ່ງກ່າວເປັນບ່ອນອີງໃນການວິເຄາະ, ວິໄຈເພື່ອຫາວິທີການ, ຂັ້ນຕອນການປ້ອງກັນ ແລະ ແກ້ໄຂບັນຫາການເກີດອຸບັດຕິເຫດຕາມທາງຫຼວງໃນຕໍ່ໜ້າ.

    ໃນປີ 2017 ຜ່ານມາພາຍໃຕ້ໂຄງການຂົວທາງໄລຍະ 2 (LRSP2) ທະນະຄານໂລກໄດ້ຈັດສັນງົບປະມານຈໍານວນໜຶ່ງເພື່ອຈັດຝຶກອົບຮົມແນະນໍາລະບົບໂປຣແກຣມ DRIVER ໂດຍມີຜູ້ຕາງໜ້າຈາກກົມຂົນສົ່ງກະຊວງ ຍທຂ, ກົມຕໍາຫຼວດຈະລາຈອນກະຊວງ ປກສ, ຜູ້ຕາງໜ້າຈາກກະຊວງສາທາລະນະສຸກ, ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ເຂົ້າຮ່ວມ ແລະໄດ້ເລີ່ມນໍາໃຊ້ລະບົບດັ່ງກ່າວຢູ່ນະຄອນຫຼວງວຽງຈັນ. ຈາກນັ້ນ, ກໍໄດ້ສືບຕໍ່ຈັດຝຶກອົບຮົມໃຫ້ເຈົ້າໜ້າທີ່ຕໍາຫຼວດຈະລາຈອນ 9 ຕົວເມືອງໃນນະຄອນຫຼວງວຽງຈັນ; ເມືອງໂພນໂຮງ ແຂວງວຽງຈັນ; ເມືອງ ທ່າພະບາດ, ປາກຊັນ, ບໍລິຄັນ, ປາກກະດິງ ແຂວງບໍລິຄໍາໄຊ ແລະເມືອງຫີນບູນ,ເຊບັ້ງໄຟ,ທ່າແຂກ ແຂວງຄໍາມ່ວນ,ມາຮອດປະຈຸບັນໄດ້ທໍາການທົດລອງນໍາໃຊ້ລະບົບດັ່ງກ່າວນີ້ແລ້ວ ແລະສາມາດເກັບກໍາຂໍ້ມູນອຸບັດຕິເຫດໄດ້ທັງໝົດ 2.231 ກໍລະນີ.

แชร์